"Омурҕан" ырыа бөлөҕө
 (голосов: 0)
"Омурҕан" ырыа бөлөҕөХас биирдии нэһилиэк туспа өйдөөх-санаалаах дьоннордоох буолар. Ол курдук, Мэҥэ -Хаҥалас улууһугар Төхтүр бөһүөлэгэр 15 сыл устата эр дьоннор анал бөлөх тэринэн, ыллаан-туойан кэлбиттэрэ олохтоохтору элбэххэ үөрэтэр: олорор сиргэ-уокка чөл олоҕу түстүүргэ, үтүө быһыы-майгы араҥаччылана турарыгар, бэйэ сиригэр-уотугар туһалаах буолууга, ону тэҥэ кэлэр көлүөнэҕэ үтүө холобуру көрдөрөн, сахалыы сиэри-туому тутуһан, олох ыарахан тыынын ырыанан солбуйан, санааны түһэрбэт бигэ турукка сирдииллэр. Кинилэр репертуардара сылын аайы кэҥээн, анал ырыа киэһэлэрин тэрийэллэр, олохтоохтор суруйбут айымньыларын ырыа гынан көтүтэллэр.

Кинилэр бөлөхтөрүн «Омурҕан» диэн сүрэхтээн, республика иһигэр биллэр ырыа бөлөҕөр тиийэ үүнэн, нэһилиэктэрин элбэхтик ааттаттылар. Биир дойдулаахтарын М. Степанов, В. Скрябин - Идэлги, Н Афанасьев, Т. Иванов, М. Гурьев, В. Кузьмин айымньыларын толороллор. Эр дьон мустан ыллыырын дьон-сэргэ астына көрөр, истэр.

Үүммүт 2010 сылга Дьаҥхаады (Төхтүр) нэһилиэгэ 300 сылын көрсөргө бэлэмнэнэн, бу күннэргэ «Алаас ырыата» диэн ааттаан-суоллаан акция - ырыа киэһэтин бэлэхтээн аастылар. Тэрээһини нэһилиэк Аҕа баһылыга Федор Иванович Тимофеев аан тылынан аста. Кэнсиэр кэмигэр көрөөччүлэр «Омурҕаннарга» махтал тыл эттилэр. Сценаҕа кэтэн тахсар көстүүмнэрэ өссө тупсаҕай буолан көстөрүн туһугар бэлэх оҥороллорун туһунан санааларын тиэртилэр. Говоров Валериан Александрович, билигин киин куоракка олорор, үлэлиир, нэһилиэк экс-Аҕа баһылыга, кэрэ эйгэ уус-уран тэрээһиннэрин көҕүлээччи бэйэтин аатыттан анал туһах туттарда.

Ырыа түһүлгэтин «Омурҕаннар» арахсыспат атастара, айар дьоҕурдарыгар күүс-уох эбэн биэрэр күндү киһилэрэ, үгүс сылларга бодоруспут доҕордоро, улуустааҕы «Дьүрүлгэн» диэн мелодистар түмсүүлэрин салайааччыта, республикаҕа биллэр ырыаһыт Иван Аргунов ииллээн-саҕалаан ыытта. Көрөөччүлэр «Омурҕан» эр дьон вокальнай бөлөҕүн сценаҕа сырыы аайы дохсун ытыс тыаһынан уруйдуу көрүстүлэр. Бөлөх ырыаһыттара бары араас идэлээх дьон.

Билсиэҕиҥ, кинилэр кимнээҕин:

1. Кочкин Данил Константинович - Төхтүр дьиэлэрин итиинэн хааччыйар тэрилтэ үлэһитэ. Кини улуустааҕы «Туос мааска» күрэх «Бастыҥ эр киһи оруола» анал аат хаһаайына. Ону таһынан кини дьиэ кэргэнэ нэһилиэккэ ыытыллыбыт күрэх «Сайдам саха ыала» анал аат хаһаайына. Эбиитин «Аар Күбэй» бөлөх үҥкүүһүтэ.

2. Ходулов Роман Николаевич
- Аллараа Бэстээх маҥнайгы нүөмэрдээх оскуолатын информатикаҕа учуутала. Кини боксаҕа спорт маастарыгар кандидат, үс оҕо аҕата.

3. Романов Николай Петрович - Төхтүр оскуолатын директорын солбуйааччы. Кини нэһилиэгин аатын дуобакка элбэхтэ көмүскээбит киһи, ону тэҥэ мас ууһа, улахан дьиэ кэргэн аҕа баһылыга.

4. Мохначевскай Иван Иванович
- искусство оскуолатыгар уруһуй учуутала, талааннаах уус, түөрт оҕо амарах аҕата, алта сиэн элэккэй эһэтэ.

5. Макаров Кирилл Гаврильевич - хапсаҕайга спорт маастарыгар кандидат, республикаҕа спортивнай күрэх призера уонна чемпиона, үс оҕо аҕата.

6. Прокопьев Пантелеймон Егорович -Төхтүр дьиэлэрин итиинэн хааччыйар тэрилтэ үлэһитэ. Кини дьиэ кэргэнэ нэһилиэккэ ыытыллыбыт күрэх «Сайдам саха ыала» анал аат хаһаайына, үс оҕо аҕата.

7. Марков Петр Константинович - Төхтүр баһаарынай чааһын салайааччыта. Кини мас тардыһыытыгар уонна гиирэҕэ улус призера, биэс оҕолоох эдэр ыал аҕа баһылыга.

8. Яковлев Алексей Никифорович - бааһынай хаһаайыстыба баһылыга. Кини нэһилиэккэ ат сүүрдүүтүн көҕүлээччи, үс оҕо аҕата, үҥкүүһүт.

9. Холмогоров Николай Николаевич
- Төхтүр дьиэлэрин итиинэн хааччыйар тэрилтэ үлэһитэ. Кини нэһилиэккэ ат сүүрүдүүтүн көҕүлээччи, дьиэ кэргэнэ нэһилиэккэ «Сайдам саха ыала» күрэх кыттыылааҕа, култуура уонна спорт эстафетатын хас да төгүллээх лауреата.

10. Пермяков Егор Николаевич - өр сыл физкультура учууталынан үлэлээбитэ. Саха республикатын үөрэҕириитин туйгуна. Кини нэһилиэк биир бастыҥ үҥкүүһүтэ, сүүрүүгэ үһүс спортивнай хардыылаах, улахан ыал аҕа баһылыга.

11. Бекренев Владимир Иванович - Төхтүр дьиэлэрин итиинэн хааччыйар тэрилтэ үлэһитэ. Уруһуйдьут, уус, эдэр ыал аҕата.

12. Бурнашев Алексей Егорович - эдэр ырыаһыт, култуура уонна спорт эстафетатын дипломана, общественник.

13. Попов Климентий Климентьевич - Төхтүр дьиэлэрин итиинэн хааччыйар тэрилтэ үлэһитэ. Кини эдэр ырыаһыт, общественник.

14. Романов Николай Витальевич - Төхтүр окуолатын иитэр-үөрэтэр үлэҕэ директоры солбуйааччы. Кини хотугу многоборияҕа республика спордун маастара, сүүрүүгэ республика уонна улуус призера, чемпиона.

15. Неустроев Валерий Валерьевич - Дьаҥхаады нэһилиэгин ыччатын лидера, уус-уран тэрээһин кыттыылааҕа.

16. Кузьмин Владимир Васильевич - «Омурҕан» эр дьон ырыаҕа бөлөҕүн уус-уран салайааччыта, Саха республикатын култууратын туйгуна, мелодист, аккомпониатор.

«Омурҕаннар» күн-түүн ахсааннара элбиир, ырыаны сэҥээрэр ыччат дьон кэлэн, кыттыһан ыллаан иһэллэр.

Михнаса АТЛАСОВА

Нөрүөн-нөргүй буоллун биһиги саайтпыт ыалдьытыгар! Билигин эн ыалдьыт курдук киирдин. Бэлиэтэнэн киирдэххинэ бу сиртэн элбэҕи бэйэҕэр туһаныаххын сөп.
Майгынныыр сонуннар:

« Төттөрү
Ырытыылар (1)
 
альберт   4 февраля 2010 20:47
маладьыас уолаттар

Ырытыыга кыттабын




 

Сайт зарегистрирован в Федеральном Агентстве
по информационным технологиям
Свидетельство №11945 от 6 мая 2008 года

Автор проекта - Синильга
сайт открыт 17 августа 2007 © Ырыа кырдала
Условия использования материалов, размещенных
на сайте «Ырыа кырдала»

Доступ к сайту бесплатен для пользователей
Экспресс-Сеть, Гелиос-ТВ, ЯГУ, Наука, Оптилинк, Сахаспринт и по льготному пиринговому тарифу
для сетей ADSL и "Столица" (7 коп./1 мб).