Саха ырыаһыттара - Италияҕа
 (голосов: 0)

Саха ырыаһыттара - ИталияҕаИталия - вокальнай-опернай ускуустуба кута-сүрэ иитиэхтэнэн тахсыбыт дойдута. Салгына, айылҕата, куората, тыйаатыра, архитектурата, көрөөччүтэ - барыта ураты тыыннаахха дылы... Адьас соторутааҕыта икки ырыаһыппыт Италияҕа Феррара куоракка «Риголетто» операҕа кыттан кэллилэр.



Продюсерынан сылдьыспыт Опера уонна балет тыйаатырын артыыската Анна Дьячковская кэпсиир: «Биллиилээх ырыаһыттар бу «Комунале» тыйаатыртан тахсыбыттар. Үөһэттэн айдарыылаах кэрэ куоластаах Лучано Паваротти, Марио дель Моно уо.д.а манна ыллаабыттар. Биһиги ырыаһыттарбытын - Айталинаны, Александры - "кыраман ыраах тымныы Сибииргэ маннык көмүс күөмэйдээх ырыаһыттар бааллара тугун бэрдэй?" диэн олус сөхтүлэр-махтайдылар».

"Италия бэйэлээх бэйэтин артыыстара ити тоҕо ыллаабаттарый?" диэтэххэ, этэллэринэн, вокальнай оскуолаларын таһыма намтаабыт. Ырыаһыт элбэх эрээри, чахчы талааннаах, улахан операҕа ыллыах айылаах чаҕылхай сулустар кэнникинэн улам суох буолан эрэллэр дииплэр эбит. Кинилэр систиэмэлэрэ тосту атын - тыйаатырдарыгар мэлдьи биир труппаны туппаттар: араас куорат, дойду ырыаһыттара ыҥырыынан кэлэн испэктээкиллэргэ кыттан бараллар.

Айталина Адамова: «Режиссербут Мария-Кристина Ости - бэйэтэ ырыаһыт, онон опера ымпыгын-чымпыгын үчүгэйдик билэр, чахчы, дьыалатын таһыччы үрдүк таһымҥа баһылаабыт профессионал диэххэ сөп. Көстүүмнэрбин бэйэм илдьэ барбытым. Арай онно миэхэ декольтены улаатыннаран биэрбиттэрэ. Утарсан көрбүппүн, «туох буолуой, манна Арассыыйа буолбатах - Италия!» диэбиттэрэ», - диэн Айталина күлэр.



Александр Емельянов: «Режиссер уобараһы айарбар барытын кердөрөн, хас хамсаныыбын толору быһааран биэрэрэ. Уопсайынан, хайдах ыллыырга эрэ буолбакка, драматическай өттүгэр - хайдах оонньуурга, дьүһүҥҥэ-бодоҕо, туттууга-хаптыыга ураты болҕомто ууруллар. Риголетто гримэ уустук буолла - кини «урод» дьүһүнүн-бодотун ордук күүркэтэн биэрдилэр» (кырдьык, хаартыскаҕа Риголетто-Емельянов, били, «маннааҕы» Риголеттоттан олох атын). Аны, саҕаланыаҕыттан бүтүөр диэри Саша Риголеттоны италиялыы ыллаабыт. Кини ол иннинэ Риголеттоны, хата, италиялыы ыллаан уопутурбута эмиэ туһалаатаҕа: терүт аксыана суох ыллыыгыт диэбиттэр.

Айталина: «Онно тыйаатыр акустиката, эчи үчүгэйин, олох атын!» -диир.

Александр: «Бу Комунале тыйаатыр былыргы акустикатын илдьэ хаалбыт буолан, итинник үчүгэй. Бэл, ырыаһыт хас тыына барыта иһиллэргэ дылы. Киһи, чахчы астына-дуоһуйа ыллыыр тыйаатыра! Аны, аркыастыры кытта үлэлиир эмиэ сүрдээх интэриэһинэй этэ. Аркыастыр оонньуур, хас биирдии дьикти кэрэ тыаһа барыта субу баардыы иһиллэр. Дирижер - уопуттаах Фабрицио Мелани - Болонья тыйаатырын кылаабынай режиссера».

Анна Дьячковская: «Опера бүппүтүгэр көрөөччүлэр «браво», «брависсимо» хаһыы бөҕөтө, ытыс тыаһа бииргэм өрө ньиргийэн олорор, ырыаһыттарбытын ончу ыыппаттар».

Александр Емельянов: «Биллэн турар, долгуйбутум... Саамай үөрэ истибитим-аатырбыт ырыаһыты кытта тэҥнээбиттэрэ. Бу - Ла Скалаҕа ыллаабыт аан дойдуга биллибит Пьеро Капучилли. Биллэн турар, киһи итинник тэҥнэбилтэн хайдах долгуйбат буолуой, үөрэриҥ чахчы».

Оттон Айталина Адамованы истибит дьон аан дойду кэрэ куоластаах ырыаһыта Мария Калласка холообуттар, Аны, биһиги ырыаһыттарбытын атын тыйаатыр режиссердара, агеннара бэлиэтии көрөн ыҥырбыттар. Биллэн турар, ол барыта үптэн-харчыттан тутулуктаах дииллэр. Биһиги ырыаһыттарбытынан киэн туттабыт, кинилэргэ киэҥ ыыры баҕарабыт!

Бэлэмнээтэ Нина ГЕРАСИМОВА

«Кыым» хаһыат, 2010 с., муус устар 22 күнэ, 15№

Нөрүөн-нөргүй буоллун биһиги саайтпыт ыалдьытыгар! Билигин эн ыалдьыт курдук киирдин. Бэлиэтэнэн киирдэххинэ бу сиртэн элбэҕи бэйэҕэр туһаныаххын сөп.
Майгынныыр сонуннар:

« Төттөрү
Ырытыылар (1)
 
Эрэл1   7 июня 2010 04:25
Александр Емельяновы, бу бара сылдьан, истэн ессе астнынным. Хас да сыллаа5ыта Санкт-Петербург Опера5а эмиэ истибитим, уонна онно керсен дуоьуйа кэпсэппитим. Ситиьиилэри ба5арабын. Эрэл.

Ырытыыга кыттабын




 

Сайт зарегистрирован в Федеральном Агентстве
по информационным технологиям
Свидетельство №11945 от 6 мая 2008 года

Автор проекта - Синильга
сайт открыт 17 августа 2007 © Ырыа кырдала
Условия использования материалов, размещенных
на сайте «Ырыа кырдала»

Доступ к сайту бесплатен для пользователей
Экспресс-Сеть, Гелиос-ТВ, ЯГУ, Наука, Оптилинк, Сахаспринт и по льготному пиринговому тарифу
для сетей ADSL и "Столица" (7 коп./1 мб).