Дьону кэрэ эйгэтигэр сыһыарар аналлаах
 (голосов: 0)
Дьону кэрэ эйгэтигэр сыһыарар аналлаахИлин эҥэргэ тыа кулуубун үлэтин эҥкилэ суох хас да сыл салайан кэлбит биллэр-көстөр киһинэн Анна Холмогорова аатын истибитим балай эмэ буолла. Киин куораппыт кэрэ эйгэтигэр үлэлиир дьон Төхтүр бөһүөлэгэр сэргэх тэрээһиннэр баралларын туһунан сэһэргээбиттэрэ ыраатта. Үлэтин сүрүн туһаайыытын сыл эргиирин тутуһан, дьону түмэн, суолталаах үлэни ыйдарынан ситимнээн киэҥ хабааннаах тэрээһиннэри ыытарын дьон сэргиир, сөҕөр.

Олоҕун сорох өттүн культураҕа анаабыт киһибит соһуччу түгэҥҥэ көрсүһүүбүтүгэр олоҥхо курдук уһун кэпсээннээх, ис-иһиттэн иэйиилээх, баһаам элбэх кэрэ санаалардаах буолан биэрдэ. Ол курдук, кэпсээнин тыа сирин дьонуттан саҕалаата. Кинилэр сырдык ыра санааларыттан дуоһуйан, онтон тирэҕирэн үлэлиирин биллэрдэ. Саха дьиҥ культурата тыа сирин дьонун ис дууһатыгар бүгэн, саһан сытарын таһаарарга өбүгэлэрбит өркөн өйдөрүн, саргылаах санааларын салҕаан айа-тута сылдьар.

Анна Холмогорова ырыа туһунан манныгы эттэ: «Сахалыы ырыаны саха эрэ барыта сэҥээрэр. Биһиги бөһүөлэкпит ырыа куттаах. Хоһоон айар, ырыа матыыбын суруйар дьоннордоохпутунан киэн туттабын. Биллэр дьоннорбутун Антонина Гаврильеваны, Василий Винокуровы, Владимир Кузьмины, Иван Аргуновы кытары бииргэ алтыһан үлэлиибин. Биһиэхэ элбэх ырыаһыт кэнсиэртии тиийэр сирэ. Эдьиий Марыынаны көрөөччүлэрбит сүһүөххэ туран көрсөллөр. Сахаайа уонна Александр Бурнашовтар гастроллуу тиийбиттэригэр саала иһэ толору дуоһуйа, астына көрбүтэ. Кэлиҥҥи кэмҥэ Сардаана Осипова иккис тыынын ылан, ырыа киэҥ эйгэтигэр киирбитэ үөрдэр. Аскалон Павлов элбэх көрөөччү кэтэһэр ырыаһыта. Биир түгэнтэн артыыс киһи быһыытынан хайдаҕын, ис культуратын сыаналыахха син. Холобур, аҕыйах сыллааҕыта сотовай телефон киирэ илигинэ сорох ырыаһыттар гастроллуу тиийдэхтэринэ, кулууп дьиэтиттэн 8 сыыппара нөҥүө атын улуустарга, куораттарга хачыгыраччы эрийэн киирэн барааччылар, оттон Аскалон Павлов оннук гыммат этэ. Кини эрдэттэн бэйэтин кытары переговорнай карточкалаах кэлээччи, ол көмөтүнэн сибээстэһээччи. Билигин ырыаһыт дэнээччи элбээтэ. Зарина диэн дэгэрэҥи толорор эдэр ырыаһыты сэҥээрэбин. Саҥа олох тэтиминэн олорор кыыс кэрэ куолаһынан ыллыы-туойа сылдьара көрүөххэ-истиэххэ астык».

Михнаса АТЛАСОВА

01.08.2009

Нөрүөн-нөргүй буоллун биһиги саайтпыт ыалдьытыгар! Билигин эн ыалдьыт курдук киирдин. Бэлиэтэнэн киирдэххинэ бу сиртэн элбэҕи бэйэҕэр туһаныаххын сөп.
Майгынныыр сонуннар:

« Төттөрү
Ырытыылар (0)
 

Ырытыыга кыттабын




 

Сайт зарегистрирован в Федеральном Агентстве
по информационным технологиям
Свидетельство №11945 от 6 мая 2008 года

Автор проекта - Синильга
сайт открыт 17 августа 2007 © Ырыа кырдала
Условия использования материалов, размещенных
на сайте «Ырыа кырдала»

Доступ к сайту бесплатен для пользователей
Экспресс-Сеть, Гелиос-ТВ, ЯГУ, Наука, Оптилинк, Сахаспринт и по льготному пиринговому тарифу
для сетей ADSL и "Столица" (7 коп./1 мб).