СИМЭН СЫТАР ХАРАХПАР Печать    
И. Гоголев тыллара

Симэн сытар харахпар
Силигилээн кэллилэр
Илибирэс иирэлэр,
Тэлибирэс тэтиҥнэр.

Кылыгырыы сүүрдүлэр
Кыһыл көмүс сүүрүктэр,
Мичээрдэһэн истилэр
Бичик оһуор биэрэктэр.

Кыламанын куоҕатан
Кырасыабай кыыс күллэ.
Хааһын-уоһун хамсатан,
Хааман-сиимэн бу кэллэ.

Эттэ үөһэ тыынаахтаан:
«Эдэр хопто буолуохха,
Кылбаарыччы дайбахтаан
Кыырай хоту дайыахха.

Тыҥ хатыыта тэтэркэй
Тыымпы күөлгэ умсуохха,
Унаар күнүм кэмчиэркэй
Уотун тута оонньуохха!..»

Симэн сытар харахпар
Сахам сирэ көһүннэ.
Тэгил ыраах сылдьарбар
Түһээн илэ билиннэ.


 

Сайт зарегистрирован в Федеральном Агентстве
по информационным технологиям
Свидетельство №11945 от 6 мая 2008 года

Автор проекта - Синильга
сайт открыт 17 августа 2007 © Ырыа кырдала
Условия использования материалов, размещенных
на сайте «Ырыа кырдала»

Доступ к сайту бесплатен для пользователей
Экспресс-Сеть, Гелиос-ТВ, ЯГУ, Наука, Оптилинк, Сахаспринт и по льготному пиринговому тарифу
для сетей ADSL и "Столица" (7 коп./1 мб).