МИН АҔА ДОЙДУМ

И. Павлов тыллара

Мин Аҕа дойдум -
Аан дойду
Алтаттан бииригэр
Баттал тимир сыабын
Аан бастакынан
Быһа тыыллыбыт,

Көҥүлү, тэҥи, дьолу
Туругурдубут дойду!

Мин Аҕа дойдум —
Хабала
Хараҥа күүһэ
Хараара халыйан тахсарын
Харса суох
Хампы охсор,

Кытаанах, ньыгылтан ньыгыл
Гранит очуос мин дойдум!

Мин Аҕа дойдум —
Сайдыы
Аартыгын арыйан
Инники эрчимник хардыылыыр,
Сулустарга тиийэр
Суолу тэлэр,

Өркөнтөй, сырдык ыра
Өрөгөйдөөбүт дойдута!