Сунтаарга улахан түһүлгэ буолан ааста
 (голосов: 0)
Муус устар 12 күнүгэр Сунтаар улууһугар тыыннаах муусуканы таптааччылар улахан түһүлгэлэрэ Олоҥхо дьиэтигэр буолан ааста. Билиҥҥи техника сайдыбыт үйэтигэр компьютерга таҥыллыбыт бэлэм муусука доҕуһуолу таһымнаабыта биллэр суол. Оттон сахалыы тыыннаах муусука саарына Сиэн Тиитэп сэргэхтик тыынан, толкуйдаан, бэлэмнээн сиэрдээх түһүлгэҕэ муспут ыччаттара, эдэркээн мусукааннара бары дорҕоону киһи сөҕөр тэтимин илиилэринэн охсон, тарбахтарынан оонньоон, атахтарынан битийэн чахчы сөхтөрдүлэр. Саха киһитин ис туругар табыгастах түгэҕиттэн көтөн тахсар кыахтаах киһи ымсыырыах олоруулара бу киэһэ Сунтаар сирин дьиэрэччи ылан кэбистилэр. Куйаар доҕуһуол түһүлгэтигэр кытыннылар «Mada Style», «Foyr mad» (Сунтаардар), «Чолбон» (Үөһээ-Бүлүү), «Тобул» (Мииринэй). Киһи үөрэ долгуйара диэн баар бу бөлөхтөргө искуствоҕа анаан уһуйуллубут дьон суох, бары сахаларын айылгытын уйулҕатын тута сылдьар оҕолор. Арай Сунтаарга искусство оскуолатыгар үөрэнэр сахалыы тыыннарын харыстыыллара дьиҥ айылҕаттан биэрэллэрин күөмчүлүүллэрэ сэрэнэн такайан оонньуулларыгар көстөр. Онон арҕааҥҥы дорҕооннорго аралдьыйан айгырыы иликтэр, дьин сахалыы тыыннарын тута сылдьаллар диэн этиэхпин баҕарабын.
Соҕотох күн да буоллар, сылдьыбыт сыыһы булар диэбиккэ дылы, соргулаах көрсүһүү манна салалынна. Чолбоннор маастар кылаастарын бары да умсугуйдубут, бары араас түөлбэлэринэн үлэлии сылдьар салайааччылар санаабытын астыктык үллэһиннибит. Оонньооччулар кыахтарын иһинэн сатабылларын туоһулаан икки кэнсиэри туруордулар. Биир ыарыыга ылларбыт, биир суолунан баран иһэр, эдэр мусукааннары салайааччылар ыллыктаах хайысханы тутуспаттарын бу түмсүүгэ көрөн итэҕэйдилэр. Саха муусукатын ураты саарына Сиэн Тиитэп бу даҕаны сырыыга киһи ымсыырар хаһаастааҕын биллэрдэ, ол курдук Сунтаардааҕы 1 № оскуола 10 кылааһыгар үөрэнэр Саввинов Алеша охсор-тэбэр тэтимин мустубут дьон бары сөхтүлэр. Аатырбыт номох буолбут Чолбоҥҥо ударнайга олордо. Кини оонньуур «Mada Style» бөлөҕө бэйэтэ туспа буочардаммыт, оонньуур тэтимнэрэ кимтэн да ураты эбит. Ол курдук бөлөх састааба маннык: гитара, вокал Марик Андреев, бас гитара Андреев Артем иккиэн Сунтаардааҕы лицейга 10 кылааска үөрэнэллэр уонна соло гитара Иванов Игорь, 2006 с. лицей выпускнига. Онон республикаҕа биир күүстээх бөлөх тэриллибитин бары иһиттибит уонна астынныбыт. Оттон «Foyr mad» диэн саҥа бөлөх элбэх ырыалардаахтар эбит. Инникитин ити тэтиминэн үлэлээтэхтэринэ улахан тугу эрэ таһаарыах уолаттар. Бөлөх састааба: вокал, гитара Константинов Проня, бас гитара Иванов Юра, ударнайга Иванов Дьулус - бары Сунтаар 1 № оскуолатыгар 7 кылааска үөрэнэллэр уонна гитара Пахомов Толя Сунтаар 2 № оскуолатын 7 кылаас үөрэнээччитэ. Ыаллыы сытар Мииринэйтэн «Тобул» бөлөх кэлэн барда. Бөлөх састааба: бас гитара Аргунов Андрей уонна гитара, вокал Прокопьев Ваня иккиэн Миирнэйдээҕи институт устудьуоннара. Туох да диэбит иһин уолаттар иккиэйэх кэлэн бэркэ оонньоотулар. Ол туоһутунан көрөөччүлэр кэнсиэр кэннэ эбии биир ырыаны көрдөһөн ыллаттылар. Ударнайга Чолбоннору кытары суоппарынан кэлбит «Уолан» группа (Үөһээ-Бүлүү) барабанщига Максим Кардашевскай олордо. Киһи астынара баар Ильиин Сааска эмиэ Тобуллары кытары тахсан гитараласта. Чолбоннортон Александр Ильин (гитара), Васильев Юрий (гитара, вокал), Сазонов Гаврил (бас гитара) буолан кэлэн саҥа ырыаларын ыллаатылар. Ол кэннэ урукку ырыаларын дьон көрдөһүүтүнэн оонньоттулар. Түһүлгэ аҕа саастаах ыалдьыттара «Хотой», «Онтон мин», «Хаһан эрэ» диэн ырыалары долгуйа иһиттилэр. Онон бу тэрээһин кэнниттэн үчүгэй эрэ санаа үөскүүр - тыыннаах доҕуһуол Бүлүү эҥэр тыынын сүтэрэ илигэ көһүннэ. Урукку аар саарга аатырбыт «Чолбон», «Айтал» бөлөхтөрү салҕыыр оҕолор бааллар эбит диэн түмүк санаа үөскүүр.


 

 

 

 

 

 

 

Кири

автор хаартыскалара 

Нөрүөн-нөргүй буоллун биһиги саайтпыт ыалдьытыгар! Билигин эн ыалдьыт курдук киирдин. Бэлиэтэнэн киирдэххинэ бу сиртэн элбэҕи бэйэҕэр туһаныаххын сөп.
Майгынныыр сонуннар:

« Төттөрү
Ырытыылар (0)
 

Ырытыыга кыттабын




 

Сайт зарегистрирован в Федеральном Агентстве
по информационным технологиям
Свидетельство №11945 от 6 мая 2008 года

Автор проекта - Синильга
сайт открыт 17 августа 2007 © Ырыа кырдала
Условия использования материалов, размещенных
на сайте «Ырыа кырдала»

Доступ к сайту бесплатен для пользователей
Экспресс-Сеть, Гелиос-ТВ, ЯГУ, Наука, Оптилинк, Сахаспринт и для сетей ADSL и "Столица".