| «103» бөлөх бастакы хомуурунньуга |
| 11 июля 2009, 18:41 | Көрдүлэр: 14304 | Сонуннар |  |
 Саха аныгы рок-муусукатын сэҥээрээччилэр балайда өр кэтэспиттэрэ туолла. Бэрт соторутааҕыта Эстрада тыйаатырын муусукаҕа салаатын салайар Евгений Тазетдинов устуудьуйатыгар «103» бөлөх «Бүтэһик пионер» диэн бастакы диискэтин таһаарда. Кырдьык, син өр кэтэстибит быһыылаах - үлэ балтараа сылы быһа барбыт. Арыый эрдэ тахсыаҕын, кэм даҕаны, үп-харчы кырыымчыга кыайбыт. Бөлөх састаабын билиһиннэрдэххэ: Игорь Капитонов - салайааччы, гитара; Анатолий Соловьев - бас-гитара, бэк-вокап; Илья Винокуров - вокал, хомус; Евгений Мегежекскэй -охсор-тэбэр үстүрүмүөн; Константин Васильев - клавиша үстүрүмүөнэ. Уолаттар 2005 сыллаахха мустан баран, икки-үс сыллааҕыттан киэҥник биллэн барбыттара. Хаста да «Табык» бэстибээлгэ, «Тыыннаах дорҕоон көс түһүлгэтигэр» кыттыбыттара, тыыннаах доҕуһуоллаах бастыҥ эдэр бөлөх аатын ылан «Этигэн Хомуска» тиксибиттэрэ, «Дохсун Дорҕоон» түһүлгэни тэрийсибиттэрэ. Диискэҕэ уон алта ырыа киирбит. Бэйэлэрэ этэллэринэн, этно-хард хайысхалаах ырыалар. Тапталтан, уруу ырыатыттан саҕалаан сэрии ыар тыыныгар, кытыыга быраҕыллыбыт кырдьаҕас киһи кыһалҕатыгар тиийэ хоһуйаллар, бөрө буолан улуйаллар, һыт-тыалаан да ылаллар, оһуокай тэбэллэр. Биир саамай биллибиттэрэ - «Бүтэһик пионер». Бу ырыа хайдах айыллыбытын, бөлөх хайдах тэриллибитин, ураты ырыа суолун тутуһар эдэр дьон кэнэҕэһин туох былааннаахтарын, о.д.а. туһунан «Хатан» сурунаал аныгыскы, атырдьах ыйыгар тахсыахтаах нүөмэригэр ааҕыаххытын сөп. Оттон «103» бөлөх эмиэ да ыарахан тутуллаах, эмиэ да сахапыы салгыннаах, хабарҕа куоластаах, хомус киэргэллээх ырыатын-тойугун, оонньуутун-доҕуһуолун уура сылдьан истиэн баҕалаахтар «Бүтэһик пионер» альбому булуҥ, истиҥ, сыаналааҥ, сынньаныҥ, толкуйдааҥ. "Кыым", 2009 с., от ыйын 9 күнэ, 26№ Хаартыска uhhan.ru саайтан ылылынна |
|
Нөрүөн-нөргүй буоллун биһиги саайтпыт ыалдьытыгар! Билигин эн ыалдьыт курдук киирдин. Бэлиэтэнэн киирдэххинэ бу сиртэн элбэҕи бэйэҕэр туһаныаххын сөп.
Майгынныыр сонуннар:
|
« Төттөрү
Ырытыылар (2)
.jpg&width=65&height=65?&cropratio=1:1)
