Ыллаа-туой, баян
14 февраля 2010, 23:08.
Баян долгутар тыаһыттан, баян эйээрэр доҕуһуолуттан ханныктаах да саха киһитин сүрэҕэ эппэйэ үөрэр, эдэр сааһын, кулууп кистэлэҥ кэтэһиилээх кэрэ киэһэлэрин санаан ааһар долгутуулаах. Уус Алдан Дүпсүнүгэр олорор кэргэннии Людмила, Николай Бурцевтар быйыл сэттис сылларын улууска «Ыллаа-туой, баян» куонкуруһу тэрийэн ыыттылар. Сыллата кыттааччыта элбээн, тэрээһинэ тупсан иһэр куонкурус быйыл биллиилээх, баян доҕордоох, анал профессионал дьонунан дьүүллүүр сүбэлэммитэ сонун, сэргэх буолла. Ол курдук махталынан Исай Брызгалов, СР культуратын туйгуна, СР ырыа айааччыларын Союһун чилиэнэ; Николай Прокопьев, самодеятельнай композитор, СР культуратын туйгуна ааттарын ааттыыбыт.
Быйылгы куонкуруска 8 нэһилиэктэн 32 киһи кэлэн кыттыыны ылла. Куонкурус балаһыанньатын быһыытынан 2 бөлөххө хайдыһан күрэхтэстилэр.
1 бөлөххө: 18-55 диэри саастаахтар, 2 бөлөххө: 35 үөһэ саастаахтар. Куонкурус бастакы түһүмэҕэ: «Уруйдан Кыайыы 65 сыла!» сэрии кэминээҕи, кыайыыга анаммыт билиҥҥи кэм ырыалара. Иккис түһүмэх: көҥүл тема. Доҕуһуола - баян.
Дьүүллүүр сүбэ быһаарыытынан кыайыылаахтар ааттара маннык буолла.
I степеннээх лауреаттар:
Василиса Копырина (Дүпсүн), Василий Федоров (Өнөр), дуэт Василий Федоров, Петр Максимов (Өнөр), квартет «Оҕо сааһым доҕотторо (Бээди).
II степеннээх лауреаттар:
Василий Ноговицын (Дүпсүн), Октябрина Протопопова (Өнөр), дуэт Анна Федорова, Матрена Герасимова (Бороҕон).
III степеннээх лауреаттар:
АннаФедорова(Бороҕон),дуэт Анастасия Сивцева, Марфа Сивцева (Дүпсүн).
I степеннээх дипломан:
СветланаАлексеева (Дүпсүн),
II степеннээх дипломан:
Егор Афанасьев (Дүпсүн),
III степеннээх дипломан:
Захар Шергин (Дүпсүн) уонна Николай Бурцев (Чараҥ).
Гран-при хаһаайынынан Курбуһахтан эр дьон ансаамбыла кыайыы өрөгөйүн билэн, үөрүү көтөллөөх айаннаата.
«Ыллаа-туой баян» куонкурус сыл аайы Дүпсүҥҥэ ыытыллар. Куонкурус тэриллиэҕиттэн 249 киһи кытынна. Мантан да көстөрүнэн баянынан ыллааччы сыллата элбээн, куонкурус баян доҕуһуоллаах ырыа ылланарын көҕүлүүр сыала-соруга ситиһиилэнэн иһэриттэн киһи үөрэр-долгуйар.
Людмилалаах Николай иккиэн сахалыы сэмэй сиэрдээх, үлэһит үтүөтэ дьон, ханнык да тэрээһин кинилэрэ суох ыытыллыбат, куруук баян доҕуһуоллаах, сахалыы саймаархай ырыаларынан бар дьоннорун абылыыллар.
Биһиэхэ урут фонограмманы эрэ өрө тутан ыччат ыллыыр эбит буоллаҕына, билигин тыыннаах баян доҕуһуолунан ыллыыр-туойар идэлэммитэ үөрүүлээх. Людмилалаах Николай бэйэлэрэ ырыа куттаах дьон, урукку ырыалар ылламмат буолан иһэллэр, баянынан ыллааһын хаалаары гынна, нэһилиэкпитигэр баянистары, мелодистары аҕалан, баянынан ырыаны көҕүлүүр сыаллаах концертары тэрийэн, дьон-сэргэ баяны атарыхсыппакка тыыннаах доҕуһуолунан ыллыыр-туойар ордугун сыаналыы үэрэнэр диэн сыаллаах турунан туран үлэлииллэр. Маҥнай оҕолор соччо аахайбат этилэр, сыыйа кыттааччы элбээн иһиитэ, ыччат баяны биһириир, билинэр буолбута үрдээбититтэн куонкурус сыала-соруга ситиһилиннэ.
Людмила, Николай Бурцевтар куонкуруһунан эрэ уоскуйбакка сайынын оскуола оҕолоругар баян ырыаны пропагандалыыр сыаллаах, оҕолору сценаҕа тахсарга үөрэтэр, Дүпсүн оскуолатын иһинэн «Күнчээн» лааҕыры үлзлэтэллэр. Сылын аайы 30 оҕо сөбүлээн дьарыктанар. Кэнники бу оҕолортон биллиилэх мелодистар, артыыстар үүнэн тахсыахтара диэн сэмээр кэтэһэбит. Бурцевтар ыытар куонкурустарыгар маҥнайгынан өйөөбүт оччотооҕу кулууп директорыгар У.И.Босиковаҕа, спонсордарыгар, нэһилиэк баһылыгар Д.М.Свешниковка, нэһилиэк бары тэрилтэлэригэр, улуус социальнай харалтатыгар (Бурнашева А.П.), ГУП ЖКХ (Копырин П.Т.), тыа хаһаайыстыбатын управлениетыгар (Атласова Н.П.) махтаналлар. «Бырайыакпыт өссө сайдар кыахха киирдэ, онон аны республиканскай таһымнаах оҥоруохпутун баҕарабыт» -диэн сэмэйдик, үлэ дьоно баҕа санааларын билинэллэр. Баянынан доҕуһуоллаах сахалыы саймаархай ырыа барахсан дириҥ иэйиилээх кистэлэҥ күүһэ санааҕытын кынаттаатын, сүргэҕитин көтөхтүн, инникини сырдаттын. Уһуга көстүбэт, муҥура биллибэт күлүмнэс иэйиигэ ыҥыра, угуйа турдун!
Дүпсүн сиригэр төрүттэммит «Ыллаа-туой баян» ырыа куонкуруһа аны республикабыт ырыа куттаах бар дьонун абылыырыгар Людмила, Николай Бурцевтар үлэлэһиэхтэрэ уонна саха дьонун кутун тутар, түмэр түһүлгэлээх киэҥ эйгэлэниэхтэрэ диэн эрэнэ кэтэһэбит.
Агафья СИВЦЕВА, Россия журналистарын Союһун чилиэнэ
Дүпсүн, Уус Алдан
«Киин куорат» хаһыат, 2010 с., тохсунньу 28 күнэ, 4 №
« Төттөрү