Үлэһит

Ханнык да эйгэҕэ буоларын курдук, билигин ырыаҕа-тойукка эмиэ үлэһит, киирэр-тахсар дьон ситиһиилэнэр кэмнэрэ кэллэ. Билигин саамай биллэр-көстөр ырыаһыттары  ылан көрүҥ эрэ – букатын тииҥ курдук үлэлииллэр. Ол иһин кинилэр ааттарын, айымньыларын киһи барыта билэр. Мин санаабар, биир оннук туруу үлэһит киһи – Мирослав Егоров. Аҥаардас үлэһит эрэ буолбатах – үлэтигэр, идэтигэр олус ытыктабыллаахтык, эппиэтинэстээхтик сыһыаннаһар.

Ордук саастаах дьон кини урукку ырыалары ыллыырын сөбүлүүллэр быһыылаах. Биэс сыллааҕыта Улуу Кыайыы 60 сылыгар анаан сэрии саҕанааҕы ырыаларынан кэнсиэр тэрийбитэ. Ытыс үрдугэр түһэрбиттэрэ.

Ол эрээри Мирослав аҥаардас манан эрэ муҥурдаммат. Кини рок-н-ролл, рэп, рок да хайысхалаах ырыалары айыан, сороҕор сахалыы дэгэрэҥнэтэн да ылыан сөп. Дэгэрэҥи ылар буоллахха, Тумус Мэхээлэ тылыгар суруйбут «Оһуор ойуу айылҕа» ырыатын Саарын ыллаан биһирэппитэ. «Үҥкүү этэр саха кыыһа» (Ст. Дадаскинов тылыгар), «Мин алаас уолабын» (саха тылыгар үөрэппит учуутала Михаил Скрябин хоһоонугар) – аныгы дэгэрэҥ сонун айымньылара. Өссө аатырбыт хомусчут Спиридон Шишигин хоһоонугар «Хомус ырыата» баар.

Тэлэбиисэргэ сонуннары кэпсиир Максим Березин толоруутугар «Мохсоҕоллор» ырыаны ханнык баҕарар рок хайысхалаах бөлөх оонньуон сөп. Куонаан Ноговицын «Хомус» бөлөҕү кытары «Эйигин булуом» («Тоҕо маннык бу олоххо буоларый…») ырыаны ыллаан, элбэх ыччаты үҥкүүлэппит буолуохтаах.

Хайысха

Быһата, Мирослав Егоров – универсал.

— Аҥаардас биир хайысхаҕа “топпоппун”, тыыным-быарым хаайтарар. Туохха эрэ кыыһыра сылдьар киһилии, мэлдьи рэп аахпаккын, эбэтэр өрүү эдэр буолбаккын. Сахалыы тыыммын уһугуннаран, дьоҥҥо бэлэхтиэхпин, үөрүүнү-көтүүнү бэлэхтээн, тапталы туойан поп-ырыалары ыллыахпын эмиэ баҕарабын, — диир.

Ити, кини этэринэн, ханнык баҕарар көрөөччүгэ (эдэриттэн, орто саастааҕыттан, кырдьаҕаһыттан тутулуга суох) сөп түбэһии ньымата эбит.

Уһуйуу

Мирослав саха эстрадатын төрүттэспит Юрий Платоновка үөрэммитэ. Чуолаан, эҕирийэр салгыны сатаан аттарыы, куолаһы айылҕа биэрбин үстүрүмүөнүн быһыытынан сөпкө туһаныы – ырыаһыт эрэ барыта ситиспэт кирбиитэ. Кини Мирослав бу өттүнэн маастарыстыбата үрдүүрүгэр быһаччы өҥөлөөх. «Ырыаһыттар Юрий Егорович көмөтүнэн ыллыыр ньыманы баһылаат да, туспа баран хаалаллар», — диэн хомойбуттуу этэр.

Кини өссө байааннаах ырыаһыт Сергей Петрович Поповтуун ыкса алтыһар. Сиэрдээх кириитикэтин истэн, тылын-өһүн чочуйарыгар көмөлөһүннэрэр.

Мирослав бэйэтэ эмиэ ыччаты уһуйар – Эстрада тыйаатырын иһинэн Ю.Платонов салайар айар мастарыскыайыгар үлэлиир. Сүнньүнэн, кырыымчык үптээх-харчылаах устудьуон оҕолор доҕуһуолларын оҥорор, ырыаларын талалларыгар көмөлөһөр. «Лэгэнтэйдээх Сиэйэ Уолун, бэл, пластикаҕа эрчийбиттээҕим», — диир. Кырдьык даҕаны, ыллыы сылдьан хайдах имигэстик хамсанарын өйдөөн көрбүккүт буолуо. Холобур, «Тэбэнэттээх» ырыаҕа.

Аныгы уонна урукку

Мирослав Егоров Эстрада тыйаатырыгар 11 сыл үлэлээтэ. Эдэрдэри да, «аксакаллары» да кытта алтыһар. Туораттан көрө сырыттахха, инньэ биһиги остуол аннынан хаамар эрдэхпитинэ дьон кутун туппут ырыаһыттарбыт ситэри сыаналаммат, аакка-суолга тиксэн быстыбат курдуктар. Ардыгар бэҕэһээ эрэ саҕалаабыт оҕону кытары биир кэмҥэ «үтүөлээх» буолаллар. Эбэтэр аныаха диэри бас билэр дьиэтэ-уота суох сылдьаллар.

— Биһиги кырдьаҕастарбыт – судаарыстыба эрэ туһугар үлэлээн кэлбит дьон, — диир Мирослав. — Бэйэлэрин хааччыйалларыгар сөптөөх усулуобуйа кэмигэр оҥоһуллубатах. Ол саҕана бэйэлэрэ туспа баран, кэнсиэр тэрийэр, харчы өлөрөр кыахтара суоҕа. Оттон билигин ким баҕарар туспа тэрилтэ аһан, нолуогун төлүү-төлүү үлэлиир кыах баар.

Информация эйгэтэ улаатта. Интэриниэт, тэлэбиисэр, араадьыйа, хаһыат элбэҕи туһалыыллар. Холобур, араадьыйа дьииктэрэ сахалыы сөпкө саҥарарын устан ылан баран, кэнсиэргэ туһанар тоҕо табыллыа суоҕай?

Өскөтүн, урукку ырыаһыттар үлэлэрэ хаачыстыба өттүнэн билиҥҥитээҕэр быдан ордук буоллаҕына, түмүгэ бытааннык кэлэр. Оттон билиҥҥи кэмҥэ бытааран, олорон биэрдиҥ да – хаалаҕын. Дьиҥнээх «акулалар» кураанах да сиргэ туох эрэ уратыны толкуйдаан таһаарыахтарын сөп (бэйэбин оннук дьон ахсааныгар киллэрбэппин). Ырыаҕа-тойукка сиэрдээх күрэстэһии күүһүрдэ. Ол иһин, бэл, идиэйэни кистии сылдьыахха наада курдук.

Эстрадаҕа, култуураҕа барытыгар ууларыйыы бөҕө бараары турар. Чуолаан, автономнай тэрилтэлэр диэннэр тэриллиэхтээхтэр. Онон, сарсыҥҥыны чопчу маннык буолуо диэн тэр уустук. Ол да буоллар, үлэбитин тлхтоппоппун, истээччи-көрөөччү биҺириирин, ыҥырарын тухары сыанаҕа тахса, ыллыы-туойа туруохпут.

Айар киэһэ

Быһаас, Култуура үлэһиттэрин күнүн баттаһа Саха култууратын туйгуна буолбут Мирослав ЕГОРОВ ахсынньы 17 күнүгэр Саха циркэтигэр айар киэһэтин тэрийэр. Киэһэ 5 уонна 8 чаастан кини бэйэтэ айыбыт ырыаларыттан таҥыллыбыт икки кэнсиэр буолуоҕа.

Мэхээс Сэмэнэп.