АНААРЫЫ

Виталий Власов тыллара


Көрүөхпүн баҕарабын —
          Хаһан да харахтамматах
                    Үөйбэтэх көстүүлэри!
Истиэхпин ыралыыбын —
          Киһи-харамай чуҥнаабатах
                    Атын эйгэ тыастары!
Тутуохпун толкуйдуубун —
          Киминэн да харбамматах
                    Иллиир-дьоллуур эттиктэри!
Үктүөхпүн торумнуубун —
          Тыыннаах харамай ууһаабатах
                    Былыыр-былыргы дойдулары!!!


Билэргэ талаһабын —
         Өйгө-мэйиигэ сыстыбатах,
                   Уһулуччу дьиктилэри!
Харахпар анаарабын -
         Икки атах эҕирийбэтэх
                   Туспа тыыннаах салгыннары!
Сүрэхпэр ылынабын —
         Араҥалаан алтыспатах
                   Кэккэлэһэ барар олохтору!
Анааран билгэлиибин —
         Кэм-кэрдии тиийбэтэх
                   Төрүү илик Үйэлэри!!!

1995 с.