ДЬОЛЛООХ ОҔО СААС

Чаҕылҕан тыллара

Эниэ күөх отун үрдүнэн
Эдэр этэрээт истэ,
Айылҕа араас киэргэлэ
Аара арыллан истэ.

Эрэйи-муҥу билбэккэ,
Эмньик, сайаҕас санаа
Сайыҥҥы мүөтүн испэхтээн
Сайа ыллааҥ, айаннааҥ.

Эһиги үүнэр күннэргит
Уйгу дьолунан туолар.
Эһиги сайдан үүнэргит —
Ийэ дойдубут дьоло!

Мөлүйүөн аҕа кыһанар,
Көрөр мөлүйүөн ийэ,
Кыһанар барыбыт туһугар
Киһи аймах генийэ.

Эдэрдэр, барыҥ этэҥҥэ,
Күүтэр күлүмнээх сааскыт! —
Сүүһүнэн атах биир тэҥҥэ
Күөххэ көрүлээн ааста.