КӨМҮЛҮӨК

Егор Лаптев тыллара

Көмүлүөк аал уота умайан,
Балаҕан дьиэ сырдаан, сылыйан,
Күөс, чаанньык, лэппиэскэ буһара,
Тойуксут дуората туойара.

Кыһыҥны хараҥа киэһэҕэ
Кый ыраах айантан истэххэ
Көмүлүөк кытыастар үөлэһэ
Кыымнанан олус да үөрдэрэ.

Көмүлүөк хотугу дойдуга
Күн буолбут, күммүтүн солбуйбут.
Дьэ, ону кэриэстээн музейга
Билигин көрүүгэ бу турбут.

Өбүгэ буор симии оһоҕо —
Көмүлүөк — сахабыт оһоҕо
Куруутун аал уота умайдын,
Бар-дьоммут аһаттын, алҕаатын!