"Чороон" — эстрада саҥа ансамбла
 (голосов: 0)

          Хомус дьүрүһүйэр. Саалаҕа музыка намыын дорҕоонноро кутуллар. Кыһыл баархат быыс сыыйа аһыллар. Сценаҕа национальнай көстүүмнээх уолаттар уонна кыргыттар сахалыы дьиэрэҥкэй ырыатынан көрөөччүлэрин эҕэрдэлииллэр.
          Ити курдук саҕаланар саха эстрадатын эдэр артистарын маҥнайгы программалара. Кинилэр балтараа сыллааҕыта Москваҕа эстраднай искусство айар мастарыскыайыгар үөрэнэ барбыттара. Билигин биһиги иннибитигэр — эстраднай искусство уустук жанрдарыгар үөрэммит, толорор маастарыстыба өттүнэн биллэ-көстө үүммүт эдэр артистар.
          Концерт программатын сүрүннээн «Чороон» диэн вокальнай-инструментальнай ансамбль киэргэтэр. Бу — биһиги республикабытыгар бастакы идэтийбит вокальнай-инструментальнай ансамбль.
          Ансамблы кытта үлэҕэ композитор Владимир Куприянов үгүс сыратын биэрбит. Ол туһунан солист Владимир Мохначевскай маннык кэпсиир:
         - Биһиги маҥнай хомулларбытыгар инструменнарбытыгар кыратык эрэ оонньуур дьон этибит. Бары любитель музыканнарбыт. Үөрэнэ киирбит күммүтүттэн ыла салайааччыбыт композитор В. Куприянов бу уустук идэҕэ үөрэппитинэн, уһуйбутунан барбыта. Маҥнай утаа олус ыарырҕатарбыт да буоллар, күнү быһа дьарыктанан тахсарбыт. Биһиэхэ салайааччыбыт көмөтө, өҥөтө олус улахан. Кини манна кэлэ сылдьар.
          Ансамбль чилиэннэрин кытта билсиһиэҕиҥ: Сергей Черниговскай (электроорган), Василий Аталев (охсор инструменнар), Владимир Мохначевскай (бас-гитара), Николай Саввин (гитара), Афанасий Попов (национальнай инструменнар). Кинилэр бары, оонньуулларын таһынан, ис киирбэх куоластаахтар.
          Репертуарыгар советскай композитордар уонна саха мелодистарын ырыалара бааллар. В. Куприянов уонна В. Татаринов «Онус кылаас» диэн сахалыы лирическэй ырыаны суруйбуттар. Ону тэҥэ композитор В. Куприянов ансамбльга анаан хас да ырыаны суруйа сылдьар. Ансамбльга национальнай инструменнар киирбиттэрэ национальнай музыка колоритын бэркэ биэрэр.
          Ансамбль билиҥҥи туругунан - музыкальнайынан, маастарыстыбатынан - ортоку таһымҥа эрэ турар диэххэ сөп, Ол эрээри инникитин кинилэртэн музыкальнай-вокальнай өттүнэн сиппит-хоппут, чахчы идэтийбит толоруу күүтүллэр. Кинилэр чэпчэки музыканан эрэ үлүһүйбэккэ, народнай характердаах ырыаларынан, араас музыкальнай нүөмэрдэринэн байытыахтара диэн эрэнэбит.
          Көрөөччүлэр истиҥ биһирэбиллэрин сахалыы чуор, кылыһахтаах куоластаах Мария Тогонохова ылла. Кини толорбут тойугун уонна ырыатын истээччилэр олус биһирээтилэр. Эдэр ырыаһыты РСФСР народнай артистката Ирма Яунзем бэлэмнээбит. Урукку өтгүгэр Ирма Яунзем кылааһыгар биһиги биллэр ырыаһыттарбыт М. Колесова уонна Н. Трапезникова эмиэ үөрэммиттэрэ. Мария Тогоноховатган инники өттүгэр репертуарын байыгара уонна сценическэй өттүнэн өссө тупсара күүтүллэр.
          Олег Бубякин мелодист Виталий Андросов ырыаларын толортоото. Кини бэйэтин толоруутун дьоҥҥо-сэргэҕэ тиэрдэр сценическэй дьоҕурдааҕын көрдөрдө. Ол эрээри солист куолас өттүнэн ситэ-хото илик. Бэйэтин дьоҕурун салгыы сайыннардаҕына, эдэр ырыаһыт Олег Бубякин үчүгэй эстраднай артист буолар кыахтаах.
          Ыраас куоластааҕынан, сөптөөх музыкальнай таһымнааҕынан ырыаһыт Николай Ховрову бэлиэтиэххэ наада. Кини ырыаларын саала көхтөөх ытыс тыаһынан көрүстэ.
          Василий Федоров киһи дууһатын тутар нарын-намчы тенор куоластаах ырыаһыт. Кини репертуарыгар сахалыы лирическэй ырыалары киллэрбитэ толоруутугар бэркэ сөп түбэһэр.
          Людмила Степаненко уонна Олег Бубякин лирическэй дуэттара концерды өссө тупсарда. Ансамбль солистката Людмила Степаненко толоруутунан да, куолаһынан да истээччилэри сэҥээртэ. Кини ансамблы кытта бэркэ сөп түбэһэр. Николай Соловьев күүстээх куоластаах ырыаһыт быһыытынан уонна репертуара баайынан эмиэ биһирэттэ.
          Мелодист, эдэр ырыаһыт Владимир Татаринов бэйэтэ айбыт саҥа ырыаларынан үөртэ. Кини соторутааҕыта Москваҕа буолан ааспьгг комсомол XVII съеһин делегаттарыгар аналлаах улахан концертнай программаҕа кыттыбыта. Бу - эстраднай куоластаах эдэр ырыаһыт. Владимир Татаринов бэйэтэ гитараҕа доҕуһуолланар. Ол эрээри эдэр артист бэйэтин эрэ мелодияларынан муҥурданара кини репертуарын сымсатар.
          Үҥкүүһүттэр Галина Воробьева уонна Людмила Зуева көрөөччүлэри тардардыы бэйэлэрин нүөмэрдэрин толордулар. Кинилэр «Доҕордоһуу» диэн хореографическай хартыынаны уонна «Үҥкүүлүүр площадкаҕа» диэн экцентрическэй үҥкүүнү толордулар. Үҥкүүлэри РСФСР народнай артистката А.А. Редель бэлэмнээбит. Манна даҕатан эттэххэ, саха эстрадатыгар үҥкүү жанра өссө да ситэ сайда илик. Ол курдук, холобура, «Саха эстрадата-72» ансамбль үҥкүүтүн солистара репертуардарын байыппаттар, маастарыстыбаларын да биллэрдик үрдэппэттэр.
          Людмила Лукша акробатическай уонна пластическай этюдтары бэрт имигэстик, киһини кэрэхсэтэрдии толортуур. Кини бэйэтин жанрыгар биллэр дьоҕурдааҕын көрдөрдө.
          Концерт программатын конферансье Александр Тойтонов нууччалыы тылынан ыытта. Кини төһө да сценаҕа туттуута-хаптыыта ситэ илигин иһин, тылын-өһүн чочуллуута, көрөөччүлэри кытта кэпсэтиитэ
үчүгэй өйдөбүлү хаалларар.
          Программаны ВГИК студена Петр Пестряков режиссердаан туруорбут. Эстраднай программаны оҥорууга режиссер фантазията бу сырыыга ситэтэ суох. Программа репертуара дьадаҥы, нүөмэрдэрин арааһа эмиэ дьүөрэтиҥи. Бу инники өттүгэр учуоттанара наада.
          Толорооччулар көстүүмнэрэ бэрт тупсаҕайдык толкуйдаммьгг. Художник И. Нежнай оҥорбут декорацията эмиэ кэрэхсэбиллээх.
          Ансамбль инники былааннарын туһунан музыкальнай салайааччы, композитор Владимир Куприянов
манныгы кэпсиир.
          - Биһиги коллективпыт саҥа саҕалаан эрэр, эдэр. Онон өссө да үгүс сыралаах үлэ күүтэр. Оҕолор Москваҕа үөрэнэр кэмнэригэр улахан кыһамньыларын ууран үлэлээтилэр. Ансамбль инники өттүгэр саха фольклоругар олоҕуран хас да ырыалары бэлэмниэ уонна саха мелодистарын ырыаларын үөрэтиэ. Иннибитигэр - көрөөччүлэри үгүс элбэх көрсүһүүлэр, ыраах айаннар...
          «Чороон» ансамбль «Росконцерт» программатыгар киирэн, Советскай Союз үгүс куораттарынан гастроллуоҕа. Онно кини саха эстраднай искусствотын пропагандиһынан буолуо.
          Саха эстрадатын саҥа артистарын бастакы концердара ситиһиилээхтик бардылар. Бу саҥа ансамбль чорооно эстраднай искусство араас нүөмэрдэринэн өрүүтүн туола турарыгар баҕарабыт.

А. Аргунов.
«Эдэр коммунист», 1974 с. ыам ыйын 23 күнэ. № 118 (15420).


{moshits}

Нөрүөн-нөргүй буоллун биһиги саайтпыт ыалдьытыгар! Билигин эн ыалдьыт курдук киирдин. Бэлиэтэнэн киирдэххинэ бу сиртэн элбэҕи бэйэҕэр туһаныаххын сөп.
Майгынныыр сонуннар:

« Төттөрү
Ырытыылар (1)
 
Ефимова   11 сентября 2022 07:53
Вячеслав Саввин был в составе

Ырытыыга кыттабын




 

Сайт зарегистрирован в Федеральном Агентстве
по информационным технологиям
Свидетельство №11945 от 6 мая 2008 года

Автор проекта - Синильга
сайт открыт 17 августа 2007 © Ырыа кырдала
Условия использования материалов, размещенных
на сайте «Ырыа кырдала»

Доступ к сайту бесплатен для пользователей
Экспресс-Сеть, Гелиос-ТВ, ЯГУ, Наука, Оптилинк, Сахаспринт и для сетей ADSL и "Столица".