КЭТЭҺИИ

П. Ойуунускай тыллара

Ырыа-тойук тыкаарым,
Ыллыах-туойуох, гитарам,
Тохтор көмүс дорҕоонум,
Тоҕо бу мин тохтоотум?
Илбис тылбын истээри,
Имэҥ дьайын билээри
Үөрэр-көтөр буоларым
Үөрэ-дьүөрэ туойарым...

Сааскы күнүм тахсыыта,
Саҥа олох сырдыыта
Илбис тыллаах этиэҕэ,
Имэҥ дьайдаах кэлиэҕэ...
Ырыа-тойук тыкаарам,
Ыллыах, туойуох, гитарам,
Тохтор көмүс дорҕоонум,
Тоҕо бу мин тохтоотум?

Кэлэр сааска тиийиэхпит,
Кэрэ тылы истиэхпит –
Үөрэр-көтөр буолуохха,
Үөрэ-дьүөрэ туойуохха!
Ырыа-тойук тыкаарым,
Ыллыах-туойуох, гитарам,
Тохтор көмүс дорҕоонум,
Тоҕо бу мин тохтоотум?