Виталий Власов тыллара

Эн, сиргэ олор, хараххын сим,
Умайар уоттан көрдөс.
Эн, төбөҕүн төҥкөт, уокка үҥк...
«Дьылҕа Тойон» уоҕа тыыннаах.
Эн, халлааны одуулаа, илиигин өрө уун,
Чолбону булан көрдөс.
Эн, Ийэ буоргар сүгүрүй, сиргэ үҥк...
«Дьылҕа Тойон» Аҕа суостаах.

          Итэҕэлгин бэйэҕэр истиҥник ыҥыр:
          Буруйгун билин, сыыһаҕын кэмсин.
          Оччоҕо ыарыыҥ сүтүө, кэлэйииҥ бүтүө,
          Дьэ! Мантан ыла өрөгөй эрэ түстүө!

Хос ырыата:

«Үөһээ дойдуо, сүрэхпэр киир,
Кыйдаа ыар санаабын, көмөлөс!
Киэҥ куйаар, буруйбун чэпчэт,
Бары итэҕэстэрбин суох оҥор!"

Эн, ытык маска иннигинэн буол,
Бэлэххин ууран көрдөс.
Эн, куккун-сүргүн ыҥыр, үөһээ үҥк...
«Дьылҕа Тойон» дьайар аптаах.
          Санааҥ-онооҥ ырааһын дууһаҕар киллэр:
          Албыҥҥын тохтот, алҕаскын быһаар,
          Оччоҕо кэбин тостуо, кутурҕан тохтуо,
          Соҕотохсуйууҥ аны суох буолуо!

Хос ырыата:

«Айылҕа ардаҕа, кирбин сайҕаа,
Икки атах кынатын, дьолун биэр!
Сата тыала, кырыыспын дьөлө үр,
Бар дьоммор көннөрү «Киһи» дэт!»

Ааттабыл дойҕоҕо:

         «Оо, Дьылҕа Хаан, уһугуннар,
         Ынырык түүлбүн киэр үргүт!
         Дьылҕам Сулуһа, абыраа-сырдат,
         Ынчык хаһыыбын... илдьэ бар!»

1992 с.