ОЛ ТҮҮН

Эллэй тыллара

Чох хара түүммүт уһунун,
Силлиэ тыал көтөр-сүүрэр,
Муус кырыа дьиэбит оһоҕун
Уотун тыал саба үрэр.

Хардаҕас маспыт баранна,
Уо, аҕам хаһан кэлиэй?
Балаҕан тымныы, хараҥа-
Ким маһы таһан биэриэй?

Ийэкээм, уоккун отун даа,
Кинигэ ааҕыам этэ..."
Онуоха ийэм ыллаата,
Сүрэхпин миэнин үөртэ.

Чэ, бэйи, тукаам, сотору
Куобахтаан аҕаҥ кэлиэ,
Кини нэк сонун кэтэммин,
Мин маһы сүгэн киириэм...

Эн аҕаҥ муҥнаах сис тыаҕа
Буурҕаны кытта сырсар,
Эйигин, миигин иитээри -
Куобахха айа тардар."

Чох хара түүммүт долгуйбат.
Аҕам суох... хааным оонньуур,
Муус кырыа дьиэбит үрдүнэн
Силлиэ-тыал ытыыр, ыллыыр...