Максим Березин
Биһиги бүгүҥҥү ыалдьыппыт киэһэ аайы күөх экраҥҥа Саха сирин сонуннарын кэпсиир Саха НКИК диктора Максим Березин
 
 
"Саха эстрадатыгар баай ис хоһоонноох, дьоҥҥо тиийимтиэ матыыптаах, киһини кэрэҕэ угуйар ырыалары, тыыннаах муусуканы пропагандалыахха наада дии саныыбын. Оччоҕо саха ырыаһыттара, ырыалара аан дойду таһымыгар тахсалларын ситиһиэхпит дии саныыбын. Уопсайынан хаачыстыба өттүгэр үлэлэһиэххэ наада"
Максим, былырыын Дьокуускай куорат дьаһалтатын Аан дойду дьахталларын күнүгэр аналлаах корпоративнай тэрээһинигэр дьаһалта үлэһиттэрэ биллиилээх дьону кытта тэҥҥэ ыллаһан күрэхтэспиттэрэ сүрдээх сэргэх этэ. Киэһэ аайы күөх экраҥҥа Саха сирин сонуннарын кэпсиир Саха НКИК диктора Максим Березин ыллыыра, ону таһынан ырыаларын бэйэтэ суруйара үгүс дьоҥҥо соһуччу этэ. Буолаары буолан Алексеева Мариялыын ыллаан кыайыылаах аатын ылбыккыт. Эйиигин телевизорынан көрөрүн көрөбүт, истэрин истэбит, ол да буоллар бэйэни билиһиннэрии бэрээдэгинэн кэпсии түс эрэ.

1978 сыллаахха муус устар 4-с күнүгэр Уус Майаҕа күн сирин көрбүтүм. 2 саастаахпар ийэм дойдутугар Ньурба улууһун Ньурбачаан нэһилиэгэр көһөн кэлэн олохсуйбутум. Оҕо сааһым манна ааспыта. Оскуоланы эмиэ манна бүтэрбитим. Ийэм культура үлэһитэ буолан кырабыттан ырыаҕа-үҥкүүгэ сыстаҕас этим, культура уонна искусство колледжыгар туттарсан киирбитим, үҥкүү отделениетыгар. Биир сыл үөрэнэн баран уопсайга хос биэрбэтэхтэрин иһин, экономист-бухгалтер идэтигэр ЯГИТИ-га көһөргө күһэллибитим. Икки сылынан бу үөрэхпин бүтэрэн баран, дэриэбинэҕэ тиийэн учууталлыы сылдьыбыттаахпын. Тыаҕа английскай тылын учуутала суох буолан, оҕолору английскай тылга үөрэппитим. Оттон биир табаарыһым ыҥырыытынан ЯГСХА5а бухгалтер идэтин үрдэтинэ киирбитим. Манна «Сандал» ансаамбылга дьарыктаммытым, араас култуурнай тэрээһиннэргэ ыллыыр этим. Оттон билигин үлэ булан кэтэхтэн үөрэнэ сылдьабын.

Төһө элбэх ырыалааххын? Былырыын диискэ таһаараары сылдьаргын истибитим. Онтуҥ хайаста?

10-тан тахса ырыа баар быһыылаах. Бэйэм суруйбут, бэйэм толорор ырыаларым «Мин дьолум», «Баар буоллун» «Саллаат доҕорум» «Сандал саас». Ону таһынан «Таптыыр доҕоруом, ырааххын» диэн ырыабын Нелли уонна Конон Ноговицын толороллор. «Мохсоҕоллор», «Армия» диэн ырыалары истибит буолуохтааххыт. Ити Мирослав Егоров ырыата. Альбому олоҕум аргыһынаан Любалыын кыттыһан таһаарыахтаахпыт. Былааҥҥа баар, чуолкай хаһан тахсарын этэр кыаҕым бакаа суох.

Ханнык мелодист, ырыаһыт айар үлэтин үрдүктүк сыаналыыгын? Бэйэҥ ханнык музыканы истэргин сөбүлүүгүн?

Уопсайынан сахалыы ырыалары истэрбин ордоробун. Холобур, «Дапсы», Анатолий Бурнашев, Байбал, Иннокентий Гаврильев ырыаларын сүрдээх сөбүлүүбүн.

Аныгы саха эстрадатыгар сыанабылыҥ? Саха эстрадата сайдар кэскилэ туохханый дии саныыгын?

Аныгы үйэҕэ компьютер сайдан буолар-буолбат ырыаһыт элбээтэ. Элбэх сыыс тыллаах, хаачыстыбата мөлтөх ырыалар үгүстэр. Маны үүнэр көлүөнэ истэ-истэ үтүктэр, оннук хайысхалаах ырыалары таһаарар. Араадьыйаларга туох эмэ хонтуруол дуу, сүүмэрдээһин дуу баара буоллар. Саха эстрадатыгар баай ис хоһоонноох, дьоҥҥо тиийимтиэ матыыптаах, киһини кэрэҕэ угуйар ырыалары, тыыннаах муусуканы пропагандалыахха наада дии саныыбын. Оччоҕо саха ырыаһыттара, ырыалара аан дойду таһымыгар тахсалларын ситиһиэхпит дии саныыбын. Уопсайынан хаачыстыба өттүгэр үлэлэһиэххэ наада.

Саха НКИК үлэһитэ буоларыҥ быһыытынан элбэх ырытыылаах, мөккүөрдээх «Саҥа ырыа» куонкурус туһунан кэпсэтиэх. Быйылгы куонкурус тэрээһинин хайдах диигин?

Быйылгы «Саҥа ырыаны» үчүгэйдик наллаан олорон көрбөтүм диэххэ сэп. Саҥа хардыы буолан саҕалааһын син аҕай диэххэ дуу. Россия телешоуларыгар тиийэрбит өссө да ыраах. Камера тиийбэтэ атахтыыр, кран камера, кэнниттэн-инниттэн өссө элбэх камералар наадалар, оформление өттүгэр эмиэ өссө чаҕылхай көстүүнү баҕарыллар. Телешоу диэн телевизорынан көрөөччүгэ үлэлиэхтээх. Ырыаһыттарбыт камераны кытта олох үлэлээбэттэр. Режиссер холобур кэнсиэри эрэ көрө кэлбит дьоҥҥо кыһаллыбыт. Кылгастык эттэххэ, телешоуга хас биирдии ымпыгы-чымпыгы, артыыстар тутта-хапта сылдьыыларын, таҥастарын-саптарын, ханнык кэмҥэ хайа камераҕа хайыһыахтаахтарын, антураж хайдах үлэлиэхтээҕин барытын көрүөххэ наада. Ити мин бэйэм тус санаам. Онон инникитин «Саҥа ырыа» өссө даҕаны сайда туруоҕун баҕарыллар.

Мин саныырбынан бу конкурс сүрүн сыала – сахалыы ырыаны пропагандалааһын буолуохтаах. Бары билэрбит курдук быйылгы конкурска Арменияттан төрүттээх Эрмине бастаата. Эн санааҕар бу сөп дуу, сыыһа дуу?

Быйылгы куонкуруска атын омук ырыаларын эмиэ киллэрбиттэрэ мин санаабар хайҕаллаах дьыала. Мантан тэптэрэн, саҥа ырыалары Россия, атын да дойдулар куонкурустарыгар ыытыахха сөп. Оттон саха сиригэр араас омук барыта олорор, кинилэр маннык ырыа куонкурустарыгар кыттыахтарын эмиэ баҕараллар. Онон Эрминэ бастаабытын улаханнык утарбаппын уонна биир дойдулаахтара кини кыайарыгар туох баар кыһамньыларын уурбуттарыттан, күүскэ өйөөбүттэриттэн биһиги үөрэниэх эрэ тустаахпыт.

Куоластааһын ньымата элбэх боппуруос үөскэтэр. Манна эн сыһыаныҥ уонна сыанабылыҥ? Уопсайынан, маннык куонкурустар наадалар дуо?

Куоластааһын ньымата чахчы мөккүөрдээх. СМС куоластааһынынан ким баҕарар кыайыан сөп курдук буолар. Ырыаһыт талааныттан тутулуга суох. Онон кыайыылааҕы профессиональнай дьүүллүүр сүбэ быһаарыахтаах дии саныыбын. Оттон СМС куолаһынан бастаабыт толорооччуну холобур «Көрөөччү биһирэбилэ» диэн номинация кыайыылааҕа оҥоруохха сөп этэ.
Мин санаабар, маннык телевизионнай ырыа куонкурустара наадалар. Ырыа киһини кэрэҕэ эрэ угуйарын умнумуохха.

Саха НКИК хас сыл үлэлээтиҥ? Тоҕо диктор идэтин талбыккыный? Үлэҕин төһө сөбүлүүгүн?

Саха НКИКка үлэлээбитим 4-с сылыгар барда. Эфиргэ тахсыбытым олунньуга 3 сылын туолбута. Уопсайынан телевидениеҕэ алҕас кэлэн хаалбытымsmile Үлэ көрдүү сылдьан аан маҥнай Мастер ТВ-га тиийбитим. Манна дикцияҥ үчүгэй диэн ылбыттара. Онтон ыла телевидение үлэтин олус сөбүлээбитим. Кэлин Саха НКИКка кастинг ааһаммын сонуннарга корреспондент быһыытынан үлэлии киирбитим. Ол саҕана уол ведущай суох буолан буолуо, миигин эфиргэ олордубуттара. Онтон ыла үлэлии сылдьабын. Бу олоххо сөбүлүүр идэбин буллум дии саныыбын. Хомойуох иһин, хамнас кээмэйэ олус кыра.

Интернет-форумнарга Саха НКИК үлэтин сотору-сотору ырытааччылар. Хайҕыыр киһи аҕыйахsmile Үксүн кириитикэлииллэр. Эн санааҕар Саха НКИК үлэтигэр баар итэҕэстэри туоратарга тугу гыныахха сөбүй?

Кириитикэлииллэрэ сөп бөҕө буоллаҕа дии. Итэҕэс-быһаҕас элбэх. Ол эрэн кэнники кэмҥэ Саха НКИК саҥа таһымҥа таҕыста диэххэ наадалаах. Ол курдук хаачыстыба өттүнэн, компьютернай графика да өттүнэн, биэриини ыытыы да өттүнэн биллэ тубуста. Мин санаабар, НКИК үлэһиттэригэр элбэх мастер кылаастар наадалар. Холобур, Россия биллэр телекомпанияларыгар тиийэн хас биирдии үлэһит бэйэтин специализациятынан үөрэнэрэ буоллар, практическай өттүнэн.
Хамнас кээмэйин уларытыахха наада. Саха НКИК үлэһитин престиһин үрдэтиэххэ наада. Оччоҕо талааннаах, саҥа көрүүлээх, инникилээх ыччат үлэлии кэлиэ этэ. Оччотугар үчүгэйтэн үчүгэйдэри куонкуруһунан эрэ үлэҕэ ылыахха сөп этэ дии саныыбын.

Интернеты тус олоххор төһө туһанаҕын? Сахалыы саайтарга, форумнарга сылдьааччыгын дуо? Эн санааҕар, сахалыы ресурстар киһи болҕомтотун төһө тардалларый?
 
Интернеты улаханнык туһаммаппын. Бириэмэ баар буоллаҕына сахалыы форумнары киирэн көрөөччүбүн эрэ, кыттыһааччым суох.

«Ырыа кырдала» саайт ыалдьыттарыгар тугу баҕарыаҥ этэй? Уонна ханнык ырыаларгын бэлэхтиигин?

Маҥнай эйиэхэ, «Ырыа кырдала» саайты арыйбыт киһиэхэ, эҕэрдэни тиэрдиэм этэ - бэртээхэй саайты аспыккын. Сахалыы куттаах, ыллыан-туойуон, ырыаһыттары билиэн-көрүөн баҕарар киһиэхэ сүрдээх үчүгэй саайт эбит. Киһи билбэтэҕин билэр, көрбөтөҕүн көрөр, истибэтэҕин истэр.
Киириҥ, көрүҥ, «Ырыа кырдалын» ыалдьытынын буолуҥ. Уонна эһиэхэ барыгытыгар «Баар буоллун» (Мария Алексеевалыын дуэт), «Саллаат доҕоруом» диэн ырыаларбын бэлэхтиибин.
 
 
[audio=http://sanaalar.ru/uploads/files/maksim%201.mp3]
 
[audio=http://sanaalar.ru/uploads/files/maksim%202.mp3]
 
 
 
Кэпсэттэ СИНИЛЬГА


Все материалы с раздела «Саайт ыалдьыттара» принадлежат автору проекта и могут быть использованы только с согласия автора. Все права на исходные аудиоматериалы принадлежат их авторам и владельцам. Аудиоматериалы предоставлены исключительно для ознакомительного прослушивания.



БААР БУОЛЛУН

Максим Березин тыллара уонна мелодията

Баҕарыам этэ Сахам сиригэр
Сайда, чэчирии, туругура турдун,
Үйэлэр тухары дьол тосхойдун,
Дьон үөрүүтэ улаата турдун.

Хос ырыата:

Баар буоллун өрүү кэрэҕэ тардыһыы,
Баар буоллун ыраас таптал,
Баар буоллун өрүү чаҕылхай, сырдык күн,
Баар буоллун олоххо дьол-соргу.

Хас биирдии киһи, бар дьонум,
Өйөһүөххэ, өйдөһүөххэ ханна да буоллун,
Оччоҕо дойдубар өрүү баар буолуо
Эйэлээх буолуу, кэрэҕэ иэйии.

Хос ырыата.

Суох буоллун харах уута, баар буоллун үөрүү,
Күүстээх баҕа санаа салайдын олоххо.
Сахам норуота, эдэр ыччата
Үүннүн, үксээтин үйэлэр тухары.

Хос ырыата:

Баар буоллун өрүү кэрэҕэ тардыһыы,
Баар буоллун ыраас таптал,
Баар буоллун өрүү чаҕылхай, сырдык күн,
Баар буоллун олоххо дьол-соргу.
Баар буоллун олоххо дьол-соргу.
 

 
Нөрүөн-нөргүй буоллун биһиги саайтпыт ыалдьытыгар! Билигин эн ыалдьыт курдук киирдин. Бэлиэтэнэн киирдэххинэ бу сиртэн элбэҕи бэйэҕэр туһаныаххын сөп.

Майгынныыр сонуннар:


« Төттөрү
Ырытыылар
 
Синильга   12 мая 2008 11:24
Максимҥа өссө төгүл махтал! Мин бэйэм "Баар буоллун" ырыаны наһаа сөбүлээн истэбин. Былырыын Мариялыын наһаа үчүгэйдик ыллаабыттара. Өссө бастаабыттара:-) Наһаа кыраһыабай дуэт этэ. Дьон сүрдээх ылыммыта, сэргээбитэ.
Айар үлэҕэр ситиһиилэри!
Цукерман   12 мая 2008 12:01
Синильгаа здравствуй... Баһаалыста өссө "Армия" диэн ырыатын угаҕын (мп-3 формат)... Олус сөбүлээн истэр ырыам ол баар... =))). Максы аҥаардас ити ырыатын иһин убаастыыбын... Маладьыас, талааннаах ыччат...
Синильга   12 мая 2008 12:12
Бэйэтэ көҥүллээтэҕинэ, бэйэтэ биэрдэҕинэ киллэриэхпин сөп. Билиҥҥи сокуонунан автор көҥүлэ суох MP3 форматтаах ырыаларын ким да ханна да туттубат.
Qwer   12 мая 2008 12:29
Армияны ааспыкка концертка истибитим - мощно, Максим респект!
..............................................................................................................................................................
Маннааҕыбын :)
tt   15 мая 2008 04:01
Politicheski nahaa septeekh tema, tol'ko vot net samogo glavnogo - golosovykh dannykh, tem bolee vremya ot vremeni proslushivautsya kakie-to nepriyatnye gortannye notki. Net, eto ne Vashe remeslo!
Qwer   15 мая 2008 10:42
ТТ, да не стоит вам здесь искать задатки будущего Карузо. Для Максима это не более чем хобби.))
..............................................................................................................................................................
Маннааҕыбын :)
БуоБа   28 декабря 2009 18:03
Онтон мохсо5оллор диэн ырыаны хантан булуохха собуй?
Эдьээн,Дьогуор   14 сентября 2010 03:58
Максим маладьыас,кытаат,дьоннун аатттатар дьо4ун,модун ки4и буол! Эйигинэн киэн туттабыт,уорэбит,дьан-дьа4ах эйигин тумуннун,ку4а5ан санаа тумуннун,ийэ5эр э5эрдэ.Сайда тур,тупсан ис.
кыьыл ойуун   15 сентября 2010 14:41
саллаат до5орум диэн ырыа олох киьи кутун - сурун таарыйар эбит...оссо да уунэ - сайда тур!

Ырытыыга кыттабын




 

Сайт зарегистрирован в Федеральном Агентстве
по информационным технологиям
Свидетельство №11945 от 6 мая 2008 года

Автор проекта - Синильга
сайт открыт 17 августа 2007 © Ырыа кырдала
Условия использования материалов, размещенных
на сайте «Ырыа кырдала»

Доступ к сайту бесплатен для пользователей
Экспресс-Сеть, Гелиос-ТВ, ЯГУ, Наука, Оптилинк, Сахаспринт и по льготному пиринговому тарифу
для сетей ADSL и "Столица" (7 коп./1 мб).