ХАЛЫМА ЧУУМПУРБУТ ИЭНИГЭР

Халыма чуумпурбут иэнигэр
Көрөбүн дип-дириҥ халлааны,
Дьэргэлгэн долгуйа оонньуурун,
Уу халлаан уруулуу буолуутун -
Холуйуох эбиппин биллибэт
Ырай диэн ураты кэрэҕэ,
Арай бу букатын буолуммат
Сүтүктээх соҕотох тайахчаан.

Күннэтэ бу манна кэлээччи,
Сүтэрбит оҕотун суохтааччы
Саһарбыт сэбирдэх тэлгэммит,
Кэрийэр идэлээх, биэрэгин,
Ийэ кыыл эрэлин сүтэрбит,
Ырай дуо киниэхэ бу дойду,
Оҕотун былдьаабыт айылгы?