| Уус-Алдан ырыа айааччыларын холбоһугун салалтата уларыйда |
| 15 декабря 2008, 14:38 | Көрдүлэр: 20232 | Ыстатыйалар |  |
|
Бу холбоһук бэрэссэдээтэлинэн Бороҕонтон Василий Петухов талылынна. Быйылгы форум улуус ырыа айааччыларын холбоһуга тэриллибитэ 30 сылыгар ананна. Бу бэлиэ күн чэрчитинэн улуус ырыаны айааччыларын күрэҕэ ыытылынна. Күрэҕи улуус дьаһалтатын культура салаата тэрийэн ыытта. Бу күрэх ырыа айааччылар холбоһуктарын бу иннинээҕи бэрэссэдээтэлин, Россия уона Саха Өрөспүүбүлүкэтин культуратын үтүөлээх үлэһитин, «Россия 2006 с. бастыҥ киһитин», «Саха Сирин 2007 с. бастыҥ киһитин», аар саарга аатырбыт «Кэнчээри» ансаамбыл салайааччытын Василий Парников өр сыллаах таһаарыылаах үлэтин көрдөрдө. Василий Парников саха ырыатын сайдыытыгар сүдү кылааттаах, саҥа көлүөнэ айар үлэһиттэри иитэн таһаарбыт, түмсүүлээх, доҕордуу, эйэҕэс буолууну ситиспит киһинэн буолар. Ырыа күрэҕэ ырыаны толорууга саҥа ньымалары арыйда, ырыа ис хоһоонугар, матыыбыгар ирдэбиллээх буолла, эдэр дьоҥҥо бэйэлэрин айар үлэлэрин киэҥ араҥаҕа таһааралларыгар кыах биэрдэ. Биллиилээх мелодист, Саха Сирин ырыа айааччыларын холбоһугун бэрэссэдээтэлин солбуйааччы Степан Васильев салалталаах Дьүүллүүр Сүбэ үлэлээтэ. Дьүүллүүр Сүбэ быһаарыыта маннык буолла: ДИПЛОМАННАР: 3 степеннээх - Иван Бурцев, Елена Черепанова. 2 степеннээх - Станислав Луковцев, Владимир Ушницкай. 1 степеннээх - Надежда Протопопова, Федот Местников. ЛАУРЕАТТАР: 3 степеннээх - Василий Парников. 2 степеннээх - Василий Фёдоров. 1 степеннээх - Ньургун Бурцев. ГРАН-ПРИ - Василий Петухов. Бу күн дьон биһирэбилин, хайҕабылын Василий Петухов ылыан ылла, чахчы да кини өрөгөйдөөх күнэ буолла. Саҥа кыайыылаах саҥа дуоһунаска киирдэҕэ. Василий Петухов кыра эрдэҕиттэн ырыаны сөбүлүүр, элбэх ырыа ааптара, ырыаһыт, баянист. Инникитин даҕаны кини Василий Парников курдук дьоһуннук бу дуоһунаска үлэлиэ диэн эрэнэбин. Миигин Уус-Алданнар сахалыы ырыаҕа сиэрдээх сыһыаннара, сөпкө туһаныылара, ырыаны үрдүк таһымнаахтык толоруулара куруутун сөхтөрөр. Бу чуолаан биллиилээх хормейстер Васильев уонна кини уһуйуллааччыта Парников үтүөлэрэ, өҥөлөрө эбит диэн түмүккэ кэллим. Уус-Алдан улууһун дьаһалтата саха культуратын бу биир улахан хайысхатын өйүүрэ, өйдүүрэ үөрдүбэт буолуон сатаммат. Бу күн мелодистарга элбэх грамота, махтал сурук, араас бэлэх туттарылынна. Оттон аныгыскы нэдиэлэҕэ Майаҕа Марина Попова аатынан оҕо музыкальнай оскуолата тэриллибитэ 50 сылыгар аналлаах тэрээһин буолара күүтүллэр. Владимир ИНДИГИРСКЭЙ, Саха Өрөспүүбүлүкэтин ырыа айааччыларын сойууһун чилиэнэ 2008 с., ахсынньы 12 күнэ Уус-Алдан, Бороҕон Синильга тылбааһа |
|
Нөрүөн-нөргүй буоллун биһиги саайтпыт ыалдьытыгар! Билигин эн ыалдьыт курдук киирдин. Бэлиэтэнэн киирдэххинэ бу сиртэн элбэҕи бэйэҕэр туһаныаххын сөп.
Майгынныыр сонуннар:
|
« Төттөрү
Ырытыылар (1)
