| "Тоҕус" бөлөх |
| 31 августа 2008, 22:41 | Көрдүлэр: 22468 | Саайт ыалдьыттара |
|
"Саха рога аан дойду таһымыгар тахсар кыахтаах дии саныыбын. Ол эрэн биһиги арыый да сыыһа тайана сылдьабыт быһыылаах. Дьиҥэр, сахаҕа айылҕабытыгар рок баар ээ. Туох эрэ уратыбытынан тахсыахпытын сөп этэ" Бэйэни билиһиннэрии бэрээдэгинэн «Тоҕус» бөлөх туһунан кэпсии түс эрэ. Москваҕа үөрэнэ сылдьан Руслан Тараховскай, Миша Борисов уонна мин дойдубутугар тиийдэхпитинэ хайаан да бөлөх тэриниэхпит диэн былааннаммыппыт. Ол баҕа санаабыт 2003 с. туолбута – «Үргэл сулус» диэн ааттаах бөлөх тэриллибитэ. Ол кэмҥэ биһиги Саха театрыгар үлэлии киирбиппит. Инструмент эҥин суоҕа. Руслаҥҥа Үөһээ-Бүлүүгэ дьиэтигэр урукку барабаан баар эбит этэ, ону ыыттарбыппыт уонна театр көмөтүнэн гитаралары атыыласпыппыт. Дьэ уонна театрбытыгар биир хос ылан, тыаһаан-ууһаан дьарыктанан киирэн барбыппыт. Сценаҕа аан бастаан 2004 с. «Табыкка» кыттыбыппыт. «Открытие года» номинацияҕа кыайыылаах аатын ылбыппыт. Дьэ ол биһиэхэ улахан стимул буолбута. Онтон сүүрэн-көтөн, мин аҕам көмөтүнэн үчүгэй инструменнары булбуппут. Билигин санаатахха техническэй өттүнэн ситэн бараммыт хайдах эрэ тохтоон, уостан хаалбыппыт. Дьэ уонна бу сайын өссө элбээн бөлөхпүтүгэр бэһиэ буоллубут уонна үксүбүт Бүлүү Тоҕуһуттан төрүттээх буоларбыт быһыытынан «Тоҕус» дэммиппит. Маны үгүстэр өйдөөбөттөр эбит. Холобур, «103», «–72» бөлөхтөргө майгылатан сыыппара курдук саныыллар эбит. Бөлөхпүт састааба: мин - гитара, Андрей Егоров – Харысхан – клавиша (иккиэн Бүлүү Тоҕуһуттан төрүттээхпит), Герман Барахов (Мэҥэттэн төрүттээх) – клавиша, Михаил Борисов – барабаан (Бүлүү Тоҕуһуттан төрүттээх), Афанасий Попов (Тааттаттан төрүттээх) – бас-гитара. Биһиги бары араас эйгэттэн сылдьар дьоммут - ким экономист, ким страховщик, ким артыыс. Бөлөхпүтүгэр мустан биир санааҕа киирэн, бары музыканан хобби быһыытынан дьарыктанабыт. Бу дьарыкпыт күннээҕи кыһалҕаны умнарбытыгар, тыыммытын таһаарарбытыгар наһаа көмөлөһөр. Сөбүлүүр дьарыкпыт буолан ардыгар наар манан эрэ дьарыктаныахпытын баҕарабыт, ол гынан баран ити харчыны аҕалбат. Ырыаларгыт туһунан кэпсээ эрэ. Ханнык хайысханы тутуһаҕыт уонна бөлөххүт уратытынан туох буоларый? Репертуарбыт туһунан этэр буоллахха, араас поэттар хоһоонноругар бэйэбит матыыппытын ууран ырыа оҥостобут. Биһиги бэйэбит уратыбытын тус бэйэм сатаан эппэппин. Дьон бэйэтэ сыаналыа дии саныыбын. Билигин дьон электроннай музыкаттан хал буолбут курдук. Тыыннаах доҕуһуол төннөн кэлэн эрэр диибит. Мин манна сөбүлэһэбин, бу баар суол уонна ол үчүгэй. Араас фестиваллар да ыытыллар буоллулар. Холобур, бары билэр «Табык», «Саха-рок» күрэхтэр уонна быйыл сайын «Эллэйаада-рок» бастакытын ыытылынна. Аҥардас ити тыыннаах музыка сайдыытын туоһута буолар. Мин санаабар, куһаҕан музыка диэн суох, дьон ханнык да музыканан дьарыктана сатыыра үчүгэй буоллаҕа дии. Дьон музыка таһымын бэйэтэ араара үөрэниэхтээх. Тыыннаах музыка электроннайдааҕар ордук диэн билигин этиэххэ сөп буолуо. Ол гынан баран 1994-95 сыллардаахха тыыннаах музыка ордук диэтэххинэ аҕыйах киһи итэҕэйиэ этэ. Тоҕо диэтэххэ оччолорго дьон электроннай музыка саҥа кэлэригэр бары интэриэһиргээн, синтезаторынан фонограмма оҥостон ыллыыллар этэ. Ол кэмҥэ ити наһаа саҥа, сонун этэ. 1980-с сылларга тыыннаах музыка үөдүйэ сылдьыбытын өйдүүбүт, онтон электроннай кэлбитэ. Билигин онтон хал буолан эмиэ тыыннаах музыка кэлэн эрэр. Ол эрэн бу да уостар кэмэ кэлэрэ буолуо. Онон дьон биир музыканы тутан баран сылдьыбатыттан, музыкаҕа сыһыана уларыйарыттан киһи соһуйара суох дии саныыбын. Оннук буолуохтаах даҕаны. Бөлөх буоларгыт быһыытынан, тэрээһин боппуруостары быһаарарга уустук соҕус буолуо, холобур, дьарыктанар сиргит. Ону хайдах быһаараҕыт? Саамай улахан проблема – дьарыктанар сир суоҕа буолар. Атын да тыыннаах бөлөхтөргө бу биир тыын боппуруостара буолар диэтэхпинэ сыыстарбатым буолуо. Саатар бэйэбит гаражтаахпыт буоллар, хайдах эмэ быһаарынан көрүө этибит. Билигин биһиги дьарыктанар сирбит суох. Сайынын мин дьонум даачаларыгар дьарыктаммыппыт. Дьиҥэр, тыыннаах бөлөхтөрү өйүүр сыаллаах биир киин сир баара буоллар, холобур, Эстрада театрын биитэр Өксөкүлээх культура киинин иһинэн. Олох кыаллыбат диэн суох, баҕа эрэ баар буоллаҕына тыыннаах бөлөхтөргө оннук кыах биэриэхтэрин сөп этэ. Биитэр араас фестиваллары тэрийэн ыытааччылар кыайыылаахтарга бириис быһыытынан дьарыктанар сири көрөллөрө буоллар, холобур 1 сылга диэн болдьохтоон. Дьэ, ол буолуо этэ саамай улахан бириис. Бу сайын «Эллэйаада-рок» фестиваль буолан ааста. Фестиваль түмүгүнэн эн санааҥ? Мин Ершов Михаилы үчүгэйдик билэр киһим. Бу фестиваль идеята наһаа үчүгэй эрээри аныгыс сырыыга быйыл тахсыбыт сыыһалары, алҕастары учуоттаан тэрээһин таһымын тупсарыахха наада. Тус бэйэм санаабар, реклама өттө олох кыаллыбатах. Ол иһин, холобур, стадиоҥҥа буолбут гала-кэнсиэргэ омуннаан эттэххэ 50-чэ эрэ көрөөччү баара. Маннык улахан тэрээһини ыытарга аҥардас фанаттар эрэ күүстэригэр эрэнэр сыыһа. Рекламаны таһынан тэрээһин өттүгэр кэккэ итэҕэстэр эмиэ бааллара. Эһиэхэ ханнык бөлөх айар үлэтэ ордук чугаһый? Бэйэҥ кумир оҥостор дьоннооххун дуо? Саха рога аан дойду таһымыгар тахсар кыахтаах дии саныыбын. Ол эрэн биһиги арыый да сыыһа тайана сылдьабыт быһыылаах. Дьиҥэр, сахаҕа айылҕабытыгар рок баар ээ. Туох эрэ уратыбытынан тахсыахпытын сөп этэ. Аан дойду таһымыгар балайда чугаһаабыт, тайанан турбут «Чолбон» бөлөх буолар. Эстрада хайысхатыгар «Чороон» вокально-инструментальнай ансамбль дьэ өрөгөйдөөн, арыый да үөһэ тахсан иһэн үрэллэн хаалаллар. Онтон кумирдар диэн эттэххэ, сөбүлүүр дьонум элбэхтэр диэххэ сөп. Поп музыкаттан да бааллар, рок музыкаттан да бааллар. Уопсайынан араас хайысхалаах музыканы истэбин. Бэйэтин кэмигэр Mariah Carey, Whitney Houston курдук ырыаһыттар ырыаларын ордук истэр этим. Соторутааҕыта Red Hot Chili Peppers's ырыаларын истэн баран наһаа сөбүлээбитим. Аҥардас хайдахтаах курдук энергетикалаахтык оонньуулларыттан шок ылбытым диэххэ сөп. Celine Dion, Christina Aguilera ырыаларын билигин сөбүлээн истээччибин. Рок музыка туһунан эттэххэ, холобур, убайым Иннокентий Steve Vai, Metallica музыкаларын иһитиннэрэр. Чахчы үрдүк таһымнаах музыкааннар. Киһи кинилэри олоҕун тухары эккирэтэн сиппэт дьоно. Сорох ардыгар итинник таһымнаах музыкааннары иһиттэххэ киһи санаата түһэр - тугу гынан, хайдах дьарыктанан киһи маннык таһымҥа тиийиэн сөбүй диэн? Ол гынан баран убайым этэрин курдук, «техника исполнения» бэйэтин кэмигэр син биир кэлиэҕэ, онтон матыып, иэйии диэн баар – бу маны ханнык да дьарыгынан эккирэтэн сиппэккин. Ити биитэр баар, биитэр суох. Баар буоллаҕына, дьэ, ону кытаатан сайыннара сатыахтааххын диэн. Мин бэйэм баҕа санаам - бу киһиэхэ матыып, иэйии баар эбит дэтиэхпин баҕарабын. Ол буолуо этэ саамай үрдүк ситиһии уонна сыанабыл. Быйылгы музыкальнай сезоҥҥа туох былааннааххыт? Улахан, элбэх былаан суох. Арай биһиги ырыаларбытынан таптал тематыгар мюзикл туруоруллуохтаах. Ону тиһэҕэр тиэрдибит киһи диэн баҕа санаалаахпыт. «Ырыа кырдала» саайт ыалдьыттарыгар эһиги баҕа санааҕыт уонна ханнык айымньыларгытын бэлэхтиигит? Бастатан туран, эһигини барыгытын «Ырыа кырдала» саайт арыллан үлэлээбитэ 1 сылынан эҕэрдэлиибит уонна саайт ыалдьыттарыгар баҕа санаа туолуутун, дьиэ-кэргэҥҥитигэр бары үчүгэйи уонна доруобуйаны баҕарабыт! Уонна саҥа ырыаларбытын истиҥ, сыаналааҥ. «Мин төлкөм» – Руслан Тараховскай тыллара, Өркөн матыыба «Киһибин дэнэбин» – Руслан Тараховскай тыллара, Өркөн матыыба Кэпсэттэ СИНИЛЬГА Все материалы сайта принадлежат автору проекта и могут быть использованы только с согласия автора. Все права на исходные аудиоматериалы принадлежат их авторам и владельцам. Аудиоматериалы предоставлены исключительно для ознакомительного прослушивания. |
Биһиги бүгүҥҥү ыалдьыппыт уруккута «Үргэл сулус», билиҥҥитэ «Тоҕус» бөлөх салайааччыта Алексей Егоров - Өркөн.|
Нөрүөн-нөргүй буоллун биһиги саайтпыт ыалдьытыгар! Билигин эн ыалдьыт курдук киирдин. Бэлиэтэнэн киирдэххинэ бу сиртэн элбэҕи бэйэҕэр туһаныаххын сөп.
Майгынныыр сонуннар: |
« Төттөрү
Ырытыылар
