Валерий Ноев 70 сааһын көрсө
 (голосов: 1)
Валерий Ноев 70 сааһын көрсө(Валерий Ноев айымньыларынан Өрөспүүбүлүкэтээҕи инструментальнай дьүһүйүү күөн-күрэһэ)

«Быраһаай, күөх сайын барахсан!», «Мин дууһам ыллыыр», «Киһиэхэ төрөөбүт дойдута», «Күөрэгэйдиин көрсүһүү», «Кыракый уолчааным», «Кыракый кыысчааным», «Кыыс Амма», «Току-току ньээм-ньээм», «Хатыҥчааным барахсан» диэн биллэр ырыалар ааптардара, мелодист Валерий Ноев 70 сааһыгар анаммыт күөн-күрэс Өксөкүлээх аат. Култуура киинигэр буолан ааста.

Манна Мэҥэ Хаҥаластан, Уус Алдантан, Тааттаттан, Бүлүүттэн, Кэбээйиттэн, Үөһээ Бүлүүттэн, Намтан, Ленскэйтэн тиийэ кэлэн уонна Дьокуускай куораттан үгүс киһи кытынна. Күрэх үс түһүмэхтээх. Бастатан туран, үрдүк маастарыстыбаны көрүү, иккиһинэн, Валерий Ноев ырыаларыгар оҥоһуллубут инструментальнай айымньы, үсүһүнэн, ханнык баҕарар сөбүлүүр, талбыт айымньыны толоруу.

Дьоро киэһэҕэ Ваперий Ноев кэргэнэ, уола Валерий Валерьевич уонна үгүс аймаҕа ыалдьыттаатылар. Тэрийээччилэр: Өксөкүлээх аатынан Норуот айымньытын киинэ, өрөспүүбүлүкэ Байаныыстарын ассоциацията, Ырыа айааччылар сойуустара. Киэһээҥҥи кэнсиэри СӨ Ырыа айааччыларын сойууһун бэрэссэдээтэлэ Алексей Егоров салайан ыытта.

Түмүктэр:

1 миэстэни Намнааҕы муусука оскуолатын выпускниктара,

2 миэстэни Мэҥэ Хаҥапас улууһун Майатааҕы норуодунай оркестр ылла.

Үһүс бириистээх миэстэҕэ Таатта улууһун мусукаалынай оскуолатын преподавателлэрин ансаамбыла тигистэ. (Ансаамбыл 2-12 киһилээх, оркестр 12-тэн элбэх киһилээх С.Т.)

Биирдиилээн солистарга лауреат үрдүк аатын Иннокентий Романов ылла.

Ону таһынан үс тус-туһунан номинацияҕа, биирдиилээн толорууга лауреаттар, дипломаннар ааттаннылар.

Уопсай күрэс туһунан

Дьүүллүүр Сүбэ бэрэссэдээтэлэ, АГИКИ доцена, СӨ искусствотын үтүөлээх деятелэ Радомир Пантелеймонович Борисов:

— Билигин тэнийбит попса муусукатынааҕар дьиҥнээх, тыыннаах доҕуһуол хаһан баҕарар инники күөҥҥэ сылдьар. Биллиилээх ырыаһыттарбыт Алексей Егоров, Степан Васильев, Сергей Попов, Анастасия Лыткина, Марыына Попова, Раиса Захарова, Иван Степанов, Альбина Борисова үөрүүнү кытта байаанынан ыллыыллар.
Мин саныахпар, саха муусуката ис тыынын сүтэриэ суохтаах. Биһиэхэ арҕааҥҥы муусука сабыдыала күүстээх. Холобур, билиҥҥи биир эмэ сахалыы ырыаны атын омук тылынан тылбаастаан баран ыллаатахха, бу саха ырыатын матыыба диэн ким да билиэ суоҕа. Оннук буолан хаалла. Ырыа айааччылар, мелодистар ону инникитин учуоттууллара буоллар. Ырыаҕа сахалыы тыыны, кылыһаҕы, матыыбы киллэрэн биэриэххэ.

Бүгүн Ленскэйтэн кэлбит дуэт олус үчүгэйдик оонньообутун бэлиэтиэххэ сөп. Нуучча оҕолоро сахалыы матыыбы бэркэ оонньууллара, саха култууратын-муусукатын үөрэтэллэрэ кэрэхсэбиллээх, хайҕаллаах.
Күрэс бары кыттыылаахтара Дьүүллүүр Сүбэ тэрээһин иһин сүүрбүт-көлпүт Саргылаана Саввична Адамоваҕа дириҥ махталбытын тиэрдэбит.

Иннокентий Романов, аккомпаниатор:

үгүҥҥү күрэх таһыма үрдүк, кыттааччылар мусукаалынай оскуола үөрэнээччилэрэ, ДьМК, АГИКИ устудьуоннара. Мин урут ДьМК, «Саха» НКИК үлэлии сылдьыбытым. Билигин мөлтөхтүк көрөр оҕолор интэринээт оскуолаларыгар мусукаалынай салайааччыбын.

Майатааҕы норуодунай аркыастыр салайааччыта Д.В. Винокурова:

— Биһиги бүгүн 19 буолан кэллибит. Көрөргүт курдук, кыттааччы олус элбэх. Биһиэхэ оркестр күрэҕэ 4 сылга биирдэ эрэ буолар. Бииргэ устудьуоннаабыт доҕотторбут Саха сирин араас улууһугар үлэлии сылдьаллар. Кинилэри көрсөммүт сүргэбит көтөҕүлүннэ.

Алексей Егоров, СӨ үтүөлээх артыыһа, СӨ Ырыа айааччыларын сойууһун бэрэссэдээтэлэ:

— Мусукааннар Ноев айымньыларынан (ырыаларынан) инструментальнай толорууну киэһээҥҥи гала-кэнсиэригэр Өксөкүлээх Киинин толору саалатыгар тахсан толорбуттарыттан олус астыннылар. Дьон-сэргэ аҥаардас ырыаны эрэ буолбакка, Валерий Ноев айымньыларыгар инструментальнай дьүһүйүүлэри сэргээтилэр. Кэнсиэр кэмигэр В. Ноев сахалыы караокеҕа киирбит ырыаларынан күөн күрэстэстилэр.

Валерий Ноев үбүлүөйүгэр анаммыт тэрээһин саҕаланна. Аны сайын кини ырыаларын толорууга куонкурус буолуоҕа.

Светлана ТИМОФЕЕВА

«Кыым», 2009 с., кулун тутар 19 күнэ, 10№


 
Нөрүөн-нөргүй буоллун биһиги саайтпыт ыалдьытыгар! Билигин эн ыалдьыт курдук киирдин. Бэлиэтэнэн киирдэххинэ бу сиртэн элбэҕи бэйэҕэр туһаныаххын сөп.
Майгынныыр сонуннар:

« Төттөрү
Ырытыылар (0)
 

Ырытыыга кыттабын




 

Сайт зарегистрирован в Федеральном Агентстве
по информационным технологиям
Свидетельство №11945 от 6 мая 2008 года

Автор проекта - Синильга
сайт открыт 17 августа 2007 © Ырыа кырдала
Условия использования материалов, размещенных
на сайте «Ырыа кырдала»

Доступ к сайту бесплатен для пользователей
Экспресс-Сеть, Гелиос-ТВ, ЯГУ, Наука, Оптилинк, Сахаспринт и по льготному пиринговому тарифу
для сетей ADSL и "Столица" (7 коп./1 мб).