| Ийэ күнүгэр ананар: Ырыа куттаах Ийэ уонна Кыыс |
| 19 октября 2008, 10:02 | Көрдүлэр: 18477 | Ыстатыйалар |  |
 Татьяна уонна Уля Сергучевалар. Сергучевтар республикаҕа музыкальнай дьиэ-кэргэн быһыытынан киэҥник биллэллэр. Татьяна Афанасьевна кыыһынаан, Уля кыра эрдэҕиттэн, сценаҕа тахсар буолуоҕуттан ыллыыллар. Уля “Сайыҥҥы сарсыарда” диэн ырыатын кини бастакы айар концерыгар дуэттаабыттар. Инникитин өссө да дьиэ кэргэнинэн ыллыыр былааннаахтар. — Уля миигин кытта ыллыырын сөбүлүүр, бэйэтэ маннык ырыаны ыллыахха диэн көҕүлүүр. Мин урукку репертуарым ырыаларын араас концертарга толорор, ол да иһин мин хайдах ырыалары сөбүлээн ыллыырбын билэр буолан, этинэн-хаанынан боруобалаан ыллаабыт буолан, репертуарбытын сөпкө талар. Уонна аҕабыт барытын истэ сылдьан сүбэлиир, ырыабытын оҥорторор. Ийэлэргэ, кыргыттарга уонна айар дьиэ кэргэттэргэ этиэхпин баҕарабын — төһөнөн уһуннук эһиги биир дьиэ кэргэнинэн айымньылаах үлэҕит сайдар, тупсар да, оҕолоргутун, төрөппүттэргитин кытта өйдөһөргүт,өйөһөргүт бөҕө, тирэхтээх буолуоҕа, — диэн Татьяна Сергучева санаатын үллэстэр. Марина Силина уонна Полина Кожина. Саха Республикатын үтүөлээх артыыската, Суорун Омоллоон аатынан Опера уонна балет театрын солистката Марина Силина 7 саастаах кыыһа Полина эмиэ ийэтин курдук кыратыттан ыллыырын сөбүлүүр. 2007 сыллаахха 52 №-дээх “Белочка” оҕо саадыгар ыытыллыбыт куораттааҕы куонкуруска бастакы миэстэни ылбыт. Кинини манна уус-уран салайааччы Светлана Владимировна Филатова бэлэмнээбит. Полина билигин 26 №-дээх орто оскуолаҕа туйгуннук үөрэнэр. Оскуолаҕа үҥкүү ансамблыгар Наталья Степановна Лукинаҕа дьарыктанар. Итиэннэ 5 №-дээх орто оскуолаҕа “Реверанс” бальнай үҥкүү ансамблыгар олус сөбүлээн сылдьар. Маны таһынан музыкальнай училищеҕа педагогическай практика секторыгар уһуйуллар. Композитор Николай Берестов үбүлүөйүгэр ыллаан биһирэбили ылбыта. Онон кыысчаан кэрэ эйгэтигэр кыратыттан сыстыбыта ийэтэ Марина Владимировнаттан талааны утумнаабытын кэрэһилиир. Полина аҕата Александр Иванович аккордеоҥҥа оонньуур. Бэйэтэ эмиэ ыллыырын сөбүлүүр. Кини ийэтэ ырыаһыт эбитэ үһү. —Кыыспынаан улахан сценаҕа аан бастаан иккиэн тахсарбыт ураты, дьикти-кэрэ, долгутуулаах түгэн буолуо, — диир Марина Силина. Анастасия уонна Ульяна Готовцевалар. Анастасия Готовцева артыыс быһыытынан 2002 сыллаахтан Эстрада театрыгар Саха Республикатын народнай артыыһа Аркадий Алексеев айар бөлөҕөр үлэтин саҕалаабыта. Эмиэ ити сыл бастакы дискэтэ күн сирин көрбүтэ. 2003 сыл кулун тутарга Дьокуускай куоракка иккис айар концерын оҥорбута. Ол кэмҥэ киниэхэ СР культуратын туйгуна ааты иҥэрбиттэрэ. Инники былааныгар үһүс дискэни таһаарарга репертуарыгар үлэлэһэ сылдьар. Анастасия кыыһа Ульяна 1995 сыллаахха күн сирин көрбүтэ. Билигин Музыка үрдүкү оскуолатыгар флейта кылааһыгар алтыс сылын ситиһиилээхтик үөрэнэ сылдьар. Ийэтинээн сценаҕа олох кыратыттан тахсар. — Оскуолаҕа антах үрдүттэн олорон үөрэнэр буолан, сороҕор наһаа өр көрсүбэппит. Ол да буоллар, төһө кыалларынан бииргэ буола сатыыбыт. Төһө да соҕотох, кэтэһиилээх оҕо буоллар, Ульяна сүрдээх самостоятельнай, тулуурдаах, олоххо бэйэтэ туспа көрүүлээх, музыкант буолар улахан баҕа санаалаах. Билигин ырыабын флейтаҕа оонньоон киэргэтэр. Ол иһин сценаҕа сүрдээх холкутук туттар. Мин олохпун сценаҕа, ырыаҕа анаабыт буоламмын онтон үөрэбин эрэ, — диир Анастасия Иннокентьевна.  Ангелина, Ирена, Розалина Файрушиналар.Ангелина Файрушина ийэтэ учуутал Ирина Ильинична Михайлова ыллыырын сөбүлүүр буолан, оҕолоро эмиэ кыра эрдэхтэриттэн бары ыллыыллар. Дьиэ кэргэн ансамблын быһыытынан дойдуларыгар, Сунтаар Хаданыгар кулуупка тутаах дьон этилэр. Дьиэлэриттэн кулууп чугас буолан, кыракый Ангелина концертары көтүппэт этэ. Ол иһин олоҕун айар үлэни кытта ситимнээбитэ. Идэтинэн культура үлэһитэ, кэлин СГУ саха салаатын бүтэрбитэ. Ырыаһыт, мелодист быһыытынан республика көрөөччүлэригэр киэҥник биллэн барбыта уонча сыл буолла. Ангелина Егоровна кыргыттара эмиэ ырыа алыбар ылларан, билигин ийэлэрин кытта тэҥҥэ ыллыыр дьон. Улахан кыыс Ирена 19 саастаах, культура уонна искусство колледжыгар үөрэнэр. Розалина 14 саастаах, 17 №-дээх орто оскуолаҕа 8-с кылааска үөрэнэр. Кыргыттар иккиэн эбээлэрин ааттарын сүгэллэр. Кыра кыыс 3 саастааҕыттан гастролга тэҥҥэ сылдьыһан, оннооҕор кулиса кэннигэр утуйан да хаалар түгэннэрэ баар буолар этэ. Оҕолор ырыаны-тойугу таптыыр буоланнар, оскуолатааҕы кэмнэриттэн Сунтаарга “Тулуйхан” студия иһинэн “Мозаика” ансамблга ыллаабыттара. Файрушиннар дьиэ кэргэн саамай махтанар дьонноро Светлана, Егор Неустроевтар. — Мин бэйэм айар суолбун өр көрдөөбүтүм диэххэ сөп. Дьиэбитигэр бары учуутал буоланнар, бастаан Хабаровскайга учуутал үөрэҕэр барбытым. Ол эрээри ырыам син биир тарда сылдьар этэ, дойдубар ыал буолбутум. Сөбүлүүр идэбинэн Сунтаар кулуубугар 20-чэ сыл үлэлээбитим. Ийэм оһуохайдыыр этэ, баҕар ол иһин да буолуо, мин ырыаларым оһуохай тэтимнээхтэр, — диир Саха Республикатын культуратын туйгуна Ангелина Файрушина. Лина уонна Айыына Акимовалар. Айыына эмиэ кыра эрдэҕиттэн ыллыыр, оскуола тэрээһиннэригэр өрүү кыттар. Куолаһа намыһах, кылыһахтаах буолан, ордук Аркадий Алексеев “Күөрэгэйин” сөбүлээн толорор. Билигин 17 №-дээх орто оскуолаҕаүөірэнэр. Иллэҥ кэмигэр музыкальнай училищеҕа фортепианоҕа педпрактикаҕа үөрэнэр. Акимовтар дьиэ кэргэн ырыа куттаах. Ыал аҕа баһылыга Афанасий Егорович ырыаһыт, музыкальнай училищены бүтэрбитэ. Линалаах Афанасий студенныы сылдьан холбоспуттара быйыл олунньуга 15 сылын туолбут. Онон ырыа эдэр сүрэхтэри холбообута, түмпүтэ. — Ыллаатахха киһи дууһалыын сырдыыр, ырааска тардыһар. Мин аҕам ыллыыра, сахалыы туойара, уһана сылдьан киҥинэйэрэ. Кини куолаһа миэхэ арааһа бэриллэн, ырыаһыт буоллаҕым. Оскуолаҕа үөрэнэ сылдьан ырыа айарга холонорум. Билигин 20-чэ ырыалаахпын. Бу соторутааҕыта саха телевидениетигэр “Олоҥхо тыла” ырыабар клип таҕыста. “Туймаада” ансамблга үлэлээбитим 20 сыл буолла. Аны күһүн айар биэчэрбин тэрийэр баҕалаахпын, - диэн кэпсиир Лина Акимова. Уруйдаана Харитонова уонна Сайсары Куо. Уруйдаана айылҕаттан талааннаах кыыс буолан оҕо эрдэҕиттэн ыллыыра, ырыа айарга холоноро. Ол да иһин оскуола кэннэ музыкальнай училищеҕа үөрэммитэ. Кэлин СГУ культурология салаатын бүтэрбитэ. Ырыа эйгэтэ кини олоҕун доҕорун, саха биир чаҕылхай талаанын Степан Семеновы кытта көрүһүннэрбитэ. Онон күҥҥэ көрдөрбүт кыысчааннара икки талаан утума буолар. Сайсары Куо эмиэ төрөппүттэрин батан кыратыттан ыллыы үөрүйэх. Бастакы ситиһиитинэн “Сардаҥалаах аартык” республикатааҕы ырыа куонкуруһугар лауреат буолбута. Музыкальнай оскуола фортепиано кылааһын туйгуннук бүтэрбитэ. Аны улахан сценаҕа холонон, киэҥ араҥаҕа “Саҥа ырыа” куонкуруска иккис төгүлүн кыттан ситиһиитин чиҥэттэ. Бу аҕыйах хонуктааҕыта Сайсары Куо “Этигэн хомус” музыкальнай бириэмийэ “Сыл бастыҥ саҕалааччыта” номинация хаһаайкатынан буолла. Кини билигин 9-с кылаас кэннэ Дьокуускайдааҕы музыкальнай колледжка үөрэнэр. — Кыыспынаан иккиэн дьүөгэлии курдукпут, бэйэ-бэйэбитин өйдөһөбүт, өйөһөбүт. Оҕом кыратыттан оттомноох, улаатан сайдан иһэр, туохха барытыгар айымньылаахтык сыһыаннаһар, сахалыы тыыннаах. Төрөппүт быһыытынан айар өттүгэр сүбэлиибин. Бэйэ-бэйэҕэөійдөһүү, өйөһүү баар буоллаҕына, ханнык да ыараххаттары туоруугун. Дьиэ кэргэн сылыгар хас биирдии дьиэ кэргэҥҥэ харыстабыллаах сыһыаны баҕарабын, — диэн Уруйдаана Николаевна ба±а санаатын тириэрдэр. Сахабыт сиригэр хайдахтаах курдук талааннаах төрөппүттэр уонна оҕолор баалларын, кырдьык да, киһи сэргии, киэн тутта, астына көрөр. Ийэ уонна кыыс сиэттиспитинэн үөрүүлэрин, сырдык санааларын, истиҥ иэйиилэрин бар дьонноругар ырыа дьикти дорҕоонунан үллэстэллэриттэн ордук туох күндү бэлэх баар буолуой?! Татьяна Маркова, Саргылаана Данилова «Саха сирэ» хаһыат 2008 с. кулун тутар 6 күнүнээҕи нүөмэригэр тахсыбыт “Утум — ийэ уонна кыыс” диэн матырыйаалтан быһа тардыы. Фотоколлаж «Саха сирэ» хаһыат саайтыттан ылылынна |
|
Нөрүөн-нөргүй буоллун биһиги саайтпыт ыалдьытыгар! Билигин эн ыалдьыт курдук киирдин. Бэлиэтэнэн киирдэххинэ бу сиртэн элбэҕи бэйэҕэр туһаныаххын сөп.
Майгынныыр сонуннар:
|
« Төттөрү
Ырытыылар (0)
.png&width=65&height=65?&cropratio=1:1)
