БУЛЧУТ ЫРЫАТА

В. Сивцев тыллара, Г. Новгородов мелодията

Табалар тамайа сүүрэллэр
Таймылыыр үрэҕин үрдүнэн.
Сулустар имнэнсэн кээһэллэр
Суһумнуур халлааным үөһүнэн.

Сотору сохсобор тиийэммин
Кылааннаах кырсаны кыбыныам.
Дьүкээбил уоттарын тиһэммин
Наартабар сэрэнэн уурталыам.

Кылааннаах түүлээҕи дойдубар
Бар дьоммор үөрүүнэн аныыбын.
Күөх сулус күлүмүн анныгар
Кэргэним мичээрин саныыбын.

Табалар тамайа сүүрэллэр
Таймылыыр үрэҕин үрдүнэн.
Сайыҥҥы кустуктар түһэллэр
Төрөөбүт туундарам дуолунан.