Кини аатын үйэтитии биһиги ытык иэспит
22 июля 2008, 23:02.
2008 сыл сэтинньи 23 күнүгэр биһиги биир дойдулаахпыт Российскай Федерация уонна Саха АССР культуратын үтүөлээх үлэһитэ, Саха Республикатын үөрэҕириитин туйгуна, айылҕа харыстабылын туйгуна, "Саха-Азия оҕолоро" норуоттар икки ардыларынааҕы фонда стипендиата, талааннаах ырыаһыт, мелодист, композитор, Амма улууһун бочуоттаах гражданина, үгүс мэтээллэр кавалердара Ольга Иванова-Сидоркевич, баара буоллар, 75 сааһын туолуо этэ. Бу үбүлүөйдээх сылга биһиги улууспутугар туох тэрээһиннэр ыытыллыбыттарын уонна ыытыллыахтаахтарын туһунан улуу ырыаһыппыт сүгүрүйээччилэригэр хаһыат нөҥүө иһитиннэриэхпитин баҕарабыт.
Ырыа-тойук куттаах аммалар үтүөкэннээх үгэстэрэ дириҥник иҥэн, силис-мутук тардан үрүҥ күҥҥэ тардыстар, өлбөт-сүппэт өйдөбүлү хаалларар. Кини сырдык аатын үйэтитиигэ Саха Республикатын Правительствотын анал дьаһала тахсан турар. Ольга Иванова-Сидоркевич үбүлүөйүн тэрээһиннээхтик ыытарга анал хамыыһыйа тэриллэн үлэлии сылдьар. Хамыыһыйа бэрэссэдээтэлинэн улуус баһылыга Александр Артемьев, бэрэссэдээтэли солбуйааччынан Прасковья Емельянова буолаллар.
2007 сыл алтынньытыгар улуустааҕы Оҕо айымньытын дьиэтигэр Ольга Иванова-Сидоркевич аата иҥэриллибитэ. Итиэннэ сотору Оҕо айымньытын дьиэтин таһыгар кини бронзаттан кутуллубут бюһа туруохтаах. Онон соҕуруу дойдулар курдук, сквер тутан Амма сиригэр-уотугар үктэммит кэлии дьон манна сылдьан сибэкки дьөрбөтүн уурар ытык сирдэрэ буолуоҕа . Ааспыт сыл ахсынньытыгар Федор Потапов аатынан улуустааҕы культура киинигэр "Ырыам миэнэ — сырдык ырыам" ырыанньык сүрэхтэниитин дьоро киэһэтэ буолан ааспыта. Ол дьоро киэһэ көрөөччүлэрэ Ольга Петровна аҥардас норуокка биллибит ырыаларынан эрэ буолбакка, ылламматах ырыаларын эмиэ истибиттэрэ, сэргээбиттэрэ. Ырыанньык тахсарыгар биһиги биир дойдулаахтарбыт Светлана уонна Егор Неустроевтар төһүү күүс буоллулар. Кини айан хаалларбыт киһи кутун тутар, дууһатын ыллатар, сырдык ыратын этэр үйэлээх ырыалара бу аҕыс түһүмэхтэн турар хомуурунньукка күн сирин көрбүттэрэ. Ольга Петровна баарыгар ырыаларын компакт-дискэтэ, "Олоҕум чэчирдэрэ" диэн кинигэтэ тахсыбыта.
Бу кинигэни кини төрөөбүтэ 70 сааһыгар Саха Респкбликатын культуратын үтүөлээх үлэһитэ, журналистикаҕа Государственнай бириэмийэ лауреата Прокопий Караканов бэчээккэ бэлэмнээн таһаартарбыта. Кинигэҕэ "Амма чэчирэ" ансамбль тэриллибитин, аан дойду таһымыгар тахсыытын, Амма өрүһү көмүскүүр Хотуйа экологическай паркатын туһунан киэҥник ахтыллыбыта. 2006 сыллаахха от ыйын бүтүүтүгэр саха радиотыгар Владимир Корякин-Индигирскэй музыкальнай салоҥҥа Ольга Иванова-Сидоркевич туһунан икки төгүл төхтөрүйэн кэпсээбитэ. "Амма олоҕо" хаһыакка Абаҕаттан Мария Захарова "Оҕо сааһым сып-сырдык өйдөбүлэ", Мария Слепцова "Учууталбыт барахсан сырдык кэриэһигэр", Дарья Дьячковская "Өйтөн-сүрэхтэн сүппэт түгэннэри бэлэхтээбит күндү киһибит", Алена Окорокова "Сүдү талааннаах уґуйааччыга үөрэммиппиттэн дьоллоох киһинэн ааҕынабын" уо.д.а ахтыылар бэчээттэммиттэрэ.
Бүгүн биһиги, аммалар, киэн туттар, ытыктыыр киһибит Ольга Иванова-Сидоркевич айбыт уостан түспэт ырыаларын бар дьоҥҥо тэнитэр, сайыннарар ытык аналлаахпыт. Өйүүн, бэс ыйын 20-21 күннэригэр, Амма улууһугар "Иһит ыллыыр ырыабын" диэн Ольга Иванова-Сидоркевич төрөөбүтэ 75 сылыгар аналлаах сахалыы ырыа республикатааҕы бастакы куонкуруһа саҕаланар. Ырыа куонкуруһун гран-при хаһаайыныгар 75 тыһ.солк. суумалаах бириэмийэ туттарыллыаҕа.
Вера ИВАНОВА
Амма
«Ырыа кырдала» саайт эбии информацията.
"Иһит ыллыыр ырыабын" диэн бэс ыйын 20-21 күннэригэр Амма улууһугар Ольга Иванова-Сидоркевич төрөөбүтэ 75 сылыгар аналлаах сахалыы ырыа республикатааҕы бастакы куонкуруһун гран-при хаһаайынынан Амма улууһун «Нарыйаана» вокальнай бөлөҕө буолла. Бу бөлөх 75 тыһ.солк. суумалаах бириэмийэнэн наҕараадаламмыта.
Хаартыска "Эдэр саас" хаһыат саайтыттан ылылынна
« Төттөрү