Былырыыҥҥыттан ыла республикаҕа тыыннаах музыканы тилиннэрэр, сайыннарар, тарҕатар сыаллаах көһө сылдьар «Дохсун Дорҕоон» диэн ааттаах тэрээһин ыытыллар буолла. Былырыын тэрийээччилэр көҕүлээһиннэринэн («Frozen East», «103», «Happy Chack» бөлөхтөр) олунньу ый 27 күнүгэр Өксөкүлээх
аатынан СК республика араас муннуктарыттан 7 бөлөх кэлэн тыаһаан барбыт буоллаҕына, быйыл аар-саарга аатырбыт, номох буолбут «Чолбон» рок бөлөхтөөх, Тумус Мэхээлэ курдук бөлөһүөк, ураты дьоннордоох Үөһээ Бүлүүгэ буолан ааста.

Кэнсиэргэ барыта Дьокуускайтан, Горнайтан, Үөһээ Бүлүүттэн уонна Сунтаартан уон биир бөлөх кыттыыны ылла. Кэнсиэри Ыччат сылынан Үөһээ Бүлүүтээҕи ыччат отдела (нач. Ычыров Н.А., сүрүннүүр спец. А.В. Захаров), «Мохсоҕол» бөлөх көҕүлээн, иилээн-саҕалаан ыыттылар. 

Кэнсиэр иннинэ чолбоннор оҕолору кытары уопсай көрсүһэн сэһэргэстилэр. Кинилэр араас ыйытыыларыгар хоруйдаатылар. Ол кэннэ кэлбит ыалдьыттар бары Кирилл Никифоров бэйэтин илиитинэн туппут, үлэҕэ киллэрбит Арчы дьиэтигэр сырыттылар. Киэһээ кэнсиэри «Төлөн» бөлөх арыйда (салайааччы В.Федотов) састааптара барыта 6 кылаас оҕолоро. Былырыыҥҥыттан биллэ сайдыбыттар. Соло гитаристара даҕаны, барабанщиктара даҕаны быйыл ордук эбиллибиттэр. Ол кэннэ бэйэлэрин түөрт ырыаларын «Дьүкээбил» 11 кылаас үөрэнээччилэрэ бөлөх ыллаан-туойан таҕыста (салайааччы В. Федотов). Бу бөлөх былырыыҥҥы оонньуур тэтимин илдьэ сылдьара көһүннэ, иннин диэки эбиллии көстүбэт. «Frozen East» (салайааччы А. Неустроев) бөлөх быйыл олус үчүгэйдик оонньоон барда. Састааптарыгар эбиллии баар буолбут, эбии инструменнаммыттар - клавиша уонна труба, туох да диэбит иһин уратытык тыаһаан бардылар. Сунтаартан кыттыыны ылбыт «Four mad» уонна «made Style» бөлөхтөр тыыннаах музыкаҕа дьон киинигэр киэҥник тахсыбыттара көһүннэ. Сиэн Тиитэп салайааччылаах «made Style» бөлөх эбиллибиттэрэ, үрдээбиттэрэ арылхайдык көстөр. Инникитин бэйэлэрэ туспа буочарданан Саха сиригэр эрэ буолбакка убайдара Айталлар курдук аан дойдуга аатырыахтарын баҕарыллар. Ону тэҥэ Үөһээ Бүлүү Оҥхойуттан «Дабаан», бэйэтиттэн «Мохсоҕол» бөлөхтөр састааптара бары оскуола оҕолоро буолаллара сөхтөрдө да, үөртэ да. Горнайтан «Дапсы» бөлөх бас-гитариһа Николай Осипов салайааччылаах «Сайыы» бөлөх, Дьокуускайтан кэлбит студеннар кыттыылаах «Happy Chack» бөлөх эмиэ тыыннаах музыка кэрэтин дьон өйүгэр-санаатыгар иҥэрдилэр.Онтон Үөһээ Бүлүүгэ 90-с сыллардааҕы ыччакка хит буолбут ырыалардаах «Уолан» бөлөх кыттыыны ылбыта элбэх сүрэҕи сүүдүттэ, ытыс тыаһынан доҕуһуолланна. Онтон киин куораттан эмискэ тэтимнээх ырыанан, саха рок музыкатыгар «тяжелый металл» диэн саҥа сүүрээни киллэрбит «Күн тахсыыта» рок-бөлөх бу кэнсиэри сэргэхситтэ. Түмүгэр «Кэнсиэрт арыйыыта» номинацияны «Төлөн» бөлөх, «Бастыҥ салайааччы» аатын Владимир Федотов, «Бастыҥ барабанщик» - «Frozen East», «Бастыҥ солист»-«Дабаан», «Бастыҥ соло-гитарист»-«made Style», «Бастыҥ бас-гитарист»- «Уолан», «Кэскиллээх бөлөх»-«Мохсоҕол», «Бастыҥ клавишник»-«Сайыы», «Бастыҥ авторскай ырыа»-«Frozen East», «Тэтимнээх бөлөх»-«Күн тахсыыта» уонна «Бастыҥ бөлөх» аатын «made Style» ыллылар. Бу кэнсиэр тыыннаах музыка Сахабыт сирин биир гына ылан эрэрин, саҥа бөлөхтөр эбиллибиттэрин үтүө туоһута буолла.

 

Түгэнинэн туһанан тэрийээччилэр «Чолбон» бөлөххө аппаратуратын иһин, П.Н.Тобуруокап аатынан СК үлэһиттэригэр «Кэскил» бөлөх салайааччытыгар Р.Кысылбаиковка, Н.Николаевка уонна бары күүс-көмө буолбут дьоҥҥо махталларын тириэрдэллэр.  

 

ЫТЫС

 

Автор хаартыскаҕа түһэриитэ