Күн курдук Күннэй кыыс
 (голосов: 0)

Күн курдук Күннэй кыысКүн курдук сып-сырдык, нап-нарын Күннэй кыыс ыллаан эйээриттэҕинэ киһи эрэ иһиттэр-истэн олоруох курдук. Уля Сергучева төһө даҕаны, эдэр буоллар Саха эстрадатын сыанатыгар айбыта-туппута, ыллаабыта-туойбута номнуо 15 сыл буола охсубут. Кини дьиҥэ, мин биир саастыылааҕым, ол иһин даҕаны 15 сыл сыанаҕа үлэлээбитин иһиттэхпинэ, соһуйа да сонньуйа да саныыбын. Сорох саҥардыы эрэ ийэтин дьууппатын анныттан тахсан, бэйэтин суолун-ииһин булуна сатыы сылдьар, оттон кини номнуо туспа суоллаах-иистээх композитор, дьоҥҥо биллэр-көстөр, саха аатын ааттаппыт ырыаһыт. 

 

-Туох барыта оҕо саастан саҕаланар буоллаҕа дии, оҕо сылдьан саамай чаҕылхайдык өйдөөн хаалбыт түгэннээххин дуо?

 

-Ийэлээх аҕам иккиэн музыканнар, «Чороон» диэн бөлөххө ыллыыллар этэ. Онон куруук музыка эйгэтигэр улааппытым. Төрөппүттэрим ыллыылларын-туойалларын көрө-көрө кинилэр курдук буолуохпун баҕарар этим. Кинилэр гастролга бардахтарына, эбэлээх эһэбэр хааларым, хоспор саптан баран виниловай пластинканан София Ротару ырыаларын уһун күнү быһа истэр этим. Ардыгар дьыбааҥҥа оонньуурдарбын кэккэлэччи олордон баран ыллыыбын-туойабын, үҥкүүлүүбүн уонна бэйэбин дьиҥнээх ырыаһыт курдук сананар этим. Кэлин эбэлээх эһэбэр уонна кинилэр ыалдьыттарыгар кэнсиэр тэрийэр буолбутум. Алта саастаахпар быраатым төрөөбүтэ. Быраатым барахсан саҥа хааман саллаҥныыр буолбутун кэннэ кинини эмиэ кучуйан үҥкүүлэтэрим. Оннук сылдьан, ыллыыр ырыаларым бүтэн хаалбыттара, ол иһин айан ыллыыр буолбутум. Омуктуу ыллыыбын дии-дии сымыйанан тугу эрэ айан ыллыыр этим. Кыра оҕо ырыа айабын дии санаабат этим, көннөрү испиттэн тахсарын ыллаан иһэбин.

-Оттон сыанаҕа аан бастаан хайдах тахсыбыккыный?

 

-Бастакы кылааска үөрэнэ сырыттахпына Сергей Есенин «Белый снег» диэн хоһоонун нойосуус үөрэтэргэ сорудахтаабыттара. Ол хоһоону үөрэтэ сатыыбын да өйбөр биир даҕаны тыл хатамматаҕа. Ыксаан, хоһооммун ыллаан үөрэппитим. Хоһоону ырыа гынан ыллаабыппын аҕам алҕас истэн баран, «Наһаа үчүгэй ырыа суруйбуккун дии» - диэн хайҕаан, дэлби киһиргэтэн, сотору-сотору ырыа айан ыллыыр буолбутум.  9 сааспыттан ырыа айабын диэн өйдөбүл киирбитэ.

1995 сыллаахха «Кэскил» хаһыат оҕолорго диэн ырыа күрэҕин ыыппытыгар кыттан бастакы миэстэни ылбытым. «Михаил Светлов» теплоходунан Өлүөнэ устун  круиз сүүйбүтүм. Онно сырыттахпына интервью бөҕөтө ылбыттара, мин туспунан суруйбуттара. Ол кэннэ радиоҕа «Чэчир» диэн биэрии эмиэ оҕолорго аналлаах күрэх ыыппытыгар кыттан кыайаммын эмиэ Өлүөнэ устун круиз сүүйэн ылбытым. Ити күрэхтэргэ кыайбытым кэннэ «Түннүк» биэриилэр сэҥээрбиттэрэ, аан бастакы видеозапистарбын оҥорбуттара. Оттон улахан сыанаҕа эмиэ 1995 сыллаахха тахсыбытым. Аҕам кэпсэппитэ эбитэ дуу, эбэтэр хайдах эбитэ дуу, «Гулун» бөлөх кэнсиэригэр икки ырыаны толорбутум. Анастасия Варламова «Амсат эрэ дьэдьэҥҥиттэн» уонна «Үрүҥ көмүс хартыына» диэн бэйэм айбыт ырыабын ыллаабытым. Ол кэнсиэри ким эрэ видеоҕа уһулан бэлэхтээбит этэ, билигин даҕаны баар. Иккис ырыабын ыллаан бүппүтүм кэннэ көрөөччүлэр биһирэбиллэрин биллэрэн ыһыы-хаһыы, илиилэрин таһыныы бөҕө буолбуттарыгар уолуйан хаалан биир сиргэ өр да өр турбут эбиппин. Кэнсиэри ыытааччы миигин сыанаттан күүһүнэн сиэтэн илдьэ тахсыбыт. Ити курдук көрүдьүөстүк сүрэхтэммитим.

-Уля, эйигин дьон-сэргэ кыра эрдэххиттэн билэр. Бука бары эйигин буорга-сыыска сыстыбатах аанньал курдук көрөр буолуохтаах. Оттон оҕо буолан баран биирдэ эмэ мэниктээбитиҥ, туох эрэ буруйу оҥорбутуҥ буолуо дии?

 

-Чурапчы Мырылатыгар сайылыы сырыттахпына, убайбын кытта ханна эрэ сорудахха барбыппыт. Онно дьоммут бурдук бааһыната баар, ону олох тэпсээйэххитий диэн этэн-этэн ыыппыттара. Кыра эрдэхпиттэн олус эппиэтинэстээх буоламмын дьонум этиитин наһаа кытаанахтык ылынан кэбиспиппин. Кырдьык, бурдук бааһыната баар эбит. Убайым дэлби мэниктээн бурдугу тоҕута тэпсэн, холлороон оҥорбута.  Мин ымсыыра сатаан баран, эмиэ тэпсибитинэн киирэн барбытым. Биһиги ол бааһынаҕа төһөнү тэпсиэхпитий, наһаа өр мэниктээбэтэх буолуохтаахпыт. Ол эрэн дьонум тылларын истибэтэхпиттэн наһаа өр кэмсиммитим. Уһун сайыны быһа бурдугу тэпсибиппин дьонум билбэтиннэр диэн таҥараҕа үҥэн тахсыбытым. Ол түгэн өйбөр наһаа күүскэ хатаммыт.

-Ол аата хаһан да дьонуҥ тылыттан тахсыбат киһи буоллаҕыҥ?

 

-Кыра эрдэхпиттэн эппиэтинэс диэн тугун билэн улааппытым. Дьонум «итини гыныма, маны гыныма» дии сылдьалларын олох өйдөөбөппүн эрээри, олохпор туох буоларын барытын бэйэм эппиэтинэспэр ылынабын, сыыһаны оҥордохпуна бэйэм эппиэттиирбин чопчу билэбин, ол иһин куһаҕан диэбиппин оҥорбоппун. Төрөппүттэрим миигин хайдах итинник ииппиттэрин бэйэлэриттэн ыйытыахха наада буолуо, ол эрэн мин санаабар, кинилэр тус бэйэлэрин холобурдарынан миэхэ дьайар күүстээхтэр.

-Оскуолаҕа үөрэнэргин кытары ыллыыргын хайдах дьүөрэлээбиккиний? Сахалар икки куобаҕы эккирэтиэҥ, иккиэннэриттэн матыаҥ дииллэр, оттон эн барытын ситистиҥ.

 

-Дьонум ырыа суруйар дьоҕурбун сайыннараары музыкальнай оскуолаҕа фортепиано кылааһыгар биэрбиттэрэ. Онно үлүһүйэн дьарыктаммытым. Музыкаттан ураты математиканы эмиэ олус сэҥээрэрим. Дьокуускайдааҕы национальнай гимназияҕа үөрэнэ сылдьан математикаҕа биир бастыҥ олимпиадник этим. Учууталларым Лидия Петровна, Марина Ивановна миигин олус өйүүллэр, өйдүүллэр этэ. Мин туспар ис дууһаларыттан ыалдьаллара, элбэххэ уһуйбуттара, кинилэр баар буоланнар элбэҕи ситистим, ол иһин учууталларбар куруук махтанабын.

-Үрдүкү кылаастарга үөрэнэ сырыттаххына эйигин номнуо дьон ырыаһыт быһыытынан билбитэ, ырыаларыҥ хит буолбуттара. Эн биллиилээх ырыаһыт буоларгын үөлээннээхтэриҥ хайдах ылыммыттарай?

 

-Кырдьык, киһи улаатар сааһыгар наһаа кытаанах дьикти майгылаах буолар. Ол кэмҥэ бииргэ үөрэнэр оҕолорум миигин туоратан кэбиспиттэрэ. Олохпун араастаан ыарытыннара сатыыллар этэ. Биир кэмҥэ онтон улаханнык курутуйа сылдьыбыттаахпын. Бу санаатахха арааһа оҕотук быһыыларыгар ордук санаабыттар быһыылаах. Оччолорго хайдах эрэ бэйэм куһаҕаммын дуу дии саныыр этим. Кэлин мин олохпор итинник түгэн буола сылдьыбытын махтана саныыбын. Киһи ыарахан түгэннэргэ быһаарыныы ылынар, онно мин хайаан да ситиһиилээх киһи буолуохтаахпын диэн баран түһүнэн кэбиспитим.

-Устудьуоннуу сырыттахпына, Уля Сергучева хас да үөрэххэ үөрэнэр дииллэрин истэрим…

 

-Дьонум былааннаабыттарынан музыкальнай училищены бүтэрэн баран салгыы консерваторияҕа үөрэниэхтээх этим. Ону учууталларым, оскуоланы кыһыл көмүс мэтээлинэн бүтэрэн баран хайдах орто үөрэххэ киириэххиний диэннэр, ФЭИ-га кэтэхтэн үөрэнэ киирбитим. Училищены сыл аҥаара буолан баран, быраҕан кэбиспитим. Киһи сатаабатыгар үөрэниэхтээх диэн санааҕа кэлбитим. Училищеҕа музыка чопчу маннык-маннык буолуохтаах диэн үөрэтэллэрин испэр олох киллэрбэтэҕим. Этэргэ дылы, киһи өйө-санаата халыыпка киирэн хаалар эбит. Айылҕаттан бэриллибит айар талаан бэйэтэ туспа майгылаах сылдьара ордук дии санаабытым. Онон күнүскү үрдүк үөрэххэ үөрэнэн салайар идэни баһылаабытым. Билигин хас да үөрэхтээх киһи биһирэнэр быһыылаах даҕаны, өссө үөрэнэр санаам суох. Үөрэх ахсаанынан буолбакка, туһатынан сыаналанар.

-Оччоҕуна билигин аҥаардас айар үлэнэн эрэ дьарыктанаҕын дуо?

-Төрөппүттэрбин кытта олус элбэх бырайыактаахпыт, саха истээччитигэр анаан үгүс идеялардаахпыт, ол иһин «Тэтим» диэн концертнай агенство тэрийэргэ быһаарыммыппыт. Айар үлэ биир хоско олорордооҕор быдан интэриэһинэй, сүүрүүлээх-көтүүлээх, түһүүлээх-тахсыылаах буолан киһини олус умсугутар.

-Төһөтүн да иһин, киһи айаҕын ииттинэр дьарыктаах буолуохтаах буоллаҕа…

 

-Оннук. Мин айар үлэм нууччалыы эттэххэ, «приятное с полезным» диэххэ сөп. Айар киһи син биир хаһан баҕарар айар, онно бириэмэ наада, оттон айар үлэбиттэн киирэрэ айахпын ииттинэрбэр тиийэр.

-Бырайыактаргыт туһунан сиһилии кэпсиэҥ дуо? Үгүс киһи кэнсиэр тэрийэр уустуга суох дии саныыр. Дьэ, итиннэ кулиса кэннин сэгэттэххэ хайдаҕый?

 

-Кэнсиэр тэрийэр диэн туһа туспа, судургу үлэ буолбатах. Сыанаҕа ырыаһыттары мустуҥ да, онон эрэ бүппэт. Манна кэнсиэр тэрээһинэ: сценарийа, режиссурата, рекламата, репетицията уо.д.а. сытар. Күнү быһа күн солото суох сылдьаҕын. Холобура, ийэм идеятынан «Утум» диэн бырайыагы үһүс төгүлүн дьахтар күнүгэр анаан-минээн ыытабыт. Кэнсиэр тэрийэрбитигэр бары эбээһинэспитин үллэстэн үлэлиибит: аҕам –музыкальнай өттүн быһаарар, ийэм-хаһаайыстыбаны уонна үбү дьаһайар, мин – тэрээһини ылынааччыбын.

Онтон өскөтүн киһи тус биэчэрин тэрийэр, ону таһынан бэйэтэ ыллыыр буоллаҕына ыһыллан хаалар. Онон бу алтынньыга буолаары турар «Көмүс түгэн хит-шоу» диэн биэчэрбэр биир санаалаахтарбын кытта хамаанданан үлэлии сылдьабын. Холобура, тэрээһиҥҥэ «Киин радио» кылаабынай эрэдээктэрэ Варя Ермолаева – Уйулҕаана сүүрэр. Режиссуратын Сергей Расторгуев уонна балетмейстер Наталья Кралина туруоруохтара. Бу кэнсиэрим сценарийа харахпар сыл аҥаарын инниттэн көстүбүтэ, тыал үрдэҕинэ уот күөдьүйэн тахсарын курдук элбэх саҥа идея киирбитэ. Айар кэнсиэр биирдэ эрэ буолар түгэн, онон аата да этэринии биир көмүс түгэн, чыпчылҕан буолан олус улахан эппиэтинэстээх. Барыта орун-оннугар санаабытыҥ курдук буолуохтаах. Ол иһин Сергей Расторгуевка эрэлим улахан, кини элбэх сири-дойдуну кэрийбит, сайдыылаах омуктар айар үлэлэрин иҥэриммит киһи быһыытынан, киэҥ көрүүлээх, сэргэх идеялардаах режиссер.

-Элбэх сири-дойдуну кэрийбит диэбиккэ дылы, бэйэҥ балайда элбэх куонкурустарга кытынныҥ, ханнык дойдуларга сылдьыбыккыный?

 

-Сайдыан баҕарар киһи атын омуктар култуураларын, кинилэр үлэлэрин-хамнастарын көрөн уопут үллэстиэхтээх дии саныыбын. Биир сиргэ олордоххо этэргэ дылы, бэйэҥ бадарааҥҥар буккулла сылдьар буоллаҕыҥ. Оннук санааттан араас куонкурустарга Арассыыйа куораттарыгар, Украинаҕа, Японияҕа тиийэ кыттыбытым. Онно сылдьан наһаа элбэххэ үөрэнэҕин, анаарар дьоҕуруҥ кэҥиир. Манна даҕатан эттэххэ, атын дойдуларга куонкуруска кыттарбар көмөлөһөр киһилээхпин, Атласова Михнаса Михайловна. Биир үтүө күн кини миэхэ төлөппүөннээн, «наһаа үчүгэй ырыалардааххын, «Новая волна» диэн куонкуруска кыттыаххын сөп эбит», -диэбитигэр наһаа сөхпүтүм, бэйэбин оннук таһымҥа өссө да тахса иликпин дии саныыр этим. Михнаса Михайловна олох иннин биэрбэккэ, ырыаларбын ылан «Новая волнаҕа» ыыппыт этэ. Онтон миэхэ полуфиналга киирдиҥ, кытта кэл диэбиттэригэр наһаа соһуйбутум. 7 тыһыынча кыттааччыттан 100 иһигэр киирбит этим. Онтон ыла Михнаса Михайловналыын элбэх куонкуруһу кэрийдибит. Күрэхтэргэ сырыттахха, эйигин көрөн, өссө атын куонкурустарга ыҥыраллар, билигин даҕаны хас да ыҥырыылаахпыт. Онно баран хайаан да кыттар санаалаахпын.

-Уля, ырыаларгын үксэ Сайа тылларыгар суруйаҕын. Сайаны кытта эйигин туох сибээстиирий?

 

-Мин Сайа, Күннүк Уурастыырап, Семен Данилов хоһоонноругар ордук табыллан суруйабын. Кэлин Тумус Мэхээлэ хоһоонноругар ырыа айар буолан эрэбин. Тоҕотун бэйэм да билбэппин. Итини киһи илэ өйүнэн кыайан быһаарбат, тугу да иилэн-баайан таһаарбат. Тус олоҕум ити хоһооннору кытта хайдах да дьүөрэлэспэт. Көннөрү биир эмэ хоһоону көрө түстэхпинэ матыыба бэйэтэ кутуллан кэлэр. Ону ырыалаах хоһооннор диэн ааттыыбын. Сороҕор төбөбөр матыып баар, оттон тыллара суох буоллаҕына матыыпка сөп түбэһэр хоһоон көрдүүбүн. Үчүгэй поэт буолла эрэ, хайаан да ырыа суруллар хоһооннордоох диэн буолбат эбит. Холобура, Петр Тобуруокап, Наталья Харлампьева наһаа үчүгэй хоһооннордоохтор да тоҕо эрэ тус бэйэбэр ырыа табыллыбат, итини эмиэ киһи кыайан быһаарбат.

-Иэйииҥ ханнык түгэннэргэ киирэрий?

-Мин санаабар айымньы ис хоһооно ис туруккуттан тутулуктаах диир сыыһа быһыылаах. Хомойо сылдьан сырдык, өрө таһаарыылаах ырыалары эмиэ суруйан кэбиһиэххин сөп. Иэйии ханнык баҕарар түгэҥҥэ киирэр, чуҥкуйдаххына, айаннаан истэххинэ, түүн. Бэйэҥ-бэйэҕин истэн чуумпуга олорон эрэ суруйаҕын. Оттон анаан суруйаары гыннаххына, хайдах да күүһүлээн туран суруйбаккын. Холобура, бу кэнсиэрбэр дьүөгэлэрим Ньургуйаана Кычкина уонна Маша Белоцерковская кэлиэхтээхтэр, кинилэргэ анаан саҥа ырыалары суруйбутум. Ньургуйаанаҕа иккитэ олох атын ырыа тахсан кэлэн, ыксыы сылдьыбыппыт. Кэмниэ кэнэҕэс Ньургуйаана ырыатын булбуппут.

Ньургуйааналаах Машалыын бары тэҥҥэ саҕалаабыппыт, кыргыттарым тэлэһийэн киэҥ сиринэн сылдьаллар, ол да буоллар манна мин кэнсиэрбэр кэлэллэриттэн наһаа үөрэбин, долгуйа кэтэһэбин.

-Дьүөгэлэрим диэбиккэр Галина Шахурдина ырыатын санаан кэллим: «Дьүөгэлэриэм, кыргыттарыам, ханна тиийэн кийиит буолан олороҕут…» Кырдьык даҕаны, оттон тус олоххун сырдатыаҥ дуо?

-Айар үлэм уонна тус олоҕум иккиэн тус-туспа эйгэлэр. Иккиэннэрин дьүөрэлии тутар, силбэһиннэрэр сыыһа буолуо дии саныыбын. Уопсайынан, саха сэмэй омук, кини чараас кутун харыстыыр үгэстээх, онон мин тус олохпун эмиэ хайа кыайарбынан араҥаччылыы сатыыбын.

-Олох диэн эн санааҕар тугуй?

- Ыйытыы тутулун атыннык уларытыахха наада. Олох туохтан турарый? - диэн. Ситиһиилэртэн, тургутуулары туорааһынтан, дьолтон уонна тапталтан дии саныыбын.

-Оҕо сылдьан ыраламмыт баҕа санааҥ бүүс-бүтүннүү туолбут эбит дии. Ити эмиэ кырдьык, ситиһии буоллаҕа. Оттон сорохтор «ыра санаа хаһан да туолбат, бириэмэҕин бараама» эҥин дииллэр дии. Ону туох дии саныыгын?

-Итинник санаа кылгас өйтөн тахсар. Киһи дьиҥэ, ыра санаанан эрэ олорор. Киһи ыра санаатын ситиһэн эрэ иннин диэки барар кыахтаах. Биир ыра санааҥ туоллаҕына, саҥа ыра санаа үөскүөхтээх. Ыра санаа диэн хас биирдии киһиэхэ хайаан да баар буолуохтааҕын уонна кини хайдахтаах курдук күүстээҕин бэйэм биллим. Ааспыт кыһын, саас сыала-соруга суох олорор кэммэр дэлби санаам түһэн, тууйулла сылдьыбытым, онтон эмискэ кэнсиэрим идеята киирэн онон умайан, айар үлэнэн өссө күүскэ үлүһүйэн кэллим. Өссө кыра эрдэхпиттэн үөһэ көтө сылдьан ыллыахпын баҕарар этим. Ити баҕа санаам эмиэ олоххо киирэн эрэр. Бу шоубар көтө сылдьан ыллыахтаахпын. Үөрэнэргэ ыарахан, ол эрэн баҕа санаа улахан!

-Кэнсиэргэр үөһэ көтөҕүн? Арба, буолаары турар шоуга даҕатан эттэххэ, саҥа хаартыскаларыҥ тугу этэллэрий? Куукула курдук нарын-намчы Күннэйбит ханна баарый?

-Эксперименниирбин сөбүлүүбүн. Бу сырыыга туох эрэ атын, сонун уобараһы көрүөхпүн баҕарбытым. Наар биир сирэй киһини сылатар диэбиккэ дылы, син биир хаһан эрэ уларыйыахха наада. Бириэмэ, кэм-кэрдии наһаа түргэнник ааһар, онон тугу санаабыккын барытын эдэр эрдэххинэ олоххо киллэрэн хаалбытыҥ быдан үчүгэй. Сарсын, өйүүн дии сылдьыбытыҥ номнуо хойутаабыт буолуоххун сөп. Сонун уобараспын дьон араастаан ылынна быһыылаах. Интернеккэ хаартыскаларым комментарийын көрдөххө, дьон соһуйбуттар, оттон ким эрэ хайҕаабыт. Шоу рекламата үс истиилинэн барыаҕа: сахалыы, футуристика уонна ретро.

-Аныгы сайдыылаах ыччат үксэ глянецка ымсыырар, оннукка талаһар буолла. Аһара чаҕылхай, күлүмүрдэс көстүү киһи ис дьиҥин күлүгүрдэр дии саныыбын. Онтон эн?

-Гламур саҥа үйэ сүүрээнэ, маны хайдах да гынан кириитикэлээбэккин, ол аата билиҥҥи үйэ ирдэбилэ, ураты истиилэ диэххэ сөп. Мин төттөрүтүн гламур култуураны биһириибин. Кэлиҥҥи сылларга ыччат бэйэтин көрүнэр, кыраһыабайдык таҥна сатыыр, чөл олоҕу тутуһар буолла. Ити барыта гламур үчүгэй дьайыыта. Холобура, 90-c cc истиил агрессивнай уулуссалыы соҕус майгылаах этэ диэххэ сөп. Ол кэмҥэ арыгы, табах муода эбит буоллаҕына, билигин ыччат чөл буоларга ордук дьулуһар, кэрэҕэ, сырдыкка тардыһара быдан күүһүрдэ. Үчүгэй!

-Саҥа көлүөнэ, гламурнай ырыаһыттар Саха эстрадатын инники дьылҕатыгар хайдах дьайыахтара дии саныыгын?

-Европеизация саха эстрадатыгар наһаа күүскэ баран эрэр. Дьиҥэ, биһиги атын омуктары тус бэйэбит, норуоппут уратытынан эрэ соһутар, кэрэхсэтэр кыахтаахпыт. Холобура, куонкурустарга мин куруук сахалыы ыллыыбын, саха буоларбынан кинилэртэн ураты буоллаҕым. Атын омуктары кинилэр майгыларынан син биир хоппоккун, ол иһин саха ырыата сахалыы тыыннаах буоларын ситиһиэххэ наада.

-Ырыа сахалыы тыына хайдах иһиллэрий?

- Саха тылыгар тыл дьүөрэлээһиитэ диэн баар. Хас биирдии тылын дорҕооно матыып хас биирдии нотатын кытта наһаа дьиктитик дьүөрэлэһэр. Оттон «сирэйэ суох» ырыалар көннөрү омуктууттан уһуллуу курдук буолаллар, биллэн турар ити олус хобдох. Сахалыы ырыалар майгыларын сүтэрбэккэ илдьэ сылдьарбыт буоллар дии саныыбын. Холобура, мин Байбал Сэмэнэп, Бүөккэ Бөтүрүөп, Галина Шахурдина, Валерий Ноев айымньыларын сөбүлээн истэбин. Ит

Нөрүөн-нөргүй буоллун биһиги саайтпыт ыалдьытыгар! Билигин эн ыалдьыт курдук киирдин. Бэлиэтэнэн киирдэххинэ бу сиртэн элбэҕи бэйэҕэр туһаныаххын сөп.
Майгынныыр сонуннар:

« Төттөрү
Ырытыылар (3)
 
ЭРКИН   12 октября 2010 11:15
Дьэ бу Куннэй реклама5а табыллыбыт сахалыы киэргэллээх, нарын намчы сирэйдээх хаартыската. Куннэйгэ ситиьиилэри ба5арарбын!
Корооччу   18 октября 2010 00:20
Наьаа учугэй концерт буолан ааста.Сынньанным а5ай. Барыта биир тыынынан буолла, бириэмэ олох биллибэккэ ааста. Режиссурата табыллыбыт, чуолаан ункуулэрэ олус учугэй. Киьи (мин) соро5ор ырыаьыттары корбокко ункууьуттэри (подтансовканы) кордум. Куннэй маладьыас! Оссо да5аны сайда тураргар дьоннун-сэргэ5ин уордэ, сынньата сырыт! Айымньылаах, сыралаах улэ5эр урдуктэн урдук ситиьиини ба5арабын!
ммм   18 октября 2010 01:03
Мин наоборот астымматым. элбэ5и учугэйи кэтэспит буолан буолуо. Албыннаппыт о5о курдук буоллум. Хотя 50-чам. Киьи концерка учугэй ырыа истэ, сынньана кэлэр. Далаана ыллыыр кэмигэр ырыа эрэ туох эрэ наар Куннэй охтубатар диэн долгуйа олордубут. Ырыаны да истибэтибит, ырыаьыты (Далаананы) да кербетубут. Концерт кэнниттэн хас да киьиттэн ыйппыппар эмиэ астымматахтар этэ. Уонна "наряда" наьаа борустуой. Кыьыл платьебыт быкпытын этэ да барбаппын. Кому30 ырыппыттарын курдук до 1000 рб ей еще далеко...

Ырытыыга кыттабын




 

Сайт зарегистрирован в Федеральном Агентстве
по информационным технологиям
Свидетельство №11945 от 6 мая 2008 года

Автор проекта - Синильга
сайт открыт 17 августа 2007 © Ырыа кырдала
Условия использования материалов, размещенных
на сайте «Ырыа кырдала»

Доступ к сайту бесплатен для пользователей
Экспресс-Сеть, Гелиос-ТВ, ЯГУ, Наука, Оптилинк, Сахаспринт и по льготному пиринговому тарифу
для сетей ADSL и "Столица" (7 коп./1 мб).