САЙЫЛЫГЫМ БАРАХСАН Печать    

И. Ефремов тыллара

Сайылыгым барахсан
Дьэдьэн уга киэргэллээх,
Хатыҥ чараҥ алардаах,
Отон уга оһуордаах,
Бэстээх үрдүк мырааннаах.

Сайылыгым барахсан
Тула өттө эргиччи
Нуолур солко тыалардаах,
Дьиримирдиир долгуннаах
Дьикти ыраас уулардаах.

Сайылыгым барахсан
Сибэккинэн симэммит
Сиэдэрэйкээн көрүҥнээх,
Күндү көмүс күөмэйдээх
Күөрэгэйдиир чыычаахтаах.

Сайылыгым барахсан
Кэрэ дьикти бэйэлээх
Кэккэлэспит дьиэлэрдээх,
Төрөлкөйдүүр төрүөхтээх
Төрүт үтүө фермалаах.

Сайылыгым барахсан
Астаах сүөгэй быйаҥнаах,
Ача күөҕэ сайыннаах,
Үөрүү-көтүү аргыстаах
Тунал ыһыах уйгулаах.

Сайылыгым барахсан
Ырыа, үлэ аргыстаах-
Ыанньыксыттыыр ыччаттаах,
Барытыгар дьоҕурдаах
Бастыҥ, маяк дьоннордоох.




 

Сайт зарегистрирован в Федеральном Агентстве
по информационным технологиям
Свидетельство №11945 от 6 мая 2008 года

Автор проекта - Синильга
сайт открыт 17 августа 2007 © Ырыа кырдала
Условия использования материалов, размещенных
на сайте «Ырыа кырдала»

Доступ к сайту бесплатен для пользователей
Экспресс-Сеть, Гелиос-ТВ, ЯГУ, Наука, Оптилинк, Сахаспринт и по льготному пиринговому тарифу
для сетей ADSL и "Столица" (7 коп./1 мб).