| Ый ымыыта - Ый Кыыһа |
| 11 июня 2008, 21:17 | Көрдүлэр: 28681 | Саайт ыалдьыттара |
|
Ырыа кырдалын бүгүҥҥү ыалдьыта Варя Ларионова – Ый Кыыһа
"Ырыаны таптаан истэр киһи үтүө буолар, онон олоххутугар куруук ырыа аргыстаах сылдьыҥ" Варя, Ырыа кырдалын үгэһин быһыытынан киэҥ араҥаҕа бэйэҥ тускунан кэпсии түс эрэ. Бука сэрэйдэххэ, үгүс саха курдук кыра эрдэххиттэн ыллыыргын сөбүлүүр буолуохтааххын. Ырыа диэн миэхэ бэйэбин өйдүөхпүттэн олоҕум аргыһа. Кыра эрдэхпиттэн ырыаһыт буоларга улахан баҕа санаалаах буолар этим. Билигин финансист үрдүк үөрэхтээх идэлээх да буолларбын, мин ырыаларбын сэргээн, сөбүлээн истэр иһирэх истээччилэрдээх буоламмын, олохпор биир истиҥ баҕа санаам туолан, ырыа-тойук эйгэтигэр үлэлии-хамныы, айа-тута сылдьабын. Онтон профессиональнай сценаҕа тахсыыҥ хаһан, туохтан саҕаламмытай уонна тоҕо «Ый Кыыһа» диэн сценическэй ааты талбыккыный? Туох барыта кэмнээх-кэрдиистээх дииллэр. Бэйэтэ бириэмэтэ кэлэн буолуо киэҥ эйгэҕэ тахсан ыллаабытым. Түгэн түбэһиннэрэн Уля Сергучевалыын билсэн, киниттэн бастакы ырыаларбын ылбытым. Ый Кыыһа диэн ааппын ийэм сүрэхтээбитэ. Саха дьонун олоҕор ый улахан суолталааҕын, чуолаан саха дьахтарыгар сабыдыала улаханын өйдөтөн бу ааты биэрбитэ. Ыраастыы, араҥаччылыы, харыстыы сырыттын диэн. Далаана бэйэтин интервьютугар эйигинниин чугастык билсэрин, Даланнарынан аймахтыы буоларгытын кэпсээбитэ. Далаанаттан ураты ырыаһыттартан кимниин бодоруһаҕын? Билигин биллэр-көстөр, үгүс ыҥырыыга сылдьар ырыаһыттары кытта элбэхтэ көрсөр буоламмыт бодоруһабыт, алтыһабыт.  Эн ордук тапсан Уля Сергучева-Күннэйи, Наталья Яковлева-Далаананы, Иннокентий Гаврильев-Лэкиэһи кытта үлэлэһэр курдуккун. Холобур, «Күнүү», «Күндү киһим», «Кыыс дууһата» ырыаларын ыллыыгын. Атын кими кытта үлэлэһэҕин? Ырыаларыҥ аранжировкатын барытын Иннокентий Гаврильев оҥорор дуо?Ырыам автордара үгүстэр, эбиитин саҥа иккис альбоммун таһаараары эдэр айааччылары кытта үлэлэһэбин. Ону таһынан урукку-хойукку ылламмыт ырыалары саҥалыы тыыннаан ыллыырбын сөбүлүүбүн (Ольга Иванова, Эдьиий Марыына, Анастасия Варламова, Галина Шахурдина репертуардарыттан). Билиҥҥи бириэмэҕэ ырыаларым музыкатын Бүөккэ Бөтүрүөпкэ, Сергей Ярмоновка оҥотторобун. Ырыа эн олоххор? Ырыаттан атын туох дьарыктааххыный? Кыра эрдэхпиттэн уонна инникитин даҕаны ырыа олоҕум аргыһа буолар. Атын дьарыкка бириэмэ тиийбэт курдук. Дьиэ-кэргэн, ийэ эбээһинэһин, үлэни, кэнсиэрдэри, гастроллары, араас тэрээһин боппуруостары хайдах барытын дьүөрэлиигин? Айар үлэҕинэн дьарыктанаргар көмөлөһөр киһи баар дуо? Тэрээһин боппуруостары хайдах быһаараҕын – таҥас-сап, айан ороскуота, кэнсиэр тэрээһинэ уо.д.а.? Манна миэхэ саамай чугас дьонум, ийэлээх аҕам, күүс көмө буолаллар, кэлэр-барар, айанныыр кэмнэрбэр оҕолорбун көрсөллөр. Кинилэр көмөлөрүнэн барытын дьүөрэлиир холкутук тахсар. Тэрээһин үлэтин барытын бэйэм былаанныыбын. Таҥас-сап тигээччилэрим Амгалена Барашкова, Раиса Бурцева, Зоя Иванова курдук маастардар. Саха эстрадатын эйгэтигэр бэйэтин оннун булбут, суолун-ииһин тобулбут толорооччу буолаҕын диэтэхпинэ мэлдьэҕэ суох. Киһи төһөнөн биллэр да, соччонон киниэхэ ирдэбил улаатар. Кириитикэни төһө ылынаҕын уонна бэйэҥ санааҕар айар үлэҕэр мөлтөх өрүттээххин дуо? Олох ирдэбилэ уларыйа турар, ол курдук итэҕэс-быһаҕас элбэх буолара чуолкай. Ситэн-хотон, сайдан, инним диэки тардыһыым улахан. Дьон санаата араас, ону сүүмэрдээн ылынабын. Эн аныгы саха эстрадатыгар сыанабылыҥ? Саха эстрадата сайдар кэскилэ туохханый дии саныыгын? Биллэн турар сайдыы баран иһэр, ол эрэн Уххан эппитин курдук «Һаха һахатынан кэрэ». Ол курдук саха ырыата ураты кэрэтин сүтэриэ суохтаах. Культурабыт сүрүн суолтатын илдьэ сылдьыахтаахпыт.  Эн сүрдээх таһаарыылаахтык үлэлии сылдьаҕын – сольнай кэнсиэртэри тэрийэҕин, альбом таһаартарбытыҥ, ырыаларыҥ хайаан да хит буолан сахалыы радиоҕа куруук сакаастаналлар, «Этигэн Хомус» популярнай ырыа күрэҕэр сыл ахсын номинацияҕа киирэллэр. Эн бэйэҥ санааҕар тугу эрэ ситэ оҥоро илик курдук санаа баар дуо? Инники былаан үгүс, олох устатын тухары сайдыы баран иһиэхтээх. Барытын толору ситистим дэниэхпин эрдэ. Өссө альбом таһаарар былааннааххын дуо? Бу сыл алтынньы ый саҕаланыытыгар иккис хомуурунньукпун таһаарыам. Бэйэм баҕабынан үрдүк таһымнаах, истиҥ иэйиилээх, ураты өйдөбүллээх иккис хомуурунньукпун сүрэхтиир дьоро киэһэ буолуон баҕарабын. Эн ханнык музыканы истэргин сөбүлүүгүн? Холобур оҥостор ырыаһыттар, ырыаны айааччылар бааллар дуо, республика, Россия, аан дойду таһымнаах? Үгүс сөбүлүүр ырыалардаахпын, ол эрэн ураты тутар, сүгүрүйэр, үтүктэ сатыыр ырыаһытым суох. «Ырыа кырдала» саайт ыалдьыттарыгар уонна бэйэҥ сүгүрүйээччилэргэр тугу баҕарыаҥ этэй? Уонна ханнык ырыаларгын бэлэхтиигин? Ырыа-тойук биһиги күннээҕи олохпутун киэргэтэр, сэргэхситэр, ырыа хомойор-хоргутар, үөрэр-көтөр кэммитигэр биһигинниин үллэстэр. Ырыаны таптаан истэр киһи үтүө буолар, онон олоххутугар куруук ырыа аргыстаах сылдьыҥ. Барыгытыгар сойбот сылааһы, симэлийбэт сэниэни, сыдьаайар сырдыгы, сахалыы самаан санааны баҕарабын. Эһиги, мин иһирэх истээччилэрим, бааргыт тухары, саҥаттан саҥа, сахалыы ылбаҕай ырыалары, ыллыы, аныы туруом диэн эрэннэрэн туран 3 ырыабын бэлэхтиибин. "Аналлааҕым" (скачать) (Наталья Харлампьева тыллара, Александра Алексеева мелодията) "Дьикти түүл" (скачать) (Лена Спиридонова тыллара уонна мелодията) "Кыыс дууһата" (скачать) (Наталья Яковлева - Далаана тыллара уонна мелодията) Кэпсэттэ СИНИЛЬГА |
|
Нөрүөн-нөргүй буоллун биһиги саайтпыт ыалдьытыгар! Билигин эн ыалдьыт курдук киирдин. Бэлиэтэнэн киирдэххинэ бу сиртэн элбэҕи бэйэҕэр туһаныаххын сөп.
Майгынныыр сонуннар: |
« Төттөрү
Ырытыылар
