Алексей ПОТАПОВ: «12 сыллаах үлэм түмүгэ...»
 (голосов: 0)
Кини 1981 с. муус устар 21 күнүгэр Чурапчыга төрөөбүтэ. Алексей аан маҥнай 5 сааһыгар хормуоскаҕа оонньууруттан саҕалаан муусука эйгэтигэр сыстан барбыта. Аҕата Алексей Михайлович көһөҥө талааннаах мусукаан этэ. Кыра уол аҕатын уһуйуутунан бастаан аккордеоҥҥа оонньуурга үөрэммитэ.

- Ханна үлэлиигиний?

- Билигин «Ырыа суруйааччылар сойуустарыгар» үлэлии сылдьабын, сакааһынан сыбаайбалары, үбүлүөйдэри ыытабын.

- Эн атын ааптардар суруйбут ырыаларын ыллааччыгын дуо? Арыт этээччилэр «биир ааптар ырыаларын матыыба наһаа маарыннаһар буолар» диэн.

- Мин саныахпар, ырыаларым бэйэ-бэйэлэригэр тылларынан да, матыыбынан да маарыннаспаттар. Омук Уолун тылларыгар аҕыйах ырыалаахпын.

-Алексей, икки сылтан бэттэх куоракка көстөр, сыанаҕа ыллыыр буоллуҥ. Ол иннинэ ханна сүтэ сырыттыҥ?


- Үерэхпин бүтэрэн дойдубар, Чурапчы Мырылатын уонна Уус Алдан Суоттутун агро-оскуолапарыгар 6 сыл муусука учууталынан үлэлээбитим.

- Учууталлыыр хайдах эбитий?

- Ити түмүгэр 2006 с. Чурапчыга үөрэтэр оҕолорум ырыа күрэһигэр «Гран-прини» ылбыттара. Онон «Бастыҥ салайааччы» уонна «Оҕо ырыатын бастыҥ ааптара» диэн ааттары ылбытым. Итинэн, учууталлыыр туох да куһаҕана суох диэн түмүгү оҥоһуннум.

- Саамай чугас, аттыгар мэлдьи баар дьонуҥ кимнээхтэрий?

- Төрөппүттэрим уонна оҕом.

- Саха сиригэр саамай элбэх доҕордоох, бокулуонньуктаах дьонунан чунуобунньуктары уонна артыыстары тарбахха баттыыллар. Үтүмэн атас-доҕор, табаарыс быыһыгар кими эмэ чуо талан, үйэ-саас тухары дьиҥнээх доҕор оҥостор уустук дуо?

- Чахчы, оннук. Тоҕо эрэ үгүс киһи эн харчылаах, кыахтаах буоллаххына, эйиэхэ тардыһар, үчүгэйдик сылдьар кэмҥэр доҕор-атас буолуох мэлдьи элбэх. Олохпут оннук. Ол эрээри доҕор диэн үөрүүгүн эрэ буолбакка, ыарахан кэмнэрбэр куйбарыс гынан хаалбатах, саҥата суох туораан биэрбэтэх киһини ааттыыбын.

- Бэйэҥ төһө үчүгэй доҕоргунуй?

- Бэйэм эмиэ кимиэхэ эрэ үчүгэй доҕор буолуом, кимиэхэ эрэ ис дьиҥмин арыйбакка, тус эйгэбин кердөрбөкке көннөрү алтыһан ааспыт киһинэн хаалыам.

- Култуурунай сезон аһыллаатын кытары кэнсиэр бөҕө буолар. Ырыаһыттар бииртэн-биир, сонунтан-сонун идиэйэни ылан, көннөрү ырыаларын эрэ буолбакка, кэнсиэрдэрин сыалай шоу-бырагыраама оҥороллоро муода буолла. Онон, бэйэҥ кэнсиэргэр эн ырыаҕын сөбүлээн истэр дьону тугунан соһутарга бэлэмнэнниҥ?

- Мин кэнсиэрим антураж, шоу буолбатах. Ырыаһыт киһи талаанын, тугу сатыырын көрдөрө сыанаҕа тахсар. Бу-12 сыллаах үлэм түмүгэ. Кэнсиэргэ мин ырыаларбын ыллыахтара доҕотторум: Сергей Сорокин, Болдьума, Айталина Дьячковская, бииргэ терөебүт быраатым Александр Потапов, Николай Андросов, Понсаш, Степан Афанасьев, Эрчим уо.д.а. Сүрүн болҕомтобун хаачыстыбалаах тыас-уус, муусука өттүгэр уурдум.

Күн бүгүн Алексей Потапов эдэр ыччат уоһуттан түһэрбэт 60-ча ырыатын ааптара, «СӨ Ырыа айааччыларын сойууһун» бэрэстэбиитэлэ. Кини уопсастыбаннай олох көхтөех кыттааччыта, былырыын кырдьаҕас дьону ыллыырга үөрэппитэ, маастар-кылаастары биэрэр, вокалга оҕолору дьарыктыыр. Алексей устудьуоннуур сылларыттан саҕалаан аһымал-аахсыйа элбэх кэнсиэригэр ыллыыр.

Сэтинньи 14 күнүгэр Өксөкүлээх Өлөксөй аатынан Култуура киинигэр Алексей Потапов маҥнайгы сольнай кэнсиэрэ буолар. Бу чыыһыла Алексейга ырыа айааччы буоларын кытта быстыспат ситимнээх: кини 14 саастаабар «Оҕо саас» диэн маҥнайгы ырыатын суруйуоҕуттан киэҥ эйгэҕэ биллэн барбыта.

Алексей ПОТАПОВ ситиһиилэрэ:

Оскуолаҕа маҥнайгы кылааска үөрэнэ киирэн баран «Капитан Гастелло» ырыанан Кыайыы бырааһынньыгар анаммыт өрөспүүбүлүкэтээҕи ырыа күрэһигэр бастаабыта.

1988 с. «Салют Победы» куонкуруска Дьокуускай куоракка 1 миэстэни ылар.

1989 с. «Смотри на меня как на равного» инбэлиит оҕолор күрэстэригэр балалаайкаҕа оонньоон, ыллаан лауреат буолар.
Ити кэннэ «Зажги свою звезду» ырыа бэстибээлигэр кыайар.

1995 с. Чурапчыга «Сааскы кылыһахтар» диэн куонкуруска 3-с истиэпэннээх лауреат буолар.

Эмиэ ити сыл «Полярная звезда» Хатастааҕы зональнай көрүүгэ лауреат үрдүк аатын ылар.
Алексей улахан кылааска тахсан баран, Дьокуускайга хараҕа суох оҕолор Өрөспүүбүлүкэтээҕи оскуолаларыгар үөрэнэ киирэр. 1997 с. оскуолатын онно бүтэрэр.

Ити сыл оскуоланы бүтэрээри сылдьан хит буолбут «Оҕо саас» ырыатын суруйар (ити кэмҥэ «Виктория» радиостанция тэриллибитэ).

Байааҥҥа уонна хормуоскаҕа оонньооччулар «Кубок-97» диэн ереспүүбүлүкэтээҕи 3-с чөмпүйэнээттэригэр «гран-прини» ылар.
Алексей бу сыллар усталарыгар кыра-кыралаан ырыа суруйар. Дьоҕурдаах уолу таба көрөн М.Н. Жирков аатынан Дьокуускайдааҕы мусукаалынай училищеҕа ыҥыран үөрэххэ ылаллар. Кинини биллиилээх композитор Алексей Кириллович Калининскай үөрэтэр.
Алексей айар аартыга арыллар, саҥа ырыалар суруллаллар, клиптэр тахсаллар.

1999 с. Мииринэй «Туой Хайа-99» эстраднай ырыа бэстибээлигэр «Оҕо саас» ырыанан 3-с истиэпэннээх лауреат буолар.

2001 с. гитаранан ырыаҕа ааптар номинана буолар, бастыыр.
Эмиэ ити сыл «Олоҕум маҥнайгы хардыыта» диэн маҥнайгы аудио-альбома күн сирин көрөн 10 тыһ. ахс. атыыланар.

2001с.,«Ырыаны айааччылар өрөспүүбүлүкэтээҕи сойуустарыттан» Аркадий Алексеев уонна Алексей Егоров эдэр уол муусукаҕа ураты сыстаҕаһын, талаанын, айылҕаттан дьоҕурдааҕын бэлиэтээн «XX үйэ ырыаһыта» диэн ааты иҥэрэллэр.
Ити сыл «Виктория» радиостанция тэрийэр «Этигэн хомус» бириэмийэтигэр «Сыл бастыҥ саҕалааччыта» номинана буолар. «Сайын» ырыаҕа видеоклип уһуллар.

2002 с. Алексей Потапов уонна Мирослав Егоров хомуурунньук аудио-кассеталара, оттон 2003 с. Алексей ырыаларын бастакы «Уһуктуу» компакт-диискэтэ тахсаллар.
Алексей ырыаһыт доҕотторугар ырыалары суруйан биэртэлиир, ол курдук: «Х-Uрр» бөлөх «Соҕотох», Игорь Егоров «Ийэбэр», Нелли «Гитара», Серафим Ксенофонтов «Кэтэһээр» ырыаларын.

2007 с. «Маэстро-2007» аранжировщиктар куонкурустарыгар көрөөччү биһирэбилин ылан бастыыр.

2007 с. Валерий Ноев сырдык кэриэһигэр анаммыт өрөспүүбүлүкэтээҕи ырыа куонкуруһугар 2-с истиэпэннээх лауреат буолар.

2008 с. «Этигэн хомус» мусукаалынай бириэмийэҕэ «Таптыыр кыыспар» ырыа «Хит года» буолар, «Сыл бастыҥ ырыата» номинацияҕа тиксэр.

2008 с. Томпо улууһун Мэҥэ Алданыгар П.П. Колодезников сырдык кэриэһигэр анаммыт байаанньыттар өрөспүүбүлүкэтээҕи күрэстэригэр 2-с истиэпэннээх лауреат аатын ылар.

Светлана ТИМОФЕЕВА

«Кыым», 2009 с., сэтинньи 5 күнэ, 43 №

Хаартыска www.radioviktoria.ru/sakha ылылынна



Нөрүөн-нөргүй буоллун биһиги саайтпыт ыалдьытыгар! Билигин эн ыалдьыт курдук киирдин. Бэлиэтэнэн киирдэххинэ бу сиртэн элбэҕи бэйэҕэр туһаныаххын сөп.
Майгынныыр сонуннар:

« Төттөрү
Ырытыылар (3)
 
Егор михайлов   20 января 2010 22:50
Егор михайлов ст.Тулуйхан Гран-при 2010с "Ырыа барахсан" баhаалыста "Ол тугэннэр"ырыа тылын биэриий
Егор михайлов   20 января 2010 22:52
:-*
Superstar boy   4 ноября 2010 01:50
:lol:

Ырытыыга кыттабын




 

Сайт зарегистрирован в Федеральном Агентстве
по информационным технологиям
Свидетельство №11945 от 6 мая 2008 года

Автор проекта - Синильга
сайт открыт 17 августа 2007 © Ырыа кырдала
Условия использования материалов, размещенных
на сайте «Ырыа кырдала»

Доступ к сайту бесплатен для пользователей
Экспресс-Сеть, Гелиос-ТВ, ЯГУ, Наука, Оптилинк, Сахаспринт и по льготному пиринговому тарифу
для сетей ADSL и "Столица" (7 коп./1 мб).