| Афоима |
| 13 июня 2009, 08:57 | Көрдүлэр: 15073 | Ыстатыйалар |  |
 Ураты кэрэ куоластаах Афоима Чурапчыттан төрүттээх. Маннык бэрт дьикти ааттаах кыыс биэс бииргэ төрөөбүт кыргыттартан саамай кыралара. Кини билигин М. Жирков аатынан Дьокуускайдааҕы муусукаҕа идэтийбит үөрэх кыһатыгар фольклор салаатыгар ситиһиилээхтик үөрэнэр устудьуон киһи. Үксүн сүтэн, симилийэн эрэр сахалыы ырыалары толорор. Авторскай да ырыалардаах.Кыыс төрөппүттэрэ - аҕата Афоня, ийэтэ Марфа - бэйэлэрин ааттарын холбоон, кинини Афоима диэн сүрэхтээбиттэр. Кыра оҕо эрдэҕиттэн ырыаҕа таласпыт, ол курдук, 6 кылааска үөрэнэ сылдьан, тойук бөлөҕөр дьарыктаммыт. 8 кылааска «Дьурулуйар Ньургун Боотур» олоҥхоттон Туйаарыма Куо оруолун толорбут. Бу оруолунан кини хас да күрэххэ кыттан лауреат буолбут. Ону тэҥэ хомус бөлөҕөр оонньоон, эмиэ элбэх куонкурустарга кыттыбыт. Улуустарынан күрэхтэһиигэ «Ала буурай аттаах Мохсоҕоллой Боотур» диэн К. Никифоров олоҥхотун туруоран 1 миэстэ буолаллар. Манна Афоима сүрүн герой «Сэгэйэ Куо» оруолун толорбута. Уонна улуустарынан сылдьан олоҥхолору көрдөрөн, элбэхтик кэнсиэртээбиттэрэ. «Алаас сибэккилэрэ» күрэххэ ыллаан, «Кылыһахтаах куолас» диэн ааты сүкпүт. 2003с. ыла «Хотугу сулус» диэн оҕолорго аналлаах республикатааҕы ырыа күрэҕэр кыттыбыт уонна 2005с. «Бастыҥ сахалыы эстраднай ырыаны толорооччу» диэн ааты сүгэн лауреат буолбут. Ол кэннэ «Веселые нотки» күрэххэ ыллыыр. 2008с. кэрэ куолар «Туйаарыма Куо» күрэхтэригэр «Талба талаан Куо» аатын сүүйэр. Быйылгы «Ыллаа, эдэр саас!» ырыа түһүлгэтигэр кыттыбыта. Кини толоруутугар ырыалары истибит дьон ураты куолаһын бэлиэтииллэр. Кэлиҥҥи кэмҥэ Афоима араас тэрээһиннэргэ элбэхтик кыттар. Соторутааҕыта «Арчы дьиэтигэр» ыытыллыбыт бэлиэ түгэҥҥэ Афоима ыллыырын истэн олорбут Варя Аманатова бэйэтин кытары гастролга ыҥырда. Сарсын, бэс ыйын 13 күнүгэр Евгений Прокопьев авторскай биэриитигэр АФОИМА толоруутугар сахалыы ырыаны истэргитигэр ыҥырабын. Михнаса АТЛАСОВА |
|
Нөрүөн-нөргүй буоллун биһиги саайтпыт ыалдьытыгар! Билигин эн ыалдьыт курдук киирдин. Бэлиэтэнэн киирдэххинэ бу сиртэн элбэҕи бэйэҕэр туһаныаххын сөп.
Майгынныыр сонуннар:
|
« Төттөрү
Ырытыылар (2)
