Киһи мыыммат ситиһиилэрэ
 (голосов: 0)
Киһи мыыммат ситиһиилэрэЭстрада тыйаатыра быйыл хайдах курдук элбэх ситиһиилэммитин туһунан, кырдьык да киэн тута кэпсээтилэр. Саас-сааһынан бардахха, маннык.

 

А.М. Алексеев бөлөҕөр үлэлиир Ыра Чаҕаан «Единство России» норуоттар икки ардыларынааҕы куонкурус гран-притин ылбыт, Одессаҕа «Звезда» куонкурус II истиэпэннээх лауреата буолбут, Нальчикка ыытыллыбыт «Студенческая весна» Арассыыйатааҕы куонкуруска бастаабыт, дойдутугар «Сэргэлээх көмүс куолаһа» куонкурус гран-притин эмиэ ылбыт. Онно эбии РФ Бэрэсидьиэнэ Д.А. Медведев граныгар тиксибит. Кыталы Куо – «Крымские волны» эстрада ырыатын куонкуруһугар лауреаттаабыт. Кинини манна ХИФУ доцена М.Атласова илдьэ сылдьыбыт. М.Атласова Кыталы Куо  ырыатынан уһуллубут «Сэттэ кут туруйа» клиби билигин «Патриоты России» куонкуруска кытыннара сылдьар. Юлиана Кривошапкина биһиэхэ балайда биллэр, түүр тыллаах ыччаты түмэр «Урал-Мэҥэ» куонкуруска 40-ча киһини баһыйан, I истиэпэннээх лауреат буолбут. Манна «Туруйалар» (С.Данилов тыла) уонна «Ыйдаҥа» диэн бэйэтэ айбыт ырыаларынан кыттыбыт. Урут бу куонкуруска Саарын уонна Байбал кыттыбыттаахтар.

Быһаас олус солун кэнсиэри туруорбут Василий Еремеев Хакасияҕа ыытыллар «От Ыры» куонкурус икки лауреата буолбут. Урут онно Лэгэнтэй бара сылдьыбыта.

Лэгэнтэй Эмиэрикэҕэ бара сылдьыбытын туһунан суруйан турабыт. Оннооҕу сырыы туһунан кинини сэргэ Чыскыырай кэпсээтэ. Дьоммут аҥаардас ырыанан муҥурдаммакка, киһи аймах, аан дойду олоҕор суолталаах тэрээһиннэргэ кыттыбыттар.

«Айархаан» аан дойдуну биир гына кэрийэрин туһунан эмиэ элбэхтик сырдаппыппыт. Быйыл «Women of Paradise» (Голландия), «Чайхана», «Саянское кольцо» бэстибээллэргэ «хэд-лайнер» быһыытынан сылдьыбыттар. Ол аата кинилэр ааттара-суоллара улаханын, маастарыстыбалара үрдүгүн билинэн, анаан ыҥырбыттар. Эбиитин хомуска уонна сахалыы ырыаҕа маастар-кылаастары ыыппыттар. Бу айаннарыгар кинилэри кытары Саарын сылдьыспыт. Оттон салайааччылара А.Дегтярева Голландия мусукааннарын кытары «Полярис» диэн бырайыагы толкуйдаан, эмиэ хас да сири кэрийбит. «Айархааннар» сотору Москубаҕа, Казаҥҥа, Петербурга уонна Германияҕа айаннаары сылдьаллар.

Клавдия уонна Герман Хатылаевтар кэлиҥҥи кэмҥэ оҕолору дьарыктыыллар. Кинилэр «Тэтим» бөлөхтөрө Япония Кодо оскуолатыгар үөрэммитин туһунан суруйбуппут. Оттон «Дьөһөгөй» бөлөхтөрө «Гулун» ансаамбылы кытары Турцияҕа тиийэн гран-при хаһаайына буолбут, Саха тыйаатыра «Кыыс Дэбилийэ» олоҥхотун омук дьонугар көрдөрөрүгэр доҕуһуоллаабыт.

Лариса Троева сөҕүмэр дьарыга өрүү улахан болҕомтону тардар. Кини алтынньыга Москуба аттынааҕы аэродромҥа тиийэн, биир күн иһигэр икки рекорду олохтообут. Балтараа туонна кэриҥэ ыйааһыннаах сөмөлүөтү 9 м. 60 см., ол кэннэ урут бэйэтин үрдүгэр түһэрэ сылдьыбыт бөртөлүөтүн 8 м. соспут. Ол аата, биир күн иһигэр 2 т. 393 кг ыйааһыннаах көлөнү сыҕарыппыт. Баттаҕынан. Оройун туһунан баттаҕар таҥас ыйыыр быаны өрөн баран соһор эбит. Холобур, аатырбыт Брюс Хлебников итинник хабааннаахтык соһоругар 100 кг кэриҥэ ыйааһыны илиитигэр уонна санныгар тарҕатар, сиргэ ууруллубут кирилиэскэ тирэнэр буоллаҕына, биһиги киһибит тирэнэрэ – хара буор, соһоро – баттаҕа. «Илиибинэн кыайан соһуом суоҕа этэ. Аҥаардас санаам күүһүнэн кыайабын», — диир.

Ити курдук, киһи мыыммат, ону ааһан, омук барыта киэн туттуон сөптөөх ситиһиилэрэ. Алтынньы 23 күнүгэр Эстрада судаарыстыбаннай тыйаатыра «Gala» диэн улахан кэнсиэргэ ыҥырар. Суорун Омоллоон аатынан Опера уонна балет тыйаатырыгар 5 уонна 8 ч. буолуо. Саха омук аатын аан дойдуга аатырда сылдьар дьоммутун бу киэһэ кэлэн уруйдуоҕуҥ-айхаллыаҕыҥ!

Нөрүөн-нөргүй буоллун биһиги саайтпыт ыалдьытыгар! Билигин эн ыалдьыт курдук киирдин. Бэлиэтэнэн киирдэххинэ бу сиртэн элбэҕи бэйэҕэр туһаныаххын сөп.
Майгынныыр сонуннар:

« Төттөрү
Ырытыылар (0)
 

Ырытыыга кыттабын




 

Сайт зарегистрирован в Федеральном Агентстве
по информационным технологиям
Свидетельство №11945 от 6 мая 2008 года

Автор проекта - Синильга
сайт открыт 17 августа 2007 © Ырыа кырдала
Условия использования материалов, размещенных
на сайте «Ырыа кырдала»

Доступ к сайту бесплатен для пользователей
Экспресс-Сеть, Гелиос-ТВ, ЯГУ, Наука, Оптилинк, Сахаспринт и по льготному пиринговому тарифу
для сетей ADSL и "Столица" (7 коп./1 мб).