Ответить на сообщение

Вернуться к теме

автор: Сылаас иэйии
Сылаастык

Сыллаан ылыым дуу, уолчааным,
Оҕо сааьыҥ сыламын саната,
Хоргуппут хомолто диэн тугун билбэккэ
Көҥүллук күөлэһийэн улааппыт
Күлүмнэс үөрүүгүн дайыта.

Сыллаан ылыым дуу, иитиэҕим,
Сылаас тыал илгийэр сиккиэрэ
Иэдэскиттэн имэрийэрин кэриэтэ,
Ол тыаллыын аргыстаспыт сырыыгар
Арыйбыт аартыккын аахтара.

Сыллаан ылыым дуу, аһатыа5ым,
Өлөрбүт кө5өнүҥ сылааһа
Сүрэххин ньүелүтэ үөрдэрин тэҥинэн,
Байанай арыаллыыр ыырдарынан
Булт – сонор сылаатын таайтара.

Сыллаан ылыым дуу, салҕааччым,
Бастакы хотууруҥ суолунан
Охсуллубут отуҥ дыргылын саныахтыы,
Күһүҥҥу идэһэ саҕанааҕы
Уот үөрэр иэйиитин эргитэ.

Сыллаан ылыым дуу, эрэлим,
Олоҕу салҕыахтаах ыччатым
Үрдүккэ баҕаҕын, ыраҕын кынаттыы,
Сырдыкка турунуохтаах айаҥҥар
Алгыстаах тускулу иҥэрэ.
- Тимирхаан -


Имя:    

  Фото (jpeg до 300Кб):