УСТАН ИҺЭР КУБАЛЫЫ

В.Башарин тыллара

Сис тыаттан эгэй-сэгэй
Чубуку сүүрэн ааспат,
Алтан оппут үрдүгэр
Лыах мустан аалыҥнаспат.

Хос ырыата:

Ити саха кыысчаана
Үҥкүүлээн сэгэлдьийэр,
Сайа охсор тыал буолан
Сүрэҕи өрүкүтэр.

Чобуо чыычаах кынатын
Уларсыһан ылбыттыы,
Күөрэгэйдии дайбахтыы,
Күөрэйтэлээн ылбахтыыр.

Хос ырыата.

Ыллам ыра санаалыы,
Ыраах дуолга ыҥыртыыр,
Устан иһэр кубалыы,
Уран-нарын хамсаныы.

Хос ырыата.