СҮҮРБЭЛЭЭХ ОГДООБО ИЙЭККЭМ Печать    
Петр Тобуруокап тыллара

Мин аҕам сэриигэ өлбүтэ
Уот булкуур түөрт уон биир сыллаахха,
Биллэрии кэнниттэн кэлбитэ
Имиллэн эргэрбит суруга.

"Тыыннаахпын, өлүөрбүн. Сотору
Тиийиэҕим, уолчааным улааттын!"
Биллэрии сымыйа! Суруга
Кэллэ дии, кэллэ!- дии саныырым.

Оччоҕо ытыыры да билбэт
Оройкоон мас саалаах уол этим,
Ол кэмҥэ күннэтэ көстүбэт
Арыылаах килиэби көрдүүрүм.

Түүн аайы ийэккэм ытыыра,
Сүүрбэлээх огдообо ийэккэм,
Уот курдук уоһунан ууруура
Сирэйбин иэдэспин илитэн.

Үлэҕэ бараары түөһүгэр
Ол аҕам суругун уктара,
Хараастан, күүлэтин иһигэр
Өйөнөн, өр тохтоон ааҕара.

Билигин хараҕым ууланар
Кырдьаҕас ийэбин аһынан:
"Эһэтин күлүгэ!"- диэн тахсар
Иккилээх сиэнигэр ылларан.

Мин аҕам сэриигэ өлбүтэ
Уот кутаа түөрт уон биир сыллаахха...
Үйэ-саас огдообо хаалбыта
Сүүрбэлээх эдэркээн ийэккэм!


 

Сайт зарегистрирован в Федеральном Агентстве
по информационным технологиям
Свидетельство №11945 от 6 мая 2008 года

Автор проекта - Синильга
сайт открыт 17 августа 2007 © Ырыа кырдала
Условия использования материалов, размещенных
на сайте «Ырыа кырдала»

Доступ к сайту бесплатен для пользователей
Экспресс-Сеть, Гелиос-ТВ, ЯГУ, Наука, Оптилинк, Сахаспринт и по льготному пиринговому тарифу
для сетей ADSL и "Столица" (7 коп./1 мб).