автор: ахтылҕан
Хотугу курус ахтылҕан
Дьааҥы кэрэтэ – таас чубукута,
Алыы киэргэлэ – айыы табата.
Сүрэхпэр таптал уотун уматан
Айар куорсунум кутун эргитэр.
Дьүкээбил уота дууһабын аймыы
Суһумнуур суоһа абылыыр миигин,
Дьэрэкээн оһуор санаабын аптыы
Эйэҕэс мичээр хамнатар хааммын.
Арахсар сүрэх аймана иэйэр,
Сып – сылаас уоһуҥ имэҥин илдьэр.
Көтөллөөх уучах тордохтон тэйэр,
Дойду сир суола аартыгын аһар.
Дьүкээбил уотун суһумнуур суоһа,
Ааспат ахтылҕан сүрэххэ сөҥө,
Хотугу сулус дьиримин өйдүү
Сүрэхпэр курус дьүрүлгэн оонньуур.