| Уля Сергучева – «Крымские волны» күрэх лауреата |
| 13 июля 2008, 21:31 | Көрдүлэр: 18120 | Ыстатыйалар |  |
|
Биир үөрүүлээх сонунунан Аан дойдутааҕы күрэҕи дьүүллүүр сүбэ састаабыгар Россия аатыттан Саха государственнай университетын саха филологиятыгар уонна культуратыгар факультетын доцена Михнаса Атласова ыҥырыллан үлэлээбитэ буолар. Күрэх сыала - эдэр талааннары булуу, өйөөһүн, айар дьоҕурдарын сайыннарыы, айар үлэни көҕүлээһин, эстрада биһирэнэр жанрдарын сайыннарыы, композитордар уонна музыкальнай тэрилтэлэр болҕомтолорун талааннаах ыччакка хатааһын уо.д.а. Күрэххэ 25-гэр диэри саастаах эдэр дьон кыттыыны ылаллар. Күрэҕи идэтийбит ырыаһыттартан, үҥкүүһүттэртэн, биллиилээх эстрада артыыстарыттан уонна поэттартан турар дьүүллүүр сүбэ сыаналыыр. Быйылгы күрэх түмүгүнэн «Күндэл» үҥкүү ансамблын солистара «Фестивальнай» уонна «Оһуор» дуэттарын иһин «Соло уонна дьоҕус формалар» номинацияҕа I степеннээх лауреат дипломун ылары ситистилэр. Оттон Валентина Скрябина соҕотоҕун «Өрөгөй» уонна «Хомус алыптаах дорҕоонноро» үҥкүүлэрин иһин II степеннээх лауреат дипломунан бэлиэтэннэ. «Эстраднай ырыа» номинацияҕа Уля Сергучева-Күннэй III степеннээх лауреат аатын ылла. Манна даҕатан эттэххэ, Күннэй маннык таһымнаах күрэхтэргэ бу хаһыс да сырыытын кыттыыта. Ол курдук, ааспыт өттүгэр «Новая волна-2006» (Москва), «Путь к звездам-2007» (Санкт-Петербург) аан дойдутааҕы күрэхтэргэ ситиһиилээхтик кыттан турар. Продюсер Михнаса Михайловна бэлиэтээбитинэн, Саха сирин оҕолоро маннык күрэхтэргэ төһө да бастакы сэмэй хардыыларын оҥордоллор, бары ыытыллар тэрээһиннэргэ көхтөөх кыттыыны ыллылар. Чуолаан, Валентина «Мисс Ассоль уонна мистер Грей» күрэххэ «Мисс Ассоль» аатын ылары ситистэ. Оттон кумахтан фигуралары оҥоруу күрэҕэр бүтүн саха алааһын бары тутууларын дьэндэтэн таһааран, эмиэ бастакы бириэмийэнэн наҕараадаланна. Күрэх чэрчитинэн оҕолор Александр Грин музей-дьиэтигэр, Иван Айвазовскай хартыыналарын галереятыгар, Феодосия кыраайы үөрэтэр музейыгар уо.д.а. сырыттылар. Быйыл үһүс сылын ыытыллар «Крымская волна» күрэх Украина, Россия, Беларусь, Армения, Молдова, Польша, Казахстан, Латвия уо.д.а. дойдулар ыччаттарын сомоҕолуур биир дьоһун түһүлгэ буолла. Галина НОВИКОВА «Орто дойду сонуннара» хаһыат, 2008 с., от ыйын 10 күнэ, 27 № Хаартыска «Ырыа кырдала» галереятыттан ылылынна |
|
Нөрүөн-нөргүй буоллун биһиги саайтпыт ыалдьытыгар! Билигин эн ыалдьыт курдук киирдин. Бэлиэтэнэн киирдэххинэ бу сиртэн элбэҕи бэйэҕэр туһаныаххын сөп.
Майгынныыр сонуннар:
|
« Төттөрү
Ырытыылар (1)
