Виталий Власов тыллара

Бүппэти бүтэрдиин холбооммун,
Сиппэти ситэрдиин холооммун,
Өлбүтү тыыннаахтыын сөрөөммүн,
Үрүҥү харалыын бөрөөммүн,
         «Дьиктиттэн дьиктини
                   Булуом дуо?»
Бу сирбэр көҥүлбүнэн көрүлээммин,
Олохпор үөрүүбүнэн үөгүлээммин,
Эргиччи талбыппынан таалалааммын,
Кэриччи ырыабынан салалламмын,
         «Дьиктиттэн дьиктини
                   Булуом дуо?»

Хос ырыата:

Айылҕа кистэлэҥэр
           Киириэхпин кыһанабын дуу?
Хомуһун дьиктитигэр
          Сылдьыахпын сананабын эминэ дуу?
«Көстүбэт Күүс» таабырынын
          Таайыахпын баҕарабын дуу?
«Биллибэт күүс» абылаҥын
          Тутуохпун талаһабын эминэ дуу?
Сулустары быыһынан
          Айанныам дуо, ырабар?
Күнү-Ыйы таһынан
          Мин көтүөм дуо, ырайбар?!.

Күн Сирин сэттэ дьиктитин
Хаһан эмэ ааһыам дуо?
Кэм кэлэн сарыал итиитин
Ытыспынан баһыам дуо?
Таас хайабын иҥнэрэммин
Сирим сааһын билиэм дуо?
Күөлбүн иһэн итирэммин
Ааспыт кэми тэлиэм дуо?

Хос ырыата.

Дойҕоҕо:

Бэйэтиттэн күлүгүн араарар
Сүдү «күүһү» көрүөм дуо?
Айаҕыттан кутааны таһаарар
Тыыннаах «дьиҥи» сөҕүөм дуо?
Ыаҕайа толору кистэлэҥи
Ирдээн-тордоон булуом дуо?
Араҥа Дойдуга үөскүлэҥи
Илэ көрөн — «суоллуом дуо?!.»

1996 с.