Үчүгэй ырыа долгутар, үөрдэр…
 (голосов: 3)
Виталий Андросов «Дьиэрэй, ырыам» кэнсиэрим кэнниттэн санаалар.

Соторутааҕыта Суорун Омоллоон аатынан Опера уонна балет театыгар самодеятельнай композитор Виталий Андросов 60 сааһыгар аналлаах «Дьиэрэй, ырыам» диэн үбүлүөйдээх кэнсиэр буолла. Саала иһэ тобус-толору, сорохтор өссө туран эрэ көрдүлэр.

Виталий Тимофеевич поэт Иван Федосеев-Доосо тыыннааҕар биэс хоһоонугар матыып айбыта.
Бу дьоро киэһэгэ кини «Туундара» диэн ырыатын араас толорууга иһиттибит. «Туундара» хас толоруу аайы дьүкээбил араас өҥүнэн оонньоон, көрөөччүнү барытын улаханнык астыннарда. «Туундараны» толорууга мин ордук чорботон Саха сирин ИДьМ ансамблын бэлиэтиэм этэ. Бу үчүгэйин, ыллыыллара! Полиция үлэһиттэрин күнүгэр Москва телевидениетинэн көстүбүт улахан кэнсиэргэ кыттыбыт дьону илэ бэйэлэрин тутан олорон көрдүбүт, иһиттибит.
Бу дьоро киэһэҕэ ырыалары барытын саха эстрадатын чаҕылхай сулустара толороннор, ырыапар иккис тыыннаннылар диэн олус үөрдүм. СР үтүөлээх артыыһа Анатолий Бурнашев «Мин алаас уолабын, сахабын» диэн ырыаны, санаабар, хаһааҥнытааҕар да иэйиилээхтик, истиҥник, кылыһахтаах дьиҥ сахалыы кэрэ-чуор куолаһынан ыллаата.
Алаас арылы кустугун кэрэтин, отун-маһын, оһуорун-мандарын, илэ хараҕынан көрбөтөх эрээри, сүрэҕинэн сэрэйэр, билэр 10 саастаах уолчааны Рома Винокуровы Виталий Тимофеевич бэйэтэ сиэтэн киллэрэн, баяҥҥа доҕуһуоллаан, «Алааһым арылы кустугун» ыллатан, саха дьонун олус долгутта. Бу оҕо Мэҥэ-Хаҥаластан сылдьар. Ити кэнниттэн «Алааһым арылы кустуга» ырыаны, санаабар, киэҥ-нэлэмэн алааһым барахсан устун хааман долгулдьутан кэлэн, СР үтүөлээх артыыската Анастасия Готовцева ыллаан доллоһутта. Бу куолаһа киэҥин-куоҥун, ырааһын! Бука, манна олорооччулар бары даҕаны улааппыт, киһи буолбут, оонньообут-көрүлээбит алааспытын санаатахпыт буолуо... Бу ырыа дьиҥнээх сахалыы ис куттаах буоларын дириҥник арыйан, Анастасия Готовцева өссө төгүл итэҕэттэ.
«Алааһым арылы кустуга» ырыаны, Баскаровтан саҕалаан, элбэх ырыаһыт толорбута. Манна таарыччы этэн аһардахпына, норуот эмчитэ, медицина доктора Владимир Алексеевич Кондаков эмиэ бу театрга айар киэһэтигэр бу ырыаны толорбутугар махтаммыппар: «Бу ырыа тылын-өһүн, матыыбын ис сүрэхпиттэн ылынан, олус сөбүлээн ыллыыбын», - диэбитэ.
«Дьокуускай куоратым» диэн ырыа матыыбын Виталий Андросов 25 сыл анараа өттүгэр айбыт, ол гынан баран, ырыаны кимиэхэ да биэрэн ыллаппатах. Оттон билигин, бу ырыаны аан бастакынан Сиэйэ Уола толоруоҕа, диэн биллэрдэ. Ырыаны Сиэйэ Уолун толоруутугар истэн баран, дьэ, ырыа бэйэтин толорооччутун булбут, дии санаатым.
Виталий Тимофеевич: «Аҕа табаарыһым, сүгүрүйэр поэтым Иван Федосеев-Доосо - Уйбаан Дьөгүөрэбис манна биһиги кэккэбитигэр суох да буоллар, бу саалаҕа кини кэргэнэ баар», - диэн сибэкки дьөрбөтүн туттаран, олус долгутта. Бу киэһэ биһиги аҕабыт, эһэбит, хос эһэбит аата кэнсиэр саҕаланыаҕыттан бүтүөр диэри ааттанна, биһигини үөртэ-долгутта.
Кэрэ кэнсиэртэн, истиҥ-иһирэх көрсүһүүттэн дууһам сылаанньыйан, дуоһуйан-астынан, Уйбааным аатын ырыаларынан ааттата сылдьар доҕотторбутугар Октябрина Ильинична, Виталий Тимофеевич Андросовтарга ийэлии истиҥ иэйиибин, махталбын, сүгүрүйүүбүн биллэрэбин. Оҕолорум, сиэннэрим, хос сиэним аатыттан Эһиэхэ, күндү доҕотторум, эһиги дьиэ кэргэҥҥэ дьоһун доруобуйаны, уһун дьоллоох олоҕу, сырдык сыдьаайы баҕарабын!
Дьон-сэргэ, көрөөччү барыта Виталий Андросов «Дьиэрэй, ырыам» үбүлүөйдээх кэнсиэрэ олус истиҥник-иһирэхтик, үрдүк таһымҥа барбытыттан ис-сүрэҕиттэн долгуйа үөрдэ.

Степанида ФЕДОСЕЕВА

Дьокуускай к., 2012 сыл
«Саха Сирэ» хаһыат олунньу 21 күнүнээҕи нүөмэриттэн ылылынна
Нөрүөн-нөргүй буоллун биһиги саайтпыт ыалдьытыгар! Билигин эн ыалдьыт курдук киирдин. Бэлиэтэнэн киирдэххинэ бу сиртэн элбэҕи бэйэҕэр туһаныаххын сөп.
Майгынныыр сонуннар:

« Төттөрү
Ырытыылар (0)
 

Ырытыыга кыттабын




 

Сайт зарегистрирован в Федеральном Агентстве
по информационным технологиям
Свидетельство №11945 от 6 мая 2008 года

Автор проекта - Синильга
сайт открыт 17 августа 2007 © Ырыа кырдала
Условия использования материалов, размещенных
на сайте «Ырыа кырдала»

Доступ к сайту бесплатен для пользователей
Экспресс-Сеть, Гелиос-ТВ, ЯГУ, Наука, Оптилинк, Сахаспринт и для сетей ADSL и "Столица".