ХОДУҺАҔА КҮН ООННЬУУР Печать    
Пет Тобуруокап тыллара

Ходуһаҕа күн оонньуур,
Хойуу окко куобахтыыр,
Күлүмүрдүүр-суһумнуур,
Күөлэһийэр, таалалыыр.
Чэйиҥ, күннүүн турсуоҕуҥ!
Чээлэй күөхтэн сомсуоҕуҥ!
Холлоох үлэ күүрүөхтүн,
Ходуһаны үөрдүөхтүн!

Туотаһыйар кулунчук
Тоттук кыстаан таҕыстын,
Тэйиэккэлиир ньирэйчик
Дэлэй-дэлэй астаннын!
Чэйиҥ, күннүүн турсуоҕуҥ!
Чээлэй күөхтэн сомсуоҕуҥ!
Күүстээх үлэ ньиргийдин,
Күөлү-тыаны күллэрдин!

Оҕолорго сарсыарда
Остуол аайы сүөгэйдэ!
Көтөр, дайар ыччакка
Күүстээх, уохтаах кымыста!
Чэйиҥ, күннүүн турсуоҕуҥ!
Чээлэй күөхтэн сомсуоҕуҥ!
Күнү кытта оонньуоҕуҥ
Күнү быһа оттуоҕуҥ.

Ходуһаҕа күн күлэр,
Хоһуун дьоннуун көччүйэр,
Ходуһаҕа күн ыллыыр,
Хотуурбутүн сыгыылаар!
Чэйиҥ, күннүүн турсуоҕуҥ!
Чээлэй күөхтэн сомсуоҕуҥ!
Илгэ-быйаҥ үлүннүн,
Иҥиир-быччыҥ күүһүрдүн!


 

Сайт зарегистрирован в Федеральном Агентстве
по информационным технологиям
Свидетельство №11945 от 6 мая 2008 года

Автор проекта - Синильга
сайт открыт 17 августа 2007 © Ырыа кырдала
Условия использования материалов, размещенных
на сайте «Ырыа кырдала»

Доступ к сайту бесплатен для пользователей
Экспресс-Сеть, Гелиос-ТВ, ЯГУ, Наука, Оптилинк, Сахаспринт и по льготному пиринговому тарифу
для сетей ADSL и "Столица" (7 коп./1 мб).