МИН КӨТӨБҮН Печать    
Виталий Власов тыллара, Николай Сибиряков мелодията

Дьэ-бу! Дьэ-бу!

Көмүлүөк оһоҕум иннигэр —
Куйаары курдары көрөбүн,
Киҥкиниир киэҥ халлаан иэнигэр
Күн Хотой буоламмын көтөбүн.

Хос ырыата:

Аан Дойду кистэлин билээри
Санаабын көҥүллүк туойабын,
Күн Сирин кэрэтин иилээри
Үрдүк күүс ырыатын айабын.

Дьэ-бу! Дьэ-бу!

Киҥкиниир киэҥ Халлаан ньууругар
Өлбөт күүс таммаҕын көрдүүбүн,
Төрөөбүт төрүт Сир буоругар
Буор кутум хааларын өйдүүбүн.

Хос ырыата:

Олоҥхо олоҕун хатылаан,
Көҥүл Өй күүһүнэн көтөбүн,
Сирдээҕи илэни атыллаан,
Тумарык тумаҥҥа көстөбүн.

Дьэ-бу! Дьэ-бу!

Үтүмэн сүүс үйэ кэнниттэн
Бу Сиргэ атын Сир холбоһуо,
Икки Сир нэлэмэн иэниттэн
Киһи дьэ, көтөргө холонуо!..

Хос ырыата:

Улахан омугу ситтэххэ,
Умнумаҥ Эһэбит дэйбиирин,
Айымньым кистэлин эттэххэ,
Күүтэбин Саха-Хаан элбиирин!!!

1996 с.


 

Сайт зарегистрирован в Федеральном Агентстве
по информационным технологиям
Свидетельство №11945 от 6 мая 2008 года

Автор проекта - Синильга
сайт открыт 17 августа 2007 © Ырыа кырдала
Условия использования материалов, размещенных
на сайте «Ырыа кырдала»

Доступ к сайту бесплатен для пользователей
Экспресс-Сеть, Гелиос-ТВ, ЯГУ, Наука, Оптилинк, Сахаспринт и по льготному пиринговому тарифу
для сетей ADSL и "Столица" (7 коп./1 мб).