| Наталья Яковлева - Далаана |
| 29 февраля 2008, 11:10 | Көрдүлэр: 26989 | Саайт ыалдьыттара |
|
"Дьиҥ кыайыы диэн миэхэ дьон биһирэбилэ! Ол саамай миэхэ истиҥ! Оттон статуэтка эрэ иһин атыылаһан ылыы диэн онно тэҥнэммэт".
Далаана, бастатан туран эйиигин «Саҥа ырыа» конкурс кыайыылааҕа аатын ылбыккынан эҕэрдэлиирбитин көҥүллээ. Киэҥ араҥаҕа бэйэҥ тускунан кэпсии түс эрэ. Эҕэрдэҕит иһин махтал! Мин Дьокуускай куоракка төрөөбүтүм. Оҕо сааһым оонньообут кырдала Уһун Күөлгэ Сылаҥҥа ааспыта. Онно эбээлээх эһээм олороллор этэ. Аҕабынан Дьаакыбылаптар диэн улахан аҕа ууһа буолабыт. Силистэрим Кытаанахтан тэһииннээхтэр. Чурапчы орто оскуолатыгар алта сыл үөрэнэн баран куоракка көһөн барбыппыт. Салгыы 2-с нүөмэрдээх оскуоланы үөрэнэн бүтэрбитим. Оскуола кэнниттэн ЯГСХАҕа экономическэй факультекка бухгалтер идэтигэр киирбитим. 5 сыл ситиһиилээхтик үөрэнэн баран, үөрэҕим кэнниттэн биир сыл тутуу тэрилтэтигэр кылаабынай бухгалтерынан үлэлээбитим. Онтон дууһа уонна өй мөккүөрүн кэнниттэн үлэбиттэн уурайарга санаммытым уонна биир да күн онтон кэмсиммэппин. Билигин Эстрада театрыгар үлэлии-хамныы сылдьабын. Эн Чурапчыттан төрүттээххин. Биһиги билэрбитинэн, Екатерина Егорова, Анастасия Готовцева, Саина, Александра Алексеева, Ый Кыыһа, Уля Сергучева-Күннэй ийэтинэн эмиэ Чурапчыттан төрүттээхтэр. Бу ааттаммыт биир дойдулаахтаргыттан кими холобур оҥостоҕун? Ким айар үлэтэ эйиэхэ ордук чугаһый ? Бу ааттаабыт дьонноргут миэхэ бары эдьиийдэрим кэриэтэ буолаллар. Сүрдээҕин диэн убаастыыбын, ытыктыыбын. Оттон Уля истиҥ дьүөгэм буолар. Барыларын да кытта элбэхтэ гастроллаабытым, алтыспытым. Ордук Варялыын чугаспыт, кини миэхэ хаан аймаҕым буолар (Даланнарынан), ол иһин бэйэ бэйэбитигэр эдьиий балыс курдук сыһыаннаһабыт. Кэнники ырыатын мин суруйан бэлэхтээбитим. "Кыыс дууһатын" киниттээҕэр ордук ким да инник тиэрдиэ суоҕа этэ дии саныыбын. Оттон айар үлэ туһунан этэр буоллахха, үлэһит киһи үлэтэ хаһан баҕарар көстөр уонна сыаналанар. Онон чуолаан кими да эппэппин, барытын бэйэҕит билэ-көрө олордоххут. Ыллыырыҥ таһынан ырыа айаргын билэбит. Ырыаҥ хайдах үөскүүрүй? Ырыа эн олоххор? Ырыа эмиэ оҕо курдук тапталтан, иэйииттэн үөскүүр. Дууһам муунтуйар эбэтэр үөрэр кэмигэр ордук табыллар курдук. Арыт түүн да айыллар, арыт күнүс. Ону миигиттэн ыйыппат. Бэйэтэ таптаабытынан кэлэр. Ол эрэн күнтэн күн иэйиибин испэр илдьэ сылдьабын. Айар үлэҕинэн дьарыктанаргар көмөлөһөр киһи баар дуо? Тэрээһин боппуруостары хайдах быһаараҕын – таҥас-сап, айан ороскуота уо.д.а.? Көмөлөһөр киһи диэн суох. Барытын бэйэм быһаарабын, сүүрэбин-көтөбүн. Табаарыстарым, аймахтарым сүбэ-ама буолаллар. Эн эстрада ырыаһыта буоларыҥ быһыытынан аныгы саха эстрадатыгар сыанабылыҥ? Саха эстрадата сайдар кэскилэ туохханый дии саныыгын? Олох бара турарын тухары кини эмиэ сайдан иһиэ буоллаҕа дии. Сахалар ахсааммыт аҕыйах буолан истээччи аҕыйах, ол иһин маассабас суох. Диска атыылаан байбаппыт. Улахан куораттарынан турне оҥоруохха сөп этэ. Мин санаабар, Саха эстрадата сүрдээҕин сайынна дии саныыбын. Аҥардас бүтэһик 5 сылы ылан да көрдөххө. Ол эрэн сахалыы тыыммытын хаһан да ыһыктымыахпытын наада! Ону сүтэрдибит да бүтэбит! Эстрадабыт сайдар кэскилэ атыттары үтүктүбэккэ, бэйэбит дириҥ өйдөбүллээх сахалыы тылбытын-өспүтүн матыыпка хоһулатан ырыа оҥостон ыллыы сылдьарбытыгар дии саныыбын. Төһөнөн элбэх сахалыы ырыа-тойук, соччонон үчүгэй! Элбэх ырытыылаах, мөккүөрдээх «Саҥа ырыа» конкурс туһунан кэпсэтиэх. Бары билэрбит курдук быйылгы конкурс сүрүн уратытынан ырыа ханнык баҕарар тылынан ылланара буолбута. Ол түмүгэ – уһулуччута суох эрээри, аҥардас элбэх куолас киирэн Арменияттан төрүттээх Эрмине толорбут ырыата бастаабыта буолар. Куолас ахсаанынан ылан көрдөххө дьиҥэр кини бастаатаҕа дии. Маннык түгэҥҥэ тэрийээччилэр конкурс балаһыанньатын уларытан икки бастакы миэстэ оҥорбуттарын эн хайдах ылынаҕын? Оттон тэрийээччилэр ыксаан оннук оҥордохторо, сүрэхтэринэн, дууһаларынан миэхэ ыалдьар буоланнар дии саныыбын. Эрминеҕэ дойдубут ыраах нэһилиэктэрэ куоластаабыттара буолуо дии саныыгыт дуо? Мин хайдах эрэ саарбахтыыбын. Чэ ити курдук. Мин саныырбынан бу конкурс сүрүн сыала – сахалыы ырыаны пропагандалааһын буолуохтаах. Эдэр ырыаһыттарга стартовай площадка. Оттон аҥардас үбү эрэ киллэрэр сыаллаах буоллаҕына хайдах да ырыа конкурса диэн ааттанар кыаҕа суох. Инникитин да маннык быһыылаахтык тэрийэн ыытар буоллахтарына, чуолаан бу конкурска саха ырыата «үтүрүйтэрэрэ» элбииһи. Холобур, аныгыс сырыыга Кытайтан сылдьааччы конкурска кыттан Кытайы бүтүннүү куоластаттаҕына кыайара чуолкай. Эн санааҕар бу сөп дуу, сыыһа дуу? Кырдьык бу конкурс сүрүн сыала туохха буоларын тэрийээччилэр чуолкайданыахтарын наада. Быйылгы курдук буолара табыллыбат! Дьон сүрэҕэлдьээн куоластаабат да буолар кэмэ кэллэ. Тугу эрэ атыны толкуйдуохтарын наада. Уонна булгуччу сахалыы эрэ ырыа конкурса буоллар диэн баҕа санаабын этэбин. «Эхо столицы» хаһыакка маннык диэн суруйбуттар этэ. "За Эрминэ голосовали родные, земляки, однокурсники, друзья и знакомые, которых много, ведь девушка живет в Якутске с 3 лет." Уонна конкурс кэнниттэн бастакы интервьютугар Эрмине «Кто захотел, тот и взял» диэн аһаҕастык эппитэ. Ол аата ким элбэх аймахтаах, доҕордоох, быһаччы эттэххэ ким куоластааһыҥҥа элбэх харчы төлүүр кыахтаах – ол кыайар конкурса. Куоластааһын ньымата элбэх боппуруос үөскэтэр. Манна эн сыһыаныҥ уонна сыанабылыҥ? Уонна куоластааһын ньыматыгар эн туох уларытыы киллэриэҥ этэй? Итинник куоластааһын ньыматын олох утарабын! Биир телефонтан биир эрэ куолас буолуохтаах. Оччоҕо эрэ дьиҥнээх хартыына көстөн кэлиэ этэ. Онон тэрийээччилэр куоластааһын ньыматын хайаан да уларытыахтарын наада! Биһиги саайпыт кэпсэтэр түһүлгэтигэр бу конкурс тула элбэх ырытыы, мөккүөр тахсыбыта. Ол курдук, оннооҕор саха ырыаһыт ыччатын быйылгы "Саҥа ырыаны" бойкуоттуурга, чуолаан түмүк концерга кыттымаҥ диэн форум олохтоохторо ыҥырыы таһаара сылдьыбыттара. Эйиэхэ оннук этии киирбитэ буоллар, ханнык быһаарыныы ылыныаҥ этэй? Эһиил бу конкурска кыттар санаалааххын дуо? Кырдьыгынан эттэххэ, оннук санаалар киирэ сылдьыбыттара. Ол эрэн бэйэм сүгүрүйээччилэрбин, миэхэ куоластаабыт сахам дьонун хомотуохпун баҕарбатаҕым. Эһиилги «Саҥа ырыаҕа» кыттар санаам суох. Дьиҥ кыайыы диэн миэхэ дьон биһирэбилэ! Ол саамай миэхэ истиҥ! Оттон статуэтка эрэ иһин атыылаһан ылыы диэн онно тэҥнэммэт. Ол иһин көрөөччү, истээччи миэхэ күүстээх өйөбүлүн мин эппинэн-хааммынан билбитим! Саҥа ырыа бүтэһик күннэригэр быыбарга Чурапчы улууһугар тахса сылдьыбытым. Онно биир нэһилиэккэ кэнсиэр кэнниттэн биир эмээхсин кэлэн миигин көрдүү сылдьар эбит. Туохха көрдөөтүҥ диэн ыйыппыттарыгар: "Далаанаҕа куоластыырыгар харчы биэриэм этэ, биһиэхэ суотабайбыт сибээһэ мөлтөх, хаппат, олох наһаа кыайтаран иһэр дии ити эрмээн кыыһыгар", - диэбитигэр туораттан истэн турбут бэйэм долгуйан, уйадыйан ылбытым... Инньэ гынан син биир күүһүнэн 1050 солк. туттаран кэбиспитэ. Ити кэнниттэн киһи туох диэн сөбүй? 2007 сыл түмүгүнэн «Этигэн Хомус» конкурска «Сыл бастыҥ ырыаһыта» номинацияҕа киирбиккин. Уонна Ырыа кырдала саайт ыытар опроһун түмүгүнэн көрдөххө интернет эйгэҕэ сылдьааччылар эйиигин сыл бастыҥ ырыаһытынан талбыттар. Уопсайынан даҕаны эйиэхэ таһаарыылаах сыл ааста диэххэ сөп. Бу ааспыт сылга ситиһиилэриҥ туһунан кэпсээ эрэ. Оо, кырдьык даҕаны, былырыын ситиһиим элбэх этэ  . Хайдах сылбын саҕалаабытым да соннук бара турбутум. Бастаан 2006 сыл түмүгүнэн Этигэн Хомус конкурска "Сыл бастыҥ саҕалаччыта" номинацияны ылбытым, онтон аҕыйах хонон баран Монголияҕа норуоттар икки ардыларынааҕы улахан конкурска барбытым. 1,5 ыйы быһа онно олорбутум, үөрэммитим, түмүгэр I бириэмийэлээх Лауреат үрдүк аатын сүгэн кэлбитим. (New Stars конкурс миэхэ элбэҕи биэрбитэ). Салгыы күһүн "Услышь меня, Улан-Удэ" Бурятияҕа ыытыллыбыт эмиэ норуоттар икки ардыларынааҕы конкурска III Бириэмийэлээх Лауреат буолбутум уонна ол конкурска "Мисс конкурса" диэн номинацияны ылбытым. Кыайыылаах-хотуулаах дойдубар эргиллэн кэлбитим. Ол быыһыгар араас кэлиилэр-барыылар, кылгас-уһун суоллар. Бурятия үтүөлээх артыыстарын Нонналаах, Зоригто Тогочиевтары кытары ыга билсэн-көрсөн сайыны быһа кинилэргэ күөлэһийэн, ыалдьыттаан сайыным түргэнник ааспыта. Зорик 30 сааһын туолар юбилейыгар ыҥырбыта, ол онно бара сылдьан Иркутскайынан гастроллаан кэлбиппит. Бурятия саамай кыраһыабай сиригэр Байкал күөлүгэр сылдьыбыппыт, сынньаммыппыт. Олус үчүгэй кэмнэр этэ! Алтынньы бүтүүтүн саҕана Улан-Баатырга Балхжав сылын аайы ыытар доҕордоһуу кэнсиэригэр бараммын кыттыбытым. Сир-дойду араас муннуктарыттан кэлбиттэр этэ. Таарыйа бастакы клиппын устубутум. Доҕотторбун кытта көрсүһэн үөрүүм муҥура суох этэ! Былырыын Монголия5а уопсайа үстэ сылдьыбыппын, онтон Бурятияҕа түөртэ. Доҕотторум баар сирдэрэ ыҥыра, угуйа турар! Өссө да барыам турдаҕа! «Ырыа кырдала» саайт ыалдьыттарыгар уонна бэйэҥ сүгүрүйээччилэргэр тугу баҕарыаҥ этэй? Уонна ханнык ырыаларгын бэлэхтиигин? Баҕарыам этэ хаһан да санааҕытын түһэрбэккитигэр, сонньуйбаккытыгар! Бэриниилээх эйгэҕитигэр бастыҥ эрэ буолуҥ! Туруорбут сыалгыт туолан истин, баҕа санааҕыт сахпыт кыыма сандаара умайдын! Өрүүтүн инники күөҥҥэ сылдьыҥ! Хантан хааннааххытын, кимтэн кииннээххитин хаһан да умнумаҥ! Сахам дьонугар миэхэ итэҕэлгитин, өйөбүлгүтүн иһин муҥура суох махталбын тириэрдэбин! Уонна эһиэхэ бэйэм суруйбут «Билэбин» уонна Лэгэнтэй суруйбут «Нарыйа кыыс» диэн ырыаларын аныыбын. Өрүү бииргэ эһиги Далаанаҕыт Далаана - Нарыйа Кыыс (скачать) Кэпсэттэ СИНИЛЬГА
Все материалы с раздела «Саайт ыалдьыттара» принадлежат автору проекта и могут быть использованы только с согласия автора. Все права на исходные аудиоматериалы принадлежат их авторам и владельцам. Аудиоматериалы предоставлены исключительно для ознакомительного прослушивания. |
Биһиги бүгүҥҥү ыалдьыппыт «Саҥа Ырыа» быйылгы күрэҕин кыайыылааҕа Далаана|
Нөрүөн-нөргүй буоллун биһиги саайтпыт ыалдьытыгар! Билигин эн ыалдьыт курдук киирдин. Бэлиэтэнэн киирдэххинэ бу сиртэн элбэҕи бэйэҕэр туһаныаххын сөп.
Майгынныыр сонуннар: |
« Төттөрү
Ырытыылар
