Үтүөнү үксэтэн үгүс сыл хотуулаахтык үлэлээбит, сиэмэх фашизмы садаҕалаһан сэрии уот холоругун курдары ааспыт аарыма кырдьаҕас поэт Степан ТИМОФЕЕВКА «Саха Республикатын народнай поэта» диэн үрдүк ааты иҥэрэргэ ыҥырар суруктары, ыстатыйалары «Кыым» хаһыаттан ааҕан баран, онно бэйэбит санаабытын холбуурбутун биллэрэбит.

Степан Иванович хоһоонноругар отуттан тахса ыллам ырыа суруллан, Саха сирин үрдүнэн өссө биһиги оҕо сааспыт кэмиттэн көхтөөхтүк дуораччы ылланаллар. Оннук норуокка биһирэммит ырыаларынан буолаллар: «Эйэ, Дьол иһин», «Доҕордоһуу ырыата», «Сэрии буойуннара», «Көтөллөр ол көмүс дорҕооннор», «Сөтүө», о.д.а. Кини «Мин ийэм» хоһоонугар түөрт мелодист тус-туспа матыыбы айбыттара биллэр — ол поэт уус-уран тыла күүстээҕин, этигэнин, сүрэххэ-быарга сайан киирэр хомуһуннааҕын, куту-сүрү долгутар алыптааҕын бигэ туоһута буолуоҕа.

Ити үрдүк күүрээннээх уонна ону тэҥинэн ураты истиҥ-иһирэх тыыннаах ырыалары истэ олорон, саха народнай поэта Күннүк Уурастыырап: «Хоһоон тыла үрүҥ көмүстэн кутуллар буоллаҕына, ырыа тыла кыһыл көмүстэн кутуллар», — диэбитин, чахчы, ис сүрэххинэн ылынаҕын, итэҕэйэҕин.

Улахан поэт уйаҕас сүрэҕиттэн саҕыллыбыт ол көмүс дорҕооннор бу Орто дойдуга Эйэ, Дьол, Доҕордоһуу өрө тутуллалларын тухары, саха ырыата-тойуга баарын тухары дьону-сэргэни Кэрэҕэ, Сырдыкка угуйа, Үрүҥ холууп буолан кылбаҥныы көтө туруохтара.

Саха Республикатын ырыа айааччыларын сойууһуттан бэрэссэдээтэл Алексей Егоров, 

Саха Республикатын композитордарын сойууһуттан бэрэссэдээтэл Захар Степанов, эппиэттиир сэкикэтээр Кирилл Герасимов,

«Ырыа кырдала» саайт