КИЭҺЭЭҤҤИ ЛЕНА

Иван Гоголев тыллара

Кыһыл көмүс тумарыкка
Киэһээ Лена сууланна,
Долгуйбакка тыаһаабакка
Улуутуйа уһунна.

Мутукча тыа мырааныгар
Кэҕэ этэн чоргуйар,
Иирэ талах арыытыгар
Кыынньар кутаа умайар.

Маннык талба киэһэлэргэ
Сүрэх түөскэ талбаарар,
Туохха эрэ үчүгэйгэ
Сып-сырдыкка талаһар.

Кини күүтэр, сэмээр күүтэр
Олус күүстээх тапталы,
Ыччат дьоҥҥо кэрэхсэтэр
Үрдүк үтүө аналы.