Киэн туттар киһибит
 (голосов: 0)

          Саха норуота киэн туттар биллиилээх ырыа айааччытын, обшественнай диэйэтэлин Аркадий Михайлович Алексеевы кытта чугастык "Эн, мин", — дэһэн билсиһиибит уонна кинилиин айымньылаах үлэбит бииргэлэһэн алтыһыыта 1992 сылтан саҕаламмыта. Ити кэмнэргэ, ырыынак ыар тыына уонна уларыйыы-тэлэрийии долгуна таарыйан,уонтан тахса сылы быһа үлэлээбит "Чороон" ансаамбылбыт үрэллэн, биирбит республика телерадиокомпаниятын хоругар ырыаһытынан, биирдэспит музыкальный салайааччы идэтигэр үөрэнэ сылдьар кэммит этэ.
          Биһиги көлүөнэ Аркадий Алексеев ырыаларын истэ-ыллыы улааппыт дьон буоллахпыт, онон Аркадий Михайлович спорка, культураҕа ситиһиилэригэр таһыттан сүгүрүйэ, ыраахтан киэн тутта көрө ытыгылыыр киһибит этэ.
Бу тутах кэмнэргэ Аркадий Михайлович, Саха Республикатын телерадиокомпаниятын генеральнай дириэктэрэ Протодьяконов Семен Афанасьевич сөбүлэҥин ылан, бу тэрилтэ иһинэн айар бөлөх тэрийэбин диэн биһигини ыҥырбытыгар, бөлөх састаабыгар үөрүүнэн киирбиппит. Ити курдук Аркадий Алексеев салайааччылаах, Раиса Захарова, Аскалон Павлов, Александр Бурнашев уонна биһиги артыыстардаах айар бөлөхпүт үлэтин саҕалаабыта. Биэс сыл устата республика бүттүүнүн олохтоохторун хабан, ону таһынан Москва, Санкт-Петербург, Екатеринбург, Новосибирскай куораттарынан ситиһиилээхтик гастроллаабыппыт. Бу биһиги айар олохпут эмиэ биир саамай чаҕылхай, хатыламмат, кэрэ өйдөбүллээх кэмнэрэ. Биэс сыллаах үлэбитин ситиһиилээхтик түмүктээн культура эйгэтин араас хайысхаларынан тарҕаспыппыт.
           Аркадий Михайлович биһиги айар бөлөхпүт кэнниттэн, ол кэмтэн билиҥҥэ диэри хас да бөлөҕү тэрийэн, элбэх артыыһы айар үлэ алыптаах эйгэтигэр угуйан, уһуйан кэллэ. Кини Саха Республикатын культуратын,искусствотын, спордун, тележурналистикатын сайдыытыгар үлэлэрэ, ситиһиилэрэ сөҕүмэрдэр.
          Кини биһиэхэ убайбыт, аҕабыт, учууталбыт курдук чугастык саныыр, истиҥник алтыһар, ытыктыыр, сүгүрүйэр киһибитинэн буолар. Күн бүгүнүгэр диэри араас концертнай бырайыактарга бииргэ алтыһабыт, сүбэлэһэбит.
         Аркадий Михайлович бастакы бөлөҕөр үлэлээбит артыыстар бука бары субу күҥнэ Саха Республикатын үтүөлээх артыыстара буоллубут. Бу эмиэ кини биир улахан ситиһиитэ диэн сыаналыыбыт.
          Киһилии сиэрдээх, үлэҕэ дьулуурдаах буолууга үөрэннибит. Саха норуотун дьолугар төрөөбүт Аркадий Михайлович тус майгытынан, дьиэ кэргэнигэр, доҕотторугар, биир идэлээхтэригэр үтүө сыһыанынан, олоххо ирдэбиллээҕинэн биһиэхэ өрүү холобур буолар. 60-тан тахса айбыт-туппут ырыалара барытын кэриэтэ дьон сэргэ сөбүлээн ыллыыр, уостан туспэт ырыаларынан буоллулар.


Саха Республикатын үтуөлээх артыыһа Екатерина ЕГОРОВА,
Саха Республикатын ырыа айааччыларын сойууһун бэрэссэдээтэлэ,
Саха Республикатын үтүөлээх артыыһа Алексей ЕГОРОВ

 

Нөрүөн-нөргүй буоллун биһиги саайтпыт ыалдьытыгар! Билигин эн ыалдьыт курдук киирдин. Бэлиэтэнэн киирдэххинэ бу сиртэн элбэҕи бэйэҕэр туһаныаххын сөп.
Майгынныыр сонуннар:

« Төттөрү
Ырытыылар (0)
 

Ырытыыга кыттабын




 

Сайт зарегистрирован в Федеральном Агентстве
по информационным технологиям
Свидетельство №11945 от 6 мая 2008 года

Автор проекта - Синильга
сайт открыт 17 августа 2007 © Ырыа кырдала
Условия использования материалов, размещенных
на сайте «Ырыа кырдала»

Доступ к сайту бесплатен для пользователей
Экспресс-Сеть, Гелиос-ТВ, ЯГУ, Наука, Оптилинк, Сахаспринт и по льготному пиринговому тарифу
для сетей ADSL и "Столица" (7 коп./1 мб).