| Далаана «Таптал туһугар» диэн ааттаммыт айар киэһэтэ түмүктэннэ |
| 28 сентября 2008, 12:23 | Көрдүлэр: 18920 | Ыстатыйалар |  |
|
Кэнсиэр туруорааччы режиссера Евгений Охлопков, иилээн-саҕалаан ыытааччыта Һааска Уол – Александр Максимов. Буолбут сирэ — Государственнай Цирк дьиэтэ. Кэнсиэр үрдүк таһымнаахтык ааһара саарбахтаммат этэ. Далаана иккис кэнсиэрин уратыта, киэргэлэ элбэх. Кыыспыт дьэ мээнэҕэ Цирк дьиэтин талбатах эбит. Көтүөх диэтэххэ көттө даҕаны, чопчулаан эттэххэ, букатын көтө сылдьан ыллаата. Цирк салгынынан көтөр гимнаһа кыыспытын көтөҕөн ылан үөһээ көтүтэн таһаарбыта. Дьэ сүрдээх, хайалара да туох да страховкалара суохтар. Аны туран урут хит буола сылдьыбыт ырыаны английскайдыы букатын массыынанан айаннаан киирэн толордо. Бу ырыатын хата астынным, бэркэ толордо. «Маарынныыр эбиппин» ырыатын аренаҕа мотоциклынан айаннаан киирэн толордо. Ырыаһыт доҕотторун, цирк артыыстарын, үҥкүү бөлөхтөрүн, араас техника (видеоэкрантан саҕалаан массыынатыгар тиийэ) көмөтүнэн хас биирдии ырыа бэйэтэ спектакль курдук. Бу сырыыга хас да нууччалыы ырыаны ыллаата. Ону таһынан бары истэн билэр монгол тылынан «Чадах вэ», «Цаган Шөнө» ырыаларын толордо. 2 чаастан ордук буолбут кэнсиэри олох ыарырҕаппакка биир тыынынан көрдүбүт-иһиттибит. Далаана урукку да, саҥа да ырыаларын барытын ыллаата. Ол курдук, «Тапталга билиниэх», «Бу киэһэҕэ», «Маарынныыр эбиппин», «Аан дойду биһигэ», «Саҥа кэм», «Билэбин» диэн бэйэтин ырыаларын, Анна Барашкова «Таптыыбын», Лэгэнтэй «Нарыйа кыыс» ырыаларын толордо. Далаана ырыаһыт доҕотторун кытта ыллаабыта биэчэри олус киэргэттэ. Ол курдук, Никалыын «Дьүөгэм миэнэ», Лэгэнтэйдиин «Уоттаах таптал», Ый Кыыһынаан «Кэрэ Куо», «North Sound» бөлөҕү кытта «Эн дууһаҥ анала» ырыалары туох да олус бэркэ толордулар. Далаана доҕотторо көрөөччүлэргэ, истээччилэргэ бэйэлэрэ эмиэ ыллаан үөртүлэр. Ника «Күн эдьиий», Лэгэнтэй «Хантан маннык?», Ый Кыыһа «Кыысчааным», «North Sound» «Ийэккэм» ырыаларын бэлэхтээтилэр. Лэгэнтэй фонограммата моһуоктанан, доҕуһуола суох да буоллар, ырыатын олус бэркэ толордо. Аны туран элбэх киһи илии тутуурдаах барда. Киирии билиэттэринэн үрүҥ көмүс, кыһыл көмүс ювелирнай оҥоһуктар, Далаана аудио, DVD диискэлэрин сүүйэн үөрдүлэр-көттүлэр. Маны таһынан ыытааччы Һааска уол 4 көрөөччүнү таһааран ыллатан күрэхтэһиннэрбитэ биэчэр биир табыллыбыт түгэниттэн биирдэстэринэн буолла. Дьэ, чахчы, ыллаабат саха суох диэн маны эттэхтэрэ. Кыттааччылар бары туох да доҕуһуола суох бэркэ ыллаан сөхтөрдүлэр. Дьон ордук 80-ча саастаах, сценаҕа 60-тан тахса сыл ыллаабыт Зинаида «Илиибэр эн илииҥ баар курдук» ырыатын ордорон, ыытааччы бирииһи киниэхэ туттарда. Кэнсиэр түмүгүнэн улахан итэҕэс да суох курдук. Чахчы да дьоро киэһэ буолла. Далаана - биэчэр королевата буолла диэн өссө төгүл бэлиэтиибин. Ырыалара, тас көрүҥэ, таҥаһа-саба, тэрээһин таһыма — барыта мааны, барыта үчүгэй! Онон, билиҥҥи эстрадабыт биир биллиилээх ырыаһыта, саха дьоно сөбүлээн көрөр, истэр мааны кыыһа Далаана, айар үлэҕэр өссө да үрдүк чыпчааллары дабайа тур диэн алҕыыбыт. Таптаа, таптат, таптал туһугар ай, тут! СИНИЛЬГА 2008 с., балаҕан ыйын 27 күнэ |
|
Нөрүөн-нөргүй буоллун биһиги саайтпыт ыалдьытыгар! Билигин эн ыалдьыт курдук киирдин. Бэлиэтэнэн киирдэххинэ бу сиртэн элбэҕи бэйэҕэр туһаныаххын сөп.
Майгынныыр сонуннар:
|
« Төттөрү
Ырытыылар (8)
