Саха маанылаах ырыаһыттара

Атыттар миигин бырастыы гынныннар - маннык истиҥ-иһирэх майгыга ыытыллыбыт ырыа киэһэлэригэр өссө сылдьа илик этим.

 

Тус бэйэм «Иэйэр кут тыыннаах дьүрүскэнэ», «Ырыа ыал – Дьөгүөрэптэр» киэһэлэригэр сырыттым. Ол тухары саала толору, бастакы да киэһэҕэ оннук эбит.

 

Тыыннаах дьүрүскэн киэһэтигэр «Чороон», «Айтал», «Тоҕус» уонна бу сайын Аскалон Павлов тэрийбит «Одун» бөлөхтөр ырыаларын-тойуктарын, дирбиэннэрин-дарбааннарын астына-дуоһуйа иһиттибит-көрдүбүт.

 

Егоровтар урукку ырыаларын үксүн ыллаан дьону-сэргэни үөртүлэр. Айталлары истибэтэх-көрбөтөх да ыраатта. Сунтаар курдук сиртэн анаан-минээн Сиэн Тиитэп кэлэн куруук да буоларын курдук бэртээхэй аккомпаменнарынан Айталлар уратыларын иһитиннэрдилэр-көрдөрдүлэр.

 

Өркөн Егоров «Тоҕус» бөлөҕүн уолаттара бары да биллэр уолаттар. Өркөн, Харысхан, Герман Барахов, Михаил Борисов, Афанасий Попов. Уолаттар олус ис-киирбэхтэр. Уһулуччу вокал, бэртээхэй аккомпанемент – барыта баар.

 

Аскалон Павлов «Одун» бөлөххө бары бэркэ билэр дьоммутун муспут. Иннокентий Готовцев, Василий Слепцов, Герман Степанов, Алексей Абрамов буолан баалларын биллэрдилэр. Бары да колоритнай уолаттар

 

Екатерина уонна Алексей Айталлары, Тоҕустары кытта ыллаабыттара интэриэһинэй этэ.

 

Бэҕэһээҥҥи «Ырыа ыал – Дьөгүөрэптэр» киэһэ ураты истиҥ-иһирэх, сороҕор наһаа долгутуулаах быһыыга-майгыга ааста.

 

Екатериналаах Алексей дьоҥҥо-сэргэҕэ саҥа ырыаларын бэлэхтээтилэр. Уолаттара Өркөннөөх Харысхан төрөппүттэрэ эдэр сылдьан ыллаабыт «Маҥнайгы таптал», «Ыллаатыҥ эн намыын ырыаны» ырыаларын аныгылыы көрүүлээх толорбуттара олус интэриэһинэй буолла. Александра Алексеева Өркөннүүн Этигэн Хомуска кыттыбыт «Туоххаһыйыы тойуга» ырыаларын истэн-көрөн дуоһуйдубут. Александра Алексеева бэйэтин курдук нарын-намчы кыыһынаан Күннэйдиин Егоровтар «Көмүс түгэн» ырыаларын олус бэркэ тиэртилэр. Аны туран үс бииргэ төрөөбүт кыргыттар – Екатерина Егорова, Антонина Винокурова, Александра Алексеева «Дьоллоохпун» диэн ырыаны ийэлэригэр Мария Алексеевнаҕа анаабыттара дьоро киэһэ биир долгутуулаах түгэнинэн буолбута. Манна даҕатан эттэххэ, ортоку кыыс Антонина Борисовна төһө да үрдүк дуоһунастаах чиновник буоллар эмиэ бэрт ис-киирбэхтик ыллыыр эбит.

 

Дьоро киэһэлэри светодиоднай экран олус киэргэттэ. Хас биирдии ырыа ис хоһоонугар дьүөрэлээн сөптөөх хаартыскалар уонна видео таҥыллыбыт. Видео-дизайнер Наталья Лопатина уонна видео-инженер Яков Александров дьэ улахан үлэ ыыппыттар.

 

Ол курдук, Алексей Егоров «Туруйа кут» ырыатын толороругар ырыа ылланарын устата экраҥҥа «Журавли над Ильменем» киинэ кадрдарын көрөн уйулҕабыт хамсаата. Биир бэйэм хараҕым уутун туттумматым…

 

Егоровтар дьиэ-кэргэнинэн кэнсиэрдэрин биир саамай истиҥ-иһирэх, долгутуулаах түгэнинэн үс кыыс ийэлэригэр анаан ырыа ыллаабыттарын кэнниттэн, Екатерина уонна Алексей саалаҕа олорор ийэлэрэ Мария Алексеевна уонна Мария Мироновна эҕэрдэтэ буолбута. Мария Алексеевна саалаттан баян доҕуһуоллаах «Хаар сылааһа» диэн күтүөтэ Алексей Егоров матыыбыгар, Наталья Харлампьева тылларыгар ырыаны туох да олус ис-киирбэхтик толорон, саалаҕа олорооччулар куттарын тутта, сүрэхтэрин сүүйдэ, махталларын ылла.

 

Үс күннээх Ырыа дьоро киэһэлэригэр эрдэттэн биллэриллибит бөлөхтөр, ырыаһыттар бары кытыннылар. Сайсары Куо, Гаврил Николаев, «Норд-Саунд» бөлөх, «Туймаада» ансаамбыл, «Толбон» ырыа бөлөҕө Алексей Егоров урукку да, саҥа да ырыаларын толорон сэргэхситтилэр. Манна бэлиэтээн эттэххэ, «Толбон» Островскай аатынан мөлтөхтүк көрөр дьон кулууптарын иһинэн тэриллэн үлэлиир ырыа бөлөҕө Алексей Егоров баяҥҥа доҕуһуолунан юбиляр «Мин дойдум» уонна Уххан тылларыгар «Дабайдар дабайан иһиэҕиҥ» диэн ырыаларын ис дууһаттан толорон истээччини долгутта, үөртэ. Толбоннор «Мин дойдум» ырыанан соторутааҕыта Москва куоракка норуоттар икки ардыларынааҕы улахан бэстибээлгэ кыттан Гран-при хаһаайынынан буолбуттар.

 

Дьэ, сити курдук Егоровтар дьиэ-кэргэн өрөгөйдөөх үбүлүөйдээх киэһэлэрэ түмүктэннилэр. Ол эрэн сахабыт эстрадатын далбар хотуна Екатерина Борисовна уонна туллар тутааҕа Алексей Васильевич Егоровтар билигин олохторун орто эрэ омурҕаныгар сылдьаллар, инникитин да ыллыы-туойа, айа-тута сылдьыахтара буоллаҕа. Кинилэр саха дьонун таптыыр, ытыктыыр ырыаһыттара, норуот баайа, киэн туттуута буолаллар диэтэхпинэ мэлдьэх буолбатах.

 

Саха норуота уһун кэмҥэ таптаан истэр ырыаһыттара буолуҥ диэн алҕыыбыт.

 

Өссө да эһиги хаарга сардаана үүннэрэр күүстээх ырыаҕыт үөрдэ, ытата, дууһабытын ырыанан аймыы туруохтун!

СИНИЛЬГА
2008 с., сэтинньи 30 күнэ