«Айархаан» саҥа ситиһиитэ
 (голосов: 0)
Биһиэхэ редакцияҕа «Айархаан» бөлөх ыалдьыттаан, айар үлэлэрин уонна үс нэдиэлэлээх гастрольга сырыыларын, улахан тэрээһиҥҥэ кыттыыны ылбыттарын туһунан кэпсээтилэр.
Ол курдук бөлөх салайааччыта, СР культуратын үтүөлээх үлэһитэ, аан дойду виртуоз-хомусчута Альбина Дегтярева уонна кини үөрэнээччилэрэ, СР Государственнай эстрада театрын артыыстара Алиса Саввинова, Нарыйаана Ренанто алтынньы ыйга Москваҕа «Көмүс күһүн» Бүтүн Россиятааҕы тыа хаһаайыстыбатын быыстапкатын культурнай программатыгар кыттыбыттар. Салгыы Великобритания киин куоратыгар Лондоҥҥа көппүттэр.
Манна кинилэр СОАС диэн Африка, Азия норуоттарын этномузыкаларын чинчийэр университет профессора Кит Ховард ыҥырыытынан ыалдьыттаабыттар. Бруней султанын галереятыгар 400 көрөөччү киирэр саалатыгар концертаабыттар. «Орто дойду оҥоһуллуута», «Кудай Бахсы», «Дьөһөгөй», «Түстэнии» композициялары көрдөрбүттэр. Итиэннэ университет студиятыгар уһулланнар, ол толорууларын университет Англия библиотекаларыгар тарҕатар былааннаах. Ону сэргэ студеннары кытары көрсүбүттэр, лекцияҕа сылдьыбыттар. Концерка Саха сириттэн төрүттээх биир дойдулаахтарбыт кэлэн, хомус алыптаах дьүрүскэнигэр уйдаран, дойдуларын ахтылҕанын таһаарбыттар. «Айархааннар» сахалар бэрт ситиһиилээхтик үлэлии сылдьалларын бэлиэтииллэр. Михаил Мальцев биһиги хомусчуттарбыт Лондоҥҥа тиийдэхтэринэ мэлдьи истиҥник көрсөн арыаллыырын махтана бэлиэтииллэр. Бу иннинэ кинилэр атырдьах ыйыгар ВВС тэрийиитинэн Альберт-холлга баран кыттыбыттара.
Биир күн саха хомусчуттара Рассел-сквер диэн англичаннар тоҕуоруһар улахан болуоссаттарыгар концертаабыттар. Ханна да сырыттахтарына, саха кэрэ куоларын оонньуур маастарыстыбалара уһулуччулааҕын, хаһан да маннык толорууну истибэтэхтэрин, хайдах баччааҥҥа диэри бу туһунан билбэккэ олорбуппутуй диэн омук дьоно сөҕөллөр-махтайаллар эбит. Бу да сырыыга сахалары батыһа сылдьан ыраах Саха сирин туһунан билэр санаалара күүһүрбүт. Кырдьык, «айархааннар» тас сэбэрэлэринэн Олоҥхо дойдутун Туйаарымалара буолалларын тупсаҕай көстүүмнэрэ ситэрэн биэрэр. Хомусчут кыргыттар уобарастарын Саха театрын худуоһунньуга Сардаана Федотовалыын, Эстрада театрын модельера Андрей Зыковтыын толкуйдаабыттар. Оттон сиэдэрэй үрүҥ көмүс симэхтэри омуктар мөлүйүөнүнэн суумалаах, хаама сылдьар сыаналаах музей курдук көрөллөр эбит.
Бөлөх эдэр артыыстара Алисалаах Нарыйаана Лондон интернациональнай куорат буоларын уонна Москваҕа холоотоххо олох аа-дьуо тэтимнээҕин, дьон ыксаабакка бэрт холкутук сылдьалларын бэлиэтии көрбүттэр. Кэлэр сылга Олимпиада буоларынан тутуу бөҕөтө ыытыллара, бэл диэтэххэ, былыргы куорат дьиэлэригэр 16-17 үйэлэрдээҕи канализация тиһигин төрдүттэн уларыта сылдьаллара, хас хардыы ахсын турбалар кыстаммыттара кэлии киһи хараҕар хатанар.
«Айархаан» бөлөҕү аан дойдуга аар-саарга аатырбыт «Роллинг стоунз» бөлөх продюсера Виктор Копперсмит музыкальнай студияҕа ыҥыран, Гана, Кытай музыканнарын кытары көрүһүннэрбит, ХНТ саҥа бырайыагар бастакы сессияны ыытан холбоһуктаах оонньууга холонон көрбүттэр. Бу студияҕа Стинг, Питер Габриэл, Бьорк курдук биллиилээх музыканнар хит альбомнара күн сирин көрбүттэрэ.
Салгыы Саха сирин виртуозтара Данияҕа Копенгаген куоракка WOMEX аан дойдутааҕы музыкальнай быыстапкаҕа кытта барбыттар. Манна 100-кэ государствоттан 2250 делегат, сүрүннээн продюсердар форумҥа түмсүбүттэр. Быыстапка буолбут дьиэтэ аан дойду биир улахан концертыыр саалата, тэҥинэн түөрт сценаҕа концерт буолар кыахтаах. Тупсаҕай аныгылыы оҥоһуулаах буолан тыас-уус мэһэйдэспэт. Россияттан быйылгы форумҥа «Айархаан» эрэ кыттыбыт. Биһиги хомусчуттарбыт 1 тыһ. көрөөччүлээх саалаҕа оонньообуттар. Тэрийээччилэр этэллэринэн, сүрүннээн продюсердар концертары киирэ-тахса, хаама сылдьан истэр үгэстээхтэр. «Айархаан» 45 мүн. толоруутун форум кыттыылаахтара иһийэн истибиттэр. Түмүккэ тыһыынча көрөөччү сахаларга туран эрэ «бис» таһыммыттар, эбии көрдөһөн оонньоппуттар. Концерт бүппүтүн да кэнниттэн тарҕаспакка, холлга тахсан элбэх киһи тулалаан билсибит. Сахалар кэннилэриттэн сценаҕа азербайджанецтар эмиэ 45 мүн. концертаабыттарын тухары, биһиэннэрэ кинилэр толорууларын көрүөхтэрин баҕарбыттарын иһин, саҥа «сүгүрүйээччилэрэ» ыыппакка сибээс олохтообуттар, араас дойдулартан элбэх этии киирбит.
Ити курдук WOMEX түһүлгэ биһиги хомусчуттарбытыгар аан дойду музыкальнай олимпыгар ааны тэлэччи арыйда. «Айархааннар» ситиһиилээх айаннарыгар күүс-көмө буолбут СР Культураҕа, духуобунай сайдыыга министерствотыгар, Эстрада театрыгар, Тыа хаһаайыстыбатын министерствотыгар махтаналлар.
Быйыл аан бастаан республикаҕа сэтинньи 30 күнүгэр Хомус күнэ олохтонор. Саҥа бырааһынньыгы «Айархаан» бөлөх чахчы да өрө көтөҕүллүүлээх көрсөр, айар үлэлэрэ саҥа үрдэлгэ тахсар.

Саргылаана Данилова
sakhasire.ykt.ru саайтан ылылынна

Хаартыска 1sn.ru саайтан ылылынна
Нөрүөн-нөргүй буоллун биһиги саайтпыт ыалдьытыгар! Билигин эн ыалдьыт курдук киирдин. Бэлиэтэнэн киирдэххинэ бу сиртэн элбэҕи бэйэҕэр туһаныаххын сөп.
Майгынныыр сонуннар:

« Төттөрү
Ырытыылар (1)
 
Антонина1   8 января 2012 03:21
Кинилэр сахалары теье эрэ кыыллытан, туьэрэн кердердулэр. Каменнай уйе5е эрэ сылдьар омуктар кыылы утуктэн дьиикэйдэнэллэрин саха гиэнэ диэн кердерееччулэр. Биьиги культурабытын дьингнээ5ин кердерер дьон дьингинэн бааллар этэ - Ким Борисов, Спиридон Шишигин эгин курдуктар.

Ырытыыга кыттабын




 

Сайт зарегистрирован в Федеральном Агентстве
по информационным технологиям
Свидетельство №11945 от 6 мая 2008 года

Автор проекта - Синильга
сайт открыт 17 августа 2007 © Ырыа кырдала
Условия использования материалов, размещенных
на сайте «Ырыа кырдала»

Доступ к сайту бесплатен для пользователей
Экспресс-Сеть, Гелиос-ТВ, ЯГУ, Наука, Оптилинк, Сахаспринт и для сетей ADSL и "Столица".