ӨРҮҮНЭЛИИР ЫАННЬЫКСЫТ Печать    
Петр Тобуруокап тыллара

Үөрэн-күлэн мичилийбит,
Үөмэр-чүөмэр үктэммит
Өрүүнэлиир ыанньыксыт
Үлэһиттэн үлэһит.
Хомуйталыыр хотоно
Куорат дьиэтэ холоонноох,
Бэрийтэлиир дьиэлэрэ
Бэстээх ойуур сыттардаах.

Үөрэн-күлэн мичилийбит,
Үөмэр-чүөмэр үктэммит
Өрүүнэлиир ыанньыксыт
Дьаһаллаахтан дьаһаллаах.
Анаан көрөр сүөһүтэ
Артыал аайы арбанар,
Былааннарын туолуута
Быыстапкаҕа хайҕанар.

Үөрэн-күлэн мичилийбит,
Үөмэр-чүөмэр үктэммит
Өрүүнэлиир ыанньыксыт
Сүрэхтээхтэн сүрэхтээх.
Кыһамньылаах үлэҕэ
Кыргыттары үөрэтэр,
Дьүккүөрдээхэй бэйэтэ
Дьүөгэлэрин көҕүтэр.

Үөрэн-күлэн мичилийбит,
Үөмэр-чүөмэр үктэммит
Өрүүнэлиир ыанньыксыт
Үчүгэйтэн үчүгэй.
Кинигэ, сурук тутуурдаах,
Медаль, орден бэлиэлээх,
Ырыа-тойук аргыстаах
Дьоллоох соргу доҕордоох!


 

Сайт зарегистрирован в Федеральном Агентстве
по информационным технологиям
Свидетельство №11945 от 6 мая 2008 года

Автор проекта - Синильга
сайт открыт 17 августа 2007 © Ырыа кырдала
Условия использования материалов, размещенных
на сайте «Ырыа кырдала»

Доступ к сайту бесплатен для пользователей
Экспресс-Сеть, Гелиос-ТВ, ЯГУ, Наука, Оптилинк, Сахаспринт и для сетей ADSL и "Столица".