МЭТТЭКЭ-ТЭТТЭКЭ МИИТЭКЭЙ Печать    
Иннокентий Сосин тыллара

Мэттэкэ-тэттэкэ Миитэкэй,
Мэлэгэр-тэлэгэр Миитэрэй
Атынан көтүтэн эрдэҕэ,
Атынан дибдитэн истэҕэ —
Ким эрэ күүтэрин сэрэйэр,
Ким эрэ кинини тиэтэтэр.

Мэттэкэ-тэттэкэ Миитэкэй,
Мэлэгэр-тэлэгэр Миитэрэй
Сүрэҕэ сөбүлүүр сэгэрин
Сүһүөҕэ долгуйа көрсүөҕэ,
Хаарыаннаах хараҕа тырымныа,
Хап-хара кыымынан ыҥырыа.

Мэттэкэ-тэттэкэ Миитэкэй,
Мэлэгэр-тэлэгэр Миитэрэй
Мэнигэр-тэнигэр тэптэрэн
Мэтэгэр бэйэтин кууһуоҕа,
Омунун-төлөнүн аһаран,
Обуйук уоһуттан ууруоҕа.

Мэттэкэ-тэттэкэ Миитэкэй,
Мэлэгэр-тэлэгэр Миитэрэй
Мэнкэрэ эмпэтин аннынан,
Мэҥиэлэй тумулун үрдүнэн
Көтүтэн иһэрэ көһүннэ,
Көрсүһэр күндү кэм бу үүннэ.


 

Сайт зарегистрирован в Федеральном Агентстве
по информационным технологиям
Свидетельство №11945 от 6 мая 2008 года

Автор проекта - Синильга
сайт открыт 17 августа 2007 © Ырыа кырдала
Условия использования материалов, размещенных
на сайте «Ырыа кырдала»

Доступ к сайту бесплатен для пользователей
Экспресс-Сеть, Гелиос-ТВ, ЯГУ, Наука, Оптилинк, Сахаспринт и для сетей ADSL и "Столица".