ЫҺЫАХХА ЫҤЫРЫЫ Печать    
Семен Данилов тыллара, Георгий Никифоров мелодията

Сибэккинэн симээммит
Сэлэ чэчир астыбыт,
Үрүҥ астаах сири иһит
Түһүлгэтин тартыбыт.

Саамал кымыс ыһыаҕар
«Сайдыы» колхоз ыҥырар.
Кэлиҥ, күндү ыалдьыттар,
Көрдөһөбүт, ыалдьыттааҥ!

Оонньуулаахтыын оонньоһор
Уолан дьоннор үгүстэр,
Кыраһыабай оҕолор,
Кыргыттар да дэлэйдэр.

Көрдөөх эдэр киһиэхэ
Көр-нар дэлэй биһиэхэ,
Кэлиҥ, күндү ыалдьыттар,
Көрдөһөбүт, ыалдьыттааҥ!

Олоҥхоһут оҕонньор
Олбох булан олорор,
Сэлэһэргэ бэлэмнэр
Сэргэх сээркээн сэһэннэр.

Сайдам-дьэллэм киһиэхэ
Сонун ''элбэх биһиэхэ,
Кэлиҥ, күндү ыалдьыттар,
Көрдөһөбүт, ыалдьыттааҥ!

Кытыт сылгы кымыһа
Кырылаччы кутуллар.
Субай, харта сокууска
Сойон, тупсан тураллар.

Аҕам аһас киһиэхэ
Ас-үөл дэлэй биһиэхэ.
Кэлиҥ, күндү ыалдьыттар,
Көрдөһөбүт, ыалдьыттааҥ!

Асчыт талыы кыргыттар
Айах тутан күүтэллэр,
Тустуук, быһый уолаттар
Доҕоттору кэтииллэр.

Уйгу-быйаҥ ыһыаҕар
Улуу колхоз ыҥырар.
Кэлиҥ, күндү ыалдьыттар,
Көрдөһөбүт, ыалдьыттааҥ!


 

Сайт зарегистрирован в Федеральном Агентстве
по информационным технологиям
Свидетельство №11945 от 6 мая 2008 года

Автор проекта - Синильга
сайт открыт 17 августа 2007 © Ырыа кырдала
Условия использования материалов, размещенных
на сайте «Ырыа кырдала»

Доступ к сайту бесплатен для пользователей
Экспресс-Сеть, Гелиос-ТВ, ЯГУ, Наука, Оптилинк, Сахаспринт и по льготному пиринговому тарифу
для сетей ADSL и "Столица" (7 коп./1 мб).